៥ ចំណុច ល្មមអាចលួងចិត្តអ្នកគាំទ្រ ហ៊ានចាយលុយទិញ U12 Plus

2018-05-25 03:36:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្វីបើល្ហិចល្ហៀងថារងបរាជ័យលើទីផ្សារនាំចេញស្មាតហ្វូន ក៏ក្រុមហ៊ុនតៃវ៉ាន់ HTC នៅតែមិនរុញរា ហើយបន្តលួងចិត្តអ្នកគាំទ្រតាមរយៈការប្រកាសបង្ហាញស្មាតហ្វូនជំនាន់ថ្មីម៉ូឌែល U12 Plus កាលពីប៉ុន្មានថ្ងៃមុន។ Sabay លើកយកចំណុចខ្លាំងទាំង ៥ របស់ស្មាតហ្វូនតម្លៃ ៧៩៩ ដុល្លារ មកចែកជូនអ្នករាល់គ្នាឲ្យបានដឹង។

១.HTC Edge Sense 2:

វិវត្តបន្តពី Edge Sense ជំនាន់ដំបូងមានប្រើលើ HTC U11 កាលពីឆ្នាំទៅ ក្រឡេកមកឆ្នាំ ២០១៨ ការអាប់ដែតឡើងដល់ Edge Sense 2 បានផ្តល់ឲ្យអ្នកប្រើអាចកាន់ U12 Plus ត្រឹមដៃម្ខាង ហើយចុចប្រើជាមួយការប្រើមេដៃ ឆ្លងកាត់ការច្របាច់គែមសងខាងនៃតួម៉ាស៊ីន។ អ្នកក៏អាចកែប្រែបន្ថែមលើមុខងារ Edge Launcher ដើម្បីកំណត់ពីចំនួន Shortcut ឬប៊ូតុងដែលជំនួយក្នុងការប្រើកាន់តែរហ័សនិងងាយស្រួល។

បន្ថែមពីនេះជុំវិញការថតរូប Portrait ឧបករណ៍អ្នក Lock ជាប់នៅទីតាំងឬ Subject ណាមួយ ថ្វីបើចៃដន្យស្មាតហ្វូនត្រូវបង្វិលមកផ្តេកវិញក៏ដោយក្តី។ បន្សំពីនេះក៏មានការអភិវឌ្ឍបន្ថែមនូវមុខងារឆ្លាតវៃនិងប្រព័ន្ធសុវត្ថិភាពកាន់តែខ្លាំងទៀត ក្នុងប្រព័ន្ធ Software ត្រៀមដាក់ឲ្យ Update នៅថ្ងៃបន្ទាប់។

២.កាមេរ៉ាភ្លោះមុខក្រោយ:

ឡើងកូដដល់កាមេរ៉ាភ្លោះពីរគ្រាប់ ខ្ពស់ជាង U11 ដែលមានត្រឹមមួយគ្រាប់ទំហំ 12MP។ សម្រាប់ U12 Plus ត្រូវបានក្រុមហ៊ុន HTC បន្ថែមកាមេរ៉ាភ្លោះទំហំ 12MP+16MP អាចផលិតរូបភាពបានច្បាស់ល្អ ទទួលបាន ១០៣ ពិន្ទុផ្នែកថតរូបសន្លឹកពីក្រុមការងារ DxOMark ជាប់ចំណាត់ថ្នាក់ខ្ពស់ដាច់គេខាងផ្នែកស្មាតហ្វូនប្រើកាមេរ៉ាពីរគ្រាប់។

លែនមួយគ្រាប់ទំហំ 12MP គាំទ្រមុខងារទប់លំនឹងរូបភាព OIS មាន Aperture ធំដល់ទំហំ f/1.75 និងមួយគ្រាប់ទៀត 16MP ប្រភេទ Optical Zoom កម្រិត 2X មាន Aperture f/2.6។ ជំនួយពីមុខងារ HDR Boost 2 អាចជួយឲ្យស្មាតហ្វូន HTC ម៉ូឌែលនេះ អាចធ្វើបានល្អនៅទីតាំងងងឹត ពោលគឺបង្កើនកម្រិតរូបភាពច្បាស់ដិតជាងមុន និងកាត់បន្ថយគ្រាប់ Noise ឲ្យសល់តិចមែនទែន។

ផ្នែកកាមេរ៉ាមុខនិងក្រោយអាចថតរូបបែបព្រាល Bokeh Effects ទាំងប្រភេទ Auto និង Manual Modeដែលខាងមុខភ្លោះ 8MP ព្រមគ្នា មាន Aperture f/2.0។ ចំពោះការថតវីដេអូអាចចាប់ដល់កម្រិត 4K នៅលក្ខខណ្ឌ 30 ទៅ 60fps ខណៈ 1080p នៅលក្ខខណ្ឌ 30,60 ដល់ 240fps ខណៈឆ្លងកាត់មខុងារ Sonic Zoom ក៏អនុញ្ញាតឲ្យ Background នៃវីដេអូមានសភាពព្រាល អមការ Focus ខ្លាំងលើ Subject។

៣.តួខ្លួនរចនាថ្មី:

បំពាក់អេក្រង់កោងទាំងផ្នែកខាងមុខនិងក្រោយ អមផ្ទៃគែមនៅសល់ផ្នែកខាងលើតិចបំផុត ពោលគឺអេក្រង់ ៦ អ៊ីញ ប្រភេទ Super LCD6 មានមាត្រដ្ឋាន ១៨:៩។ បច្ចុប្បន្នមានលក់ត្រឹមជំនាន់ពណ៌ខៀវ ខ្មៅ (Ceramic Black) ប៉ុន្តែខាងក្រុមហ៊ុនក៏កំពុងត្រៀមចេញលក់ពណ៌ក្រហមថ្មី (Flame Red) បន្ថែមទៀតក្នុងថ្ងៃអនាគត។

ប៊ូតុងជាប់តួម៉ាស៊ីនជាប្រភេទ Edge Sense ខុសពី Physical ដែលផ្តល់បទពិសោធន៍ថ្មីសម្រាប់អ្នកប្រើនៅពេលសង្កត់ អាចទទួលរំញ័រចេញមកវិញ។ គាំទ្រមុខងារការពារជម្រាបទឹកស្តង់ដារ IP68 អាចច្រមុជទឹកនៅជម្រៅ ១,៥ ម៉ែត្រ ក្នុងរយៈពេល ៣០ វិនាទីបានយ៉ាងឡូយ។

៤.សំឡេងនិងមុខងារ Always On:

ផ្តល់ឲ្យការហៅចេញទទួលសំឡេងច្បាស់ជាងមុន ដោយ U12 Plus មានរន្ធ Microphones ដល់ទៅ ៤ បន្សំមុខងារ Always On ដែលរាល់ពេលអ្នកប្រើលើកកាន់ទូរសព្ទ ម៉ាស៊ីននឹងបើកដំណើរការដោយខ្លួនឯង។

គាំទ្របន្ថែមនូវមុខងារឆ្លាតវៃ Google Assistant និង Amazon Alexa មកពីនាយ ងាយស្រួលដើរតួជាជំនួយការឆ្លាតវៃបានច្រើនជម្រើស។ U12 Plus ក៏មានឧបករណ៍បំពងសំឡេង (Speaker) ដល់ទៅ ២ គ្រាប់មួយនៅផ្នែកខាងក្រោមនិងខាងលើនៃឧបករណ៍ ជាជំនួយការដល់កាស HTC Usonic ដែលមានមុខងារទប់សំឡេងរំខានពីខាងក្រៅ ដោយកាសថ្មីនេះប្រើរន្ធដោត USB Type-C បែបនេះទូរសព្ទពុំបានរចនារន្ធដោតទំហំ ៣,៥ ម.ម មកជាមួយឡើយ។

៥.កម្លាំងម៉ាស៊ីនខ្ពស់ផុតលេខ:

ទាំងដែលស្ថិតក្នុងតម្លៃចាប់ពី ៧៩៩ ដុល្លារឡើងទៅ U12 Plus របស់ក្រុមហ៊ុនតៃវ៉ាន់ឆ្នាំនេះ បានវិវត្តកម្លាំងម៉ាស៊ីនឡើងដល់ជំនាន់ខ្ពស់មិនចាញ់គូប្រជែងដទៃ។ បំពាក់ឈីប Qualcomm Snapdragon 845 មកជាមួយ RAM 6GB អមអង្គផ្ទុកទំហំ 64GB/128GB ដំណើរការលើ Android 8.0 Oreo មានកម្រិតបង្ហាញអេក្រង់ ២ ៨៨០ x ១ ៤៤០ ភីកសែល មានដង់ស៊ីតេអេក្រង់ ៥៣៧ppi និងថាមពលថ្មធំ ៣ ៥០០mAh។ ក្នុងប្រអប់មានដុំសាកថ្មរហ័ស Quick Charge 3 ឥតគិតថ្លៃ ប៉ុន្តែអ្នកក៏អាចបន្ថែមល្បឿននេះបាន តាមរយៈការទិញពីខាងក្រៅនូវដុំសាកជំនាន់ថ្មី Quick Charge 4។