ភ្លេចៗខ្លួនកុមារី អម កាន់តែចម្រើនវ័យ មើលមិនចង់ស្គាល់!

2018-06-01 11:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលវេលាពិតជាដើរលឿនមែន ប៉ុន្មានឆ្នាំមុន អម ដែលត្រឹមជាកុមារីមួយប៉ុណ្ណោះនោះ ឥឡូវនាងចម្រើនវ័យ ស្ទើរពេញក្រមុំទៅហើយ ពោលគឺ ពេលដើរទន្ទឹមគ្នាស្មាស្មើនឹងម្ដាយស្រេចតែម្ដង។

កូនក្រមុំ យុគ ចិន្តា បានបង្ហាញខ្លួនកម្រមួយជាមួយម្ដាយចែកអំណោយសប្បុរសធម៌ដល់កុមារពិការភ្នែក និងគថ្លង់នៅអង្គការ "គ្រួសារថ្មី" នាព្រឹកថ្ងៃទិវាកុមារអន្តរជាតិនេះ។ ឫកពារួសរាយ អម ប្រាប់ថា មកដល់ឆ្នាំនេះ នាងមានវ័យ ១៥ឆ្នាំហើយ ហើយក៏ត្រៀមខ្លួនបន្ថែមអាយុ១ឆ្នាំទៀតឆាប់ៗនេះដែរ។ បច្ចុប្បន្ន អម កំពុងសិក្សាចំណេះទូទៅថ្នាក់ទី ៨ នៅសាលាអន្តរជាតិក្នុងស្រុកមួយ។

ឆ្លៀតពេលពីការសិក្សា យុវតីសម្បុរស្រអែមរូបនេះ ចេញមកជាមួយម្ដាយធ្វើសកម្មភាពសប្បុរសធម៌រួមគ្នា។ អម ថ្លែងថា នាងសប្បាយចិត្តណាស់ ដែលមានពេលបានធ្វើការងារសប្បុរសធម៌ ហើយថា នាងចង់មានពេលវេលាធ្វើការងារបែបនេះច្រើនទៀត ពិសេសក្នុងថ្ងៃកំណើតនាងនាពេលខាងមុខ ក្នុងនោះ កុសលផលបុណ្យទាំងប៉ុន្មាននាងបានពីទង្វើរបស់នាង គឺជូនទៅអ្នកម្ដាយតែម្នាក់គត់៕