ពលរដ្ឋត្រូវយល់ដឹង! កម្ចីពីធនាគារ១០ប្រភេទ អាចនាំទុក្ខដាក់ខ្លួន និងនាំឲ្យរីកចម្រើន

2018-06-11 02:23:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាការពិតការខ្ចីលុយពីធនាគារ ដោយខ្វះការវិភាគពីហានិភ័យ និងគោលដៅច្បាស់លាស់អាចនាំឱ្យមានបញ្ហាក្នុងជីវភាពរស់នៅ ប៉ុន្តែបើខ្ចីចំគោលដៅ យកទៅប្រើប្រាស់ដើម្បីភាពរីកចម្រើនក្នុងគ្រួសារនោះគឺជាកម្ចីល្អ។ ខាងក្រោមនេះជាការលើកឡើងរបស់ លោកសាស្ត្រាចារ្យ វេង ហៀង បង្រៀនផ្នែកសេដ្ឋកិច្ច និងហិរញ្ញវត្ថុ នៅសាកលវិទ្យាល័យឯកជនមួយ ពីប្រភេទកម្ចីល្អបំផុតសម្រាប់គ្រួសារ និងកម្ចីអាចនាំឲ្យមានបញ្ហាដល់គ្រួសារ៖

កម្ចី៥ប្រភេទគួរពិចារណាឲ្យច្បាស់ប្រយ័ត្ននាំទុក្ខដាក់ខ្លួន៖

១. លុយខ្ចីទិញទ្រព្យសម្បត្តិ

លុយខ្ចីទ្រព្យសម្បត្តិដូចជាឡាន ម៉ូតូ និងសម្ភារៈនិយមផ្សេងៗទៀត ត្រូវគិតឱ្យបានច្បាស់មុនសម្រេចចិត្តខ្ចីធនាគារ។ ជាពិសេសប្រជាពលរដ្ឋនៅតាមជនបទ ដែលពិចារណាមិនបានវែងឆ្ងាយនឹកឃើញចង់បានអ្វីខ្ចីលុយពីធនាគារភ្លាម ដោយមិនបានវិភាគមើលឱ្យបានច្បាស់ពីកម្រិតប្រាក់ចំណូលក្នុងគ្រួសារ ឬមធ្យោបាយទូទាត់សងនោះទេ។ ការខ្ចីលុយទិញទ្រព្យសម្បត្តិ មិនបានធ្វើឱ្យលុយមានលំហូរនោះទេ គឺកប់ក្នុងទ្រព្យនោះ។ ដូច្នេះបើមិនទាន់មានលទ្ធភាពសងត្រឡប់ ដោយមិនប៉ះពាល់ដល់ការចាយវាយប្រចាំថ្ងៃ គួរជៀសវាងត្រង់ចំណុចនេះ។

២. លុយខ្ចីធ្វើផ្ទះ

ប្រជាពលរដ្ឋនៅតាមបណ្ដាខេត្តមានមួយចំនួន តែងជ្រើសរើសខ្ចីលុយពីធនាគារសង់ផ្ទះ ដោយអាងមុខរបរស្រែចម្ការ ឬកូនធ្វើការរោងចក្រ ក្នុងការទូទាត់សងធនាគារ។ នេះមិនមែនជាជម្រើសល្អនោះទេ មិនខុសអីពីខ្ចីលុយទិញទ្រព្យសម្បត្តិឡើយ គឺលុយត្រូវកប់ចោលគ្មានចលនា ចំណែកប្រាក់ចំណូលដែលរកបានមិនថេរ មិនមានបង្គោលគ្រួសារធានារ៉ាប់រង។ ដូច្នេះចំណុចនេះត្រូវពិចារណាឱ្យវែងឆ្ងាយ ព្រោះអាចធ្វើឱ្យជីវភាពគ្រួសារមានបញ្ហា។

៣. លុយខ្ចីដើម្បីយកចងការប្រាក់

បច្ចុប្បន្នប្រជាពលរដ្ឋមួយចំនួនចូលចិត្ត រកស៊ីចងការប្រាក់នៅតាមភូមិស្រុក ដោយខ្ចីលុយពីធនាគារ។ ការខ្ចីលុយ ដើម្បីរកស៊ីមុខរបរនេះ គឺប្រឈមនឹងហានិភ័យខ្ពស់បំផុត ដោយសារការចងការប្រាក់នោះ ពុំមានលិខិតលាយលក្ខអក្សរច្បាស់លាស់ គ្មានអាជ្ញាធរដឹងឭ។ ដូច្នេះហើយ មិនអាចធានា ១០០% ថាគេនឹងសងត្រឡប់នោះទេ ហើយនៅពេលមានបញ្ហាក៏ពិបាកឱ្យអាជ្ញាធរដោះស្រាយដែរ។

៤. ខ្ចីលុយបន្ទាន់ភ្លាមៗ

កម្ចីប្រភេទនេះ ភាគច្រើនតែងបង្កផលលំបាកទៅថ្ងៃក្រោយដូចគ្នា គឺខ្ចីលុយពីធនាគារ ដោយសារមានការចាំបាច់បន្ទាន់ដូចជា រៀបការឱ្យកូន យកទៅទិញដី ជាដើម។ ការខ្ចីបន្ទាន់ដោយមិនបានគិតវែងឆ្ងាយ មើលឃើញតែអ្វីកំពុងកើតឡើងចំពោះមុខគឺនាំមានផលលំបាកខ្លាំង ពោលគឺ ការរកលុយសងត្រឡប់នេះហើយ។

៥. ខ្ចីលុយទូទាត់បំណុលចាស់

កម្ចីប្រភេទនេះកម្រមាន តែនៅតែអាចកើតឡើងនៅពេលមនុស្សមួយចំនួន ដើរដល់ផ្លូវទាល់។ កម្ចីនេះនឹងធ្វើឱ្យបំណុលកាន់តែកើនឡើងទ្វេដង រហូតអាចឈានដល់ការដាក់ប្លង់ផ្ទះបញ្ចាំ ឬលក់ផ្ទះដើម្បីសងបំណុលទៀតផង។ ដូច្នេះហើយមិនគួរយកជម្រើសនេះដាច់ខាត ព្រោះនឹងនាំកាន់តែមានសំពាធកាន់តែខ្លាំងឡើង។

តទៅនេះគឺជាកម្ចីនាំឲ្យគ្រួសាររីកចម្រើន

១. កម្ចីបង្កើនដើមទុន

កម្ចីបង្កើនដើមទុននេះសំដៅថា អ្នកខ្ចីលុយពីធនាគារមានដើមទុនខ្លួនឯងខ្លះហើយនៅក្នុងដៃ ដើម្បីបង្កើតអាជីវកម្មមួយដែលបានរៀបចំផែនការច្បាស់លាស់រួចហើយ ប៉ុន្តែនៅខ្វះដើមទុនបន្ថែមទៀត មិនមែនខ្ចីទាំងស្រុងឡើយ។ ដូច្នេះជម្រើសល្អមួយ គឺត្រូវខ្ចីលុយបន្ថែមពីធនាគារ ចំណែកធនាគារក៏មានទំនុកចិត្តផ្ដល់កម្ចីទៅអតិថិជននោះដែរ។ យ៉ាងណាក្ដីអ្នកខ្ចីត្រូវធានាថា ពិតជាមានទុនបម្រុងសម្រាប់ទ្រទ្រង់ការខាតបង់រយៈពេលវែង ពេលដំណើរការអាជីវកម្ម និងអាចមានលទ្ធភាពគ្រប់គ្រាន់សងត្រឡប់ទៅធនាគារ។

២.កម្ចីពង្រីកមុខរបរដែលមានស្រាប់

ប្រភេទកម្ចីនេះនឹងជួយឱ្យអាជីវកម្មគ្រួសារកាន់រីកដុះដាល និងមានភាពរីកចម្រើន។ ប្រជាពលរដ្ឋដែលមានការយល់ដឹងច្បាស់លាស់ពីការខ្ចីតែងប្រើវិធីសាស្ត្រនេះ ពង្រីកអាជីវកម្មដែលមានស្រាប់ ហើយខ្ចីក្នុងកម្រិតតិចតួចមិនមែនរាប់ពាន់ដុល្លារទេ។ ឧទាហរណ៍ថា គ្រួសារមួយមានកសិដ្ឋានចិញ្ចឹមជ្រូកលក់ តែខ្វះបារដើម្បីបង្កាត់ពូជ។ ដូច្នេះដើម្បីបង្កើនបារជ្រូក គេត្រូវខ្ចីលុយពីធនាគារ ដើម្បីទិញជ្រូកដាក់បន្ថែម នៅពេលលក់ជ្រូកដាច់ អាចសងត្រឡប់ទៅកាន់ធនាគារវិញ។

៣. កម្ចីទិញផ្ទះ២នាក់ប្ដីប្រពន្ធ

ប៉ុន្តែប្រសិនបើពីរនាក់ប្ដីប្រពន្ធធ្វើការទាំងពីរនាក់ អាចរកចំណូលបានលើសពី ៨០០ដុល្លារក្នុងមួយខែអាចខ្ចីលុយពីធនាគារដើម្បីទិញផ្ទះបាន បើមិនជ្រើសរើសវិធីរំលស់។ ធនាគារភាគច្រើនអាចផ្ដល់កម្ចីត្រឹម ៧០%នៃតម្លៃផ្ទះ ចំណែក៣០%ទៀតត្រូវកក់ឱ្យម្ចាស់ផ្ទះ។ ដូច្នេះក្នុងមួយខែ អាចត្រូវចំណាយខ្ទង់ ៣០០ ឬ៤០០ដុល្លារបង់ឱ្យធនាគារក្នុងកាលកំណត់ណាមួយ។

៤. កម្ចីក្នុងថ្លៃឱកាស

កម្ចីប្រភេទនេះ សំដៅដល់ការខ្ចីលុយពីធនាគារ ដើម្បីចាប់យកឱកាសល្អណាមួយហក់ចូលក្នុងទីផ្សារដូចជា ការទិញប័ណ្ណភាគហ៊ុនពីរដ្ឋាករទឹក ការសេងហាងបន្ត ឬចូលភាគហ៊ុនជាមួយក្រុមហ៊ុនណាមួយ។ កម្ចីប្រភេទនេះទាមទារឱ្យអ្នកខ្ចីមានចំណេះដឹងគ្រប់គ្រាន់ផ្នែកសេដ្ឋកិច្ច មានគំនិតជាសហគ្រិនភាព មានលុយច្រើនក្នុងដៃ និងមានប្រាក់ចំណូលថេរ។ ដោយហេតុថា ការឈានជើងរកស៊ីមិនអាចធានាជោគជ័យ១០០%នោះទេ ហើយត្រូវរង់ចាំពេលវេលាក្នុងរយៈពេលវែង។

៥. កម្ចីរយៈពេលខ្លី

កម្ចីរយៈពេលខ្លីនេះ សំដៅដល់ការខ្ចីលុយពីធនាគារ ដើម្បីបង្វិលដើមទុន ឬកែច្នៃបន្ថែមបន្ថយ ក្នុងអាជីវកម្ម ដើម្បីឱ្យមានភាពទាក់ទាញ កាន់តែរីកចម្រើន។ អ្នកខ្ចីលុយប្រភេទនេះភាគច្រើនគឺមានលុយខ្លួនឯងហើយ ប៉ុន្តែលុយនោះអាចនៅជាប់អតិថិជន ឬយកទៅប្រើលើអ្វីដែលចាំបាច់សិន។ ដូច្នេះអាចខ្វះលុយបន្តិចបន្តួចប៉ុណ្ណោះ ដើម្បីថែមថយ ចាំបាច់ត្រូវការខ្ចីលុយក្នុងការជួសជុល កែច្នៃក្នុងរយៈពេលខ្លីណាមួយ។ ក្រោយរកលុយបានមកវិញ អាចបង្វិលទៅធនាគារដោយមិនមានបញ្ហា៕

អត្ថបទ៖ វឌ្ឍនៈ