លែងជាអ្វីនឹងគ្នាទៅហើយ តែ Selena នៅតែមានអារម្មណ៍ចំពោះ Justin?

2018-06-08 02:18:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីជាបច្ចុប្បន្ន តារាចម្រៀង Selena Gomez មិនមែនជាគូស្នេហ៍នឹងតារាចម្រៀង Justin Bieber តទៅទៀតក្ដី ប៉ុន្តែអារម្មណ៍របស់នាងនៅតែមិនប្រែប្រួលនៅពេលណាដែលនាងឃើញ Justin នៅជាមួយស្រីដទៃ។

បើតាមមិត្តភ័ក្ដិរបស់ម្ចាស់បទ "The Heart Wants What It Wants” បានប្រាប់វិបសាយ Hollywood Life ថា៖ "Selena នៅតែមានរសាប់រសល់នៅពេលដែលនាងឃើញ Justin ជាមួយស្រីផ្សេង។ អារម្មណ៍របស់នាងចំពោះ Justin គឺពិបាកយល់ណាស់ Selena មិនចង់នៅជាមួយលោក ប៉ុន្តែក៏មិនចង់ឃើញលោកជាមួយអ្នកផ្សេងដែរ។ នៅពេលឃើញលោកនៅជាមួយស្រីផ្សេង វាធ្វើឲ្យនាងខ្ពើមរអើម ព្រោះនាងនៅតែស្រឡាញ់ Justin។ បេះដូងរបស់នាងលោតញាប់ នៅពេលដឹងថាពួកគេមិនអាចនៅជាមួយគ្នាបាន និងពិបាកចិត្តដែលឃើញលោកនៅជិតស្រីផ្សេង"។

ទោះបីជាឃើញគូស្នេហ៍ចាស់របស់ខ្លួននៅជិតស្រីដទៃគឺវាពិបាកទ្រាំក៏ដោយ ប៉ុន្តែតារាចម្រៀង Selena មានសំណាងដែរ ដែលមានមិត្តភ័ក្ដិរបស់នាងជួយ។ បើតាមប្រភពមួយបានឲ្យដឹងថា៖ "មិត្តភ័ក្ដិរបស់ Selena ការពារនាងខ្លាំងណាស់ពីអ្វីដែលនាងមិនចូលចិត្ត ពួកគេបានបញ្ចៀសរូបភាពរបស់ Justin ដែលបានថតជាមួយស្រីផ្សេងនៅកោះ Turks & Caicos ដូច្នេះ Selena នឹងមិនបានឃើញវា។ ដើម្បីការពារនាង ពួកគេបានធ្វើរឿងផ្អែមល្ហែមទាំងនេះ ហើយ Selena ពិតជាមានសំណាងខ្លាំងណាស់ដែលមានមិត្តភ័ក្ដិដែលបារម្ភពីសុខទុក្ខនាងបែបនេះ។ ពួកគេជាចំណែកមួយដែលធ្វើឲ្យនាងក្លាយជាមនុស្សរឹងមាំ និងមិនរត់គេចពី Justin។ មានពេលខ្លះ នាងចង់ទៅរក Justin វិញ ប៉ុន្តែនាងទប់អារម្មណ៍ខ្លួនឯង ហើយមិត្តរបស់នាងក៏បានជួយនាងពីក្រោយ"។

មួយវិញទៀត ដើម្បីអាចចៀសវាងការឃើញរូបថតរបស់ Justin ទៀត តារាចម្រៀងស្រីរូបនេះបានយកចិត្តទុកដាក់លើការងាររបស់នាងជំនួសវិញ នាងបានចេញបទចម្រៀងថ្មី "Back To You” កាលពីពេលថ្មីៗ ដែលល្បីថាបទនេះតែងឡើងអំពីស្នេហារបស់នាងជាមួយ Justin៕

ប្រភព៖ Kenh14 ប្រែសម្រួល៖ អន សុភក្ត្រា