១ចំណុចនេះ ពីសិស្សខ្មែរនៅអូស្រ្តាលី ចាប់ជំនាញកម្រទី១

2018-06-12 03:55:57
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតខ្មែរទី១ ដែលកំពុងរៀនជំនាញកម្រទី១ នៅសាលាល្បីឈ្មោះ ក្នុងទឹកដីប្រទេសអូស្ត្រាលី បានប្រាប់ថា សហគ្រិនភាពបែបសង្គម ជាជំនាញថ្មី១ ដែលខ្លួនកំពុងរៀន គឺពិតជាជំនាញប្លែកគេ មិនសូវមានអ្នកចាប់អារម្មណ៍រៀនដូចជំនាញដទៃ។

ហេតុផលសំខាន់១ ដែលនិស្សិតខ្មែរ ចង់ចាប់យកជំនាញនេះ គឺការជួយដោះស្រាយបញ្ហាសង្គម មានក្រមសីលធម៌ក្នុងប្រតិបត្តិការ និងគិតពីនិរន្តរភាពជាចម្បង។

អ្នកស្រី វិរៈ បុណ្ណារ័ត្ន ជានិស្សិតខ្មែរទី១ កំពុងរៀនថ្នាក់អនុបណ្ឌិត ផ្នែកសហគ្រិនភាពបែបសង្គម នៅសាកលវិទ្យាល័យ Macquarie ក្នុងទីក្រុងស៊ីដនី ប្រទេសអូស្ត្រាលី។ សម្រាប់មុខវិជ្ជានេះ ទើបតែបានបង្កើតរយៈពេល ៤ឆ្នាំ ។

អ្នកស្រី វិរៈ បុណ្ណារ័ត្ន បានប្រាប់ Sabay ថា បើគ្រាន់តែលឺពាក្យសហគ្រិន ប្រហែលជាយើងគិតដល់រឿងប្រាក់ចំណេញ ឬមុខជំនួញតែ១មុខ។ ប៉ុន្តែមុខវិជ្ជា ដែលអ្នកស្រីកំពុងរៀន គឺពិសេសជាងគេបន្តិច ព្រោះជាជំនួញបែបសង្គម មិនមែនសំដៅតែជំនួញខ្នាតតូចតែមួយមុខទេ។ ជំនាញនេះគឺ ផ្ដោតលើការប្រើប្រាស់គោលការណ៍ជំនួញ និងគ្រប់គ្រងក្នុងការដោះស្រាយ បញ្ហារបស់សង្គម ដោយការទទួលខុសត្រូវខ្ពស់។

អ្នកស្រី វិរៈ បុណ្ណារ័ត្ន ថតនៅប្រទេសអូស្រ្តាលី (រូបភាពផ្តល់ឲ្យ)

អ្នកស្រីបន្តថា មុខវិជ្ជានេះ អាចរៀនបានសម្រាប់អ្នកដែលចង់បើក ឬធ្វើការក្នុងជំនួញបែបសង្គមណាមួយ អ្នកដែលធ្វើការកសាងទំនួលខុសត្រូវ របស់ក្រុមហ៊ុនចំពោះសង្គម និងបរិស្ថាន។

និសិ្សតខ្មែរខាងលើ បន្តថាជំនាញនេះ ក៏អាចក្នុងការរួមចំណែក កាត់បន្ថយភាពក្រីក្រ តាមរយៈការបង្កើតសហគ្រាស បែបសង្គមណាមួយ ដែលអាចផ្ដល់សេវាកម្ម ឬផលិតផលត្រូវនឹងតម្រូវការប្រជាពលរដ្ឋ និងអាចបង្កើតការងារ បង្កើនប្រាក់ចំណូលដល់ក្រុមគោលដៅ ដែលជាក្រុមងាយរងគ្រោះ។

អ្នកស្រី វិរៈ បុណ្ណារ័ត្ន ថតនៅប្រទេសអូស្រ្តាលី (រូបភាពផ្តល់ឲ្យ)

សូមបញ្ជាក់ថា សហគ្រិនភាពបែបសង្គម គឺជាមុខជំនួញដ៏សំខាន់១ ក្នុងការអភិវឌ្ឍន៍សង្គម ដែលទទួលការគាំទ្រទាំងថវិកា និងផ្នែកច្បាប់ ដោយរដ្ឋាភិបាល នៃប្រទេសអូស្ត្រាលី។

ប្រភពពីនិស្សិតខ្មែរខាងលើ បានឲ្យដឹងថា នៅប្រទេសអូស្ត្រាលី មានសហគ្រាសសង្គម ដ៏ធំមួយ មានឈ្មោះថា ក្រុមហ៊ុន Thank you ដែល ផ្តល់សេវាលក់ទឹកសុទ្ធ និងផលិតផលទារក រកចំណូលបានប្រមាណជាង ៥ លានដុល្លារក្នុងមួយឆ្នាំ និងបានបរិច្ចាគប្រាក់ចំណេញ 100% ជួយដល់អ្នកក្រីក្រ។

អត្ថបទ៖ ពៅ រក្សា