មានចាំទេ ថ្ងៃទី ៧ ខែមិថុនា ដប់ឆ្នាំមុនមានរឿងអ្វីកើតឡើងចំពោះ iPhone?

2018-06-07 10:23:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់តាំងពី iPhone បានបង្ហាញខ្លួនមក នាថ្ងៃ ២៩ មិថុនា ឆ្នាំ ២០០៧ រួចមក ពិភពលោកទាំងមូលពិតជាភ្ញាក់ផ្អើលខ្លាំងមែនទែន ជាមួយទូរសព្ទប្រភេទ Touch Screen ពេញដំបូងគេបង្អស់របស់ Apple ដែលដំណើរការដោយប្រព័ន្ធប្រតិបត្តិការដ៏ល្អមួយក្នុងលោកគឺ iPhone OS ដែលបានប្ដូរឈ្មោះមកជា iOS វិញនាពេលសព្វថ្ងៃនេះ។

នាថ្ងៃទី ៧ ខែមិថុនា ឆ្នាំ ២០១០ ជាពេលដែល Apple បានប្រកាសបញ្ចេញទូរសព្ទដៃរបស់ខ្លួននាកាលនោះគឺ iPhone 4 ។ គេអាចនិយាយបានថា iPhone 4 ជាអ្នកបើកសករាជថ្មី និងត្រួសត្រាយផ្លូវដល់ iPhone ជំនាន់ក្រោយ ព្រោះការអភិវឌ្ឍចេញពី iPhone 3GS មកកាន់ iPhone 4 នេះពិតជាមានការផ្លាស់ប្ដូរខ្លាំងមែនទែន។ បើនិយាយពីនៅក្នុងស្រុកខ្មែរវិញ ពេល iPhone 4 ចេញភ្លាមមានអ្នកគាំទ្រច្រើនលើសលប់ រហូតមកដល់ពេលនេះមានអ្នកខ្លះនៅកាន់ iPhone 4 នេះប្រើប្រាស់នៅឡើយទេ។

ម៉្យាងទៀត iPhone 4 ក៏ជាទូរសព្ទដំបូងក្នុងត្រកូល iPhone ដែលប្រើប្រាស់អេក្រង់ម៉ត់ស្អាតប្រភេទ Retina និងបំពាក់កាមេរ៉ាពីរ មុខមួយ ក្រោយមួយខុសពី iPhone 3GS ដែលមានតែកាមេរ៉ាក្រោយតែមួយគ្រាប់។ ត្រកូលឈីបដែលប្រើលើ iPhone ក៏បានកែឈ្មោះពី Samsung មកជា A ស៊េរីដែរ គឺឈីប Apple A4 និងបន្តដល់ Apple A11 លើ iPhone 8, iPhone 8 Plus និង iPhone X ដល់សព្វថ្ងៃ។

iPhone 4 ក៏ជាទូរសព្ទដំបូងក្នុងត្រកូលរបស់ខ្លួន ដែលប្រើប្រាស់ស៊ុមដែក និងខ្នងក្រោយកញ្ចក់ដែរ ដែលវាពិតជាពេញនិយមខ្លាំងនាសម័យកាលនោះ រហូតមកដល់ពេលនេះ iPhone ជំនាន់ចុងក្រោយ ទាំង ៣ ស៊េរីបកមកប្រើខ្នងកញ្ចក់វិញ ដើម្បីគាំទ្រការសាកថ្មដោយមិនប្រើខ្សែ។