ទូរសព្ទអនាគតរបស់ Vivo អាចថ្លៃស្មើ iPhone X

2018-05-30 07:09:27
ចំនួនមតិ 0 | ចំនួនចែករំលែក 0

ចន្លោះមិនឃើញ

Vivo នឹងប្រកាសចេញស្មាតហ្វូនអនាគតរបស់ខ្លួននៅថ្ងៃទី ១២ ខែមិថុនាខាងមុខនេះ។ ស្មាតហ្វូនអនាគតនេះជាផលិតសម្រេចនៃផលិតផលគំរូឈ្មោះ Apex ដែល Vivo បានបង្ហាញចេញកាលដើមឆ្នាំកន្លងទៅ។

ផលិតផលសម្រេចនឹងត្រូវប្រើឈ្មោះថ្មីថា NEX ដោយវាស្មាតហ្វូនមានស៊ុមជុំវិញស្ដើងបំផុត, មានកាមេរ៉ា Selfie បង្កប់នៅផ្នែកខាងក្នុង និងមានទ្រនាប់ស្កេនម្រាមដៃលើផ្ទៃអេក្រង់ផ្ទាល់។ បើតាមក្រដាសមួយផ្ទាំង ដែលសរសេរដោយដៃ បានបង្ហាញថា Vivo NEX នេះនឹងមានតម្លៃចន្លោះពី ៧៨០ ទៅ ១ ១០០ ដុល្លារឯណោះ (ជាតម្លៃនៅប្រទេសចិន)។

ប្រភេទដែលមានតម្លៃធូរថ្លៃមានប្រើបន្ទះឈីប Snapdragon 710 និងមានបច្ចេកវិទ្យាកាមេរ៉ាមិនសូវខ្ពស់ប៉ុន្មាននោះទេ ចំណែកប្រភេទតម្លៃថ្លៃវិញមានប្រើបន្ទះឈីប Snapdragon 845 និងមានកាមេរ៉ាសមត្ថភាពខ្លាំង។

ក្រដាសមួយផ្ទាំងនេះនៅមិនទាន់អាចឲ្យគ្រប់គ្នាទុកចិត្តបាននៅឡើយទេ។ ប៉ុន្តែតម្លៃប៉ុណ្ណេះអាចនិយាយបានថាសមហេតុផលសម្រាប់ស្មាតហ្វូនដែលមានលក្ខណៈពិសេសប្លែកពីគេបែបនេះ៕