រមណីយដ្ឋានទឹកជ្រោះផ្អោក ស្រុកគីរីវង់ សម្បូរត្បូងថ្ម ធម្មជាតិមានតម្លៃ

2018-06-03 02:06:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្រុកគីរីវង់ ខេត្តតាកែវ មានរមណីយដ្ឋានមួយកន្លែងទាក់ទាញភ្ញៀវទេសចរ គឺទឹកជ្រោះផ្អោក ព្រោះនៅទីនោះមានទឹកធ្លាក់ និងសម្បូរត្បូងមានតម្លៃ។ ក្រៅពីភ្ញៀវទេសចរមកលេងកម្សាន្តទឹកធ្លាក់ នៃទឹកជ្រោះផ្អោកមានប្រវែង ១ ០០០ម៉ែត្រ និងទទឹង ២ម៉ែត្រ ដែលហូរធ្លាក់ពីលើភ្នំមកនោះ គឺភ្ញៀវអាចរកទិញត្បូងមានតម្លៃជាច្រើន។ ដូច្នេះ ក្រុមការងារផ្លូវទៅស្រុកវគ្គ២ សូមបង្ហាញ ពីរបរលក់ត្បូង ដូចខាងក្រោមនេះ៖

១. អ្នកស្រី ឈុន ណាត វ័យ៦១ឆ្នាំ អ្នកលក់ត្បូងគ្រប់ប្រភេទ នៅតំបន់ទេសចរណ៍ជ្រោះផ្អោក ស្រុកគីរីវង់ ខេត្តតាកែវ។ ដោយសារតែប្រជុំភ្នំនៃតំបន់ទេសចរណ៍ជ្រោះផ្អោក សម្បូរត្បូងថ្ម ធម្មជាតិមានតម្លៃ អ្នកស្រីចាប់ផ្ដើមអាជីវកម្មរបស់ខ្លួន ដោយការដើរទិញត្បូងពីអ្នកជីក យកទៅច្នៃ ហើយផ្ញើគេលក់តាមហាង ក្នុងអំឡុងឆ្នាំ ២០០៣ -២០០៤។ នៅឆ្នាំ ២០០៧ អ្នកស្រី ឈុន ណាត សម្រេចចិត្តចេញមករកស៊ី និង បើកហាងលក់ត្បូងដោយខ្លួនឯងតែម្តង ។

២. ក្នុងអាជីវកម្មរបស់ខ្លួន ទោះបីជាកុងសែស្រីក៏ដោយ ក៏អ្នកស្រី ឈុន ណាត ហ៊ានពុះពាររាល់ការលំបាក ឡើងភ្នំចុះទួល ស្កាត់ជួបអ្នកជីកត្បូង ពីកន្លែងមួយទៅកន្លែងមួយ ឆ្លងអូរឆ្លងជ្រោះ ដើម្បីទិញត្បូងឱ្យបានមុនកុងសែប្រុសៗដទៃទៀត។ នៅក្នុងរូបនេះ អ្នកជីកត្បូងម្នាក់ កំពុងលុងដីជីកត្បូងនៅជើងភ្នំមួយ ក្នុងតំបន់ទេសចរណ៍ជ្រោះផ្អោក។

៣. ការជីកលុងដី រុករកត្បូងគឺជាការប្រថុយប្រថានមួយសម្រាប់កម្មករត្បូង។ ថ្ងៃខ្លះអាចជីកបានត្បូង ថ្ងៃខ្លះអាចជីកអត់បានសោះ។ តែចំពោះកម្មករត្បូងរបស់អ្នកស្រី ឈុន ណាត ម្នាក់នេះ គាត់មានសំណាងច្រើនជាងអត់។ គាត់ប្រកបរបរនេះជាង ១០ឆ្នាំមកហើយ។ ហើយគាត់ចេះមើលសណ្ឋានដី ដែលអាចនឹងមានត្បូងឬអត់ទៀតផង។ បុរសវ័យជាង៤០ឆ្នាំរូបនេះ កំពុងបង្ហាញត្បូងពណ៌ ស មួយគ្រាប់ដែលគាត់ទើបនឹងជីកបាន។

៤. ត្បូងថ្មដែលអ្នកស្រី ឈុន ណាត ប្រមូលទិញពីពួកកម្មករ ត្រូវបានបញ្ជូនបន្តទៅកាន់ផ្ទះច្នៃត្បូង។ អ្នកច្នៃត្បូងក៏ជាកម្មករ (កូនជាង) របស់អ្នកស្រីដែរ។ ពួកគេច្នៃត្បូងទៅតាមតម្រូវការរបស់អ្នកស្រី។ យូរៗម្តង អ្នកស្រីឈុន ណាត ទៅឈរមើលកូនជាងច្នៃម៉ូតត្បូង។ ប៉ុន្តែភាគច្រើន អ្នកស្រីចាំយកត្បូងដែលច្នៃហើយ នៅឯផ្ទះប៉ុណ្ណោះ។

៥. អ្នកស្រីឈុន ណាត កំពុងចរចារនឹងអតិថិជន នៅហាងរបស់ខ្លួន ដែលស្ថិតតាមបណ្ដោយផ្លូវទៅកាន់ទឹកជ្រោះផ្អោក។ ទំនាក់ទំនងល្អ រវាងអ្នកស្រី និងអ្នកជីកត្បូង រវាងអ្នកស្រី និងអ្នកទិញ បានធ្វើឱ្យអ្នកស្រី ឈុន ណាត ក្លាយជាកុងសែដែលទិញត្បូងបានល្អៗ និងជាទីទុកចិត្តរបស់អតិថិជន។ រយៈពេលជាង១០ឆ្នាំមកនេះ អ្នកស្រី មានអតិថិជនច្រើនគ្រប់ទិសទី ទាំងក្នុងស្រុក និង ក្រៅស្រុក៕

សូមចុចអាន៖ រមណីយដ្ឋាន ទឹកជ្រោះផ្អោកគីរីវង់ សម្បូរត្បូង

អត្ថបទ៖ ក្រុមការងារផ្លូវទៅស្រុក