មកស្គាល់ប្រទេស ៥ មានល្បឿនអ៊ីនធឺណិតយឺតបំផុតក្នុងពិភពលោក

2018-05-30 02:11:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាមធ្យមល្បឿនអ៊ីនធឺណិត 4mbps (មេកាប៊ីតក្នុងមួយវិនាទី) ឬខ្ពស់ជាងនេះ អាចឲ្យអ្នកធ្វើការប្រើប្រាស់បណ្តាញសង្គម Facebook ទស្សនាវីដេអូ YouTube ឬបំពេញការងារស្រាវជ្រាវលើប្រព័ន្ធអ៊ីនធឺណិតបានឆាប់រហ័ស។ មានប្រទេសមួយចំនួនក្នុងពិភពលោក មានល្បឿនអ៊ីនធឺណិតយឺតជាងនេះ ១ ទ្វេជា ២។

៥.អេហ្សីប:

ជាប្រទេសមួយស្ថិតក្នុងទ្វីបអាហ្វ្រិកដែលមានល្បឿនអ៊ីនធឺណិតយឺត ជាមធ្យមហក់បានត្រឹមល្បឿន 2.2 mbps ទាបជាងដល់ទៅ 13mbps ធៀបនឹងប្រទេសកេនយ៉ាជាប់ឈ្មោះជាតំបន់មានអ៊ីនធឺណិតលឿនបំផុតនៅអាហ្វ្រិកឡើងបានដល់ 15 mbps។

៤.ហ្គាបុង:

ប្រទេសនៅតំបន់អាហ្វ្រិកកណ្តាលមួយនេះ កន្លងទៅក៏ធ្លាប់ត្រូវបានរដ្ឋាភិបាលបិទចោលប្រព័ន្ធអ៊ីនធឺណិតទូទាំងប្រទេស ក្រោយរងភាពតានតឹងអំឡុងពេលធ្វើការបោះឆ្នោត។ តាមប្រភពឲ្យដឹង ជាមធ្យមប្រទេសនេះ ល្បឿនអ៊ីនធឺណិតរត់បានត្រឹមល្បឿន 1.9 mpbs តែប៉ុណ្ណោះ។

៣.យេម៉ែន:

ជាប្រទេសស្ថិតក្នុងតំបន់មជ្ឈិមបូព៌ាដែលមានល្បឿនអ៊ីនធឺណិតយឺតបំផុតគិតត្រឹមត្រីមាសទី ៤ ឆ្នាំ ២០១៦ គឺមានល្បឿន 1.3 mbps ។ រដ្ឋាភិបាលហាក់ពុំបានយកចិត្តទុកដាក់ចំពោះតម្រូវការរបស់ប្រជាពលរដ្ឋ ធ្វើឲ្យកើតមានបញ្ហាប្រឈមច្រើន។ សូម្បីតែក្រសួងទូរគមនាគមន៍ប្រទេសនេះ បន្តប្រើប្រាស់ឧបករណ៍បច្ចេកវិទ្យាហួសសម័យ ដែលដំឡើងតាំងតែទសវត្សរ៍ទី ៧០ ហើយគ្មានការផ្លាស់ប្ដូរមកទល់បច្ចុប្បន្ន។

កត្តានេះបានជំរុញឲ្យការបង់ថ្លៃប្រើប្រាស់អ៊ីនធឺណិត ក្នុងស្រុកមានតម្លៃថ្លៃលើសពីប្រទេសដទៃ ជាហេតុធ្វើឲ្យប្រជាពលរដ្ឋមួយភាគធំប្រឈមបញ្ហាក្នុងការតភ្ជាប់ប្រើប្រាស់សេវាកម្មឌីជីថល។

២.វេណេហ្ស៊ុអេឡា:

ប្រទេសនេះក៏មិនខុសពីយេម៉ែន មានល្បឿនអ៊ីនធឺណិតត្រឹម 1.6 mbps ។ ផ្អែកតាមគោលបំណងរបស់រដ្ឋាភិបាល សង្កត់ធ្ងន់ថាការរក្សាល្បឿនអ៊ីនធឺណិតយឺត ជាមធ្យោបាយជួយកាត់បន្ថយទំហំចំណាយថវិកាជាតិ។ តាមការឲ្យដឹងល្បឿននៃការបើកទំព័រណាមួយ ត្រូវចំណាយពេលប្រមាណ ៦,៧ វិនាទី ពោលគឺយឺតជាង ៥ ដងធៀបនឹងប្រទេសអ៊ីស្រាអែល។

១.ប៉ារ៉ាហ្គាយ:

ពុំបានបញ្ជាក់របាយការច្បាស់ល្បឿនជាមធ្យមនៃការដំណើរការប្រើប្រាស់អ៊ីនធឺណិតប្រទេសនៅអាមេរិកឡាទីននេះ ប៉ុន្តែប្រភពបានបញ្ជាក់ថា ប៉ារ៉ាហ្គាយក៏មិនខុសគ្នាទៅនឹងប្រទេសវេណេហ្ស៊ុអេឡាដែរ។ ក្នុងមួយឆ្នាំៗល្បឿនអ៊ីនធឺណិតធ្លាក់ចុះប្រមាណ ១០ ភាគរយ ខុសពីប្រទេសដទៃទៀតក្នុងទ្វីបអាមេរិកខាងត្បូង ដូចជាប្រេស៊ីលឃើញកំណើនកើនដល់ ៥៥ ភាគរយ។

ថ្វីបើល្បឿនអ៊ីនធឺណិតយឺត ប៉ុន្តែប្រទេសដែលមានប្រជាពលរដ្ឋជាង ៦ លាននាក់ នៅបន្តដំឡើងថ្លៃប្រើប្រាស់ សឹងស្មើបូលីវីដែលត្រូវគេស្គាល់ជាប្រទេសមានតម្លៃអ៊ីនធឺណិតខ្ពស់បំផុតក្នុងលោក៕