World Cup ក្នុង​ប្រទេស​រុស្សី Hugo Lloris ជា​មនុស្ស​ចាស​ទុំ​ ​មាន​បទពិសោធន៍​ច្រើន​ជាង​គេ ក្នុង​ចំណោម​កីឡាករ​ទាំង​អស់​ដែល​​បារាំង​បាន​កោះ​ហៅ ហើយ​ក៏​ត្រូវ​ដើរ​តួ​ជា​ប្រធាន​ក្រុម​ផង​ដែរ។

អ្នក​ចាំ​ទី​របស់ Spurs រូប​នេះ​បង្ហាញ​ខ្លួន​បាន​៩៧​ប្រកួត​ហើយ​ឲ្យ​ប្រទេស​រហស្សនាម​មាន់គក​។ ក្នុង​ឈុត​ដែល​លោក Didier Deschamps សម្បូរ​​ទៅ​ដោយ​កីឡាករ​យុវជន​អាយុ​ក្រោម​២៥​ឆ្នាំ​ជា​ច្រើន​ដូច​ជា Kylian Mbappe (១៩ឆ្នាំ) Ousmane Dembele (២១​ឆ្នាំ​) និង Thomas Lemar (២២ឆ្នាំ​) ជា​ដើម។

បារាំង​ធ្លាប់​ជា​ជើង​ឯក​ World Cup ម្ដង​កាល​ពី​ឆ្នាំ​១៩៩៨ ជំនាន់​លោក Zinedine Zidane ប៉ុន្តែ​ជំនាន់​ក្រោយ​​ៗ​ហាក់​មិន​ទទួល​បាន​សមិទ្ធផល​ល្អ​សោះ។ ងាក​ទៅ​និយាយ​ពី Lloris នេះ​គឺ​លើក​ទី​៣​ហើយ ដែល​គេ​មាន​ឈ្មោះ​ចូល​លេង​ក្នុង​ព្រឹត្តិការណ៍ World Cup។ ជាប់​ក្រុម​ធំ​នៅ​ឆ្នាំ​២០០៨ ពីរ​ឆ្នាំ​បន្ទាប់ World Cup នៅ​ប្រទេស​អាហ្វ្រិកខាងត្បូង​ Lloris ក៏​ត្រូវ​បារាំង​កោះហៅ​ទៅ​លេង​ដែរ។ តែ​សំណាង​មិន​ល្អ​បារាំង​ធ្លាក់​ត្រឹម​វគ្គ​ក្នុង​ពូល ស្ថិត​នៅ​បាត​តារាង។

២០១៤ World Cup នៅ​ប្រទេស​ប្រេស៊ីល បុរស​វ័យ​៣១​ឆ្នាំ​ Lloris បាន​ដើរ​តួ​ជា​ប្រធាន​ក្រុម​​ពុះពារ​តាំង​ពី​វគ្គ​ចែក​ពូល​ ឡើង​រហូត​ដល់​វគ្គ​៨​ក្រុម​ចុងក្រោយ។ ជោគវាសនា​របស់​បារាំង​បាន​ត្រឹម​វគ្គ​នេះ​ប៉ុណ្ណោះ ដោយ​ចាញ់​អាល្លឺម៉ង់ ១-០ ធ្វើ​ឲ្យ​ឥន្ទ្រី​ដែក​បន្ត​ដំណើរ​លើ​ពាន World Cup។ ចុះ​ចាំ​មើល​ឆ្នាំ​នេះ Lloris អាច​នាំ​នាវា​បារាំង​ដល់​វគ្គ​ណា? ​

អត្ថបទ៖ ហេង សុធារិទ្ធិ