មកដឹងតម្លៃប៉ូលាឡានម្តង អស់ប៉ុន្មានទាំង Prius, បាឡែន Lexus, Highlander?

2018-06-12 03:12:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ឡានស្អាតទាក់ទាញ សំខាន់រូបរាងខាងក្រៅ។ ក្រៅពីការលាងសម្អាតជាប្រចាំ ការប៉ូលាក៏ជួយលើកសម្រស់រថយន្តឲ្យនៅថ្មីជានិច្ច។ អ្នកប្រើប្រាស់រថយន្តជាច្រើនមិនសូវយកចិត្តទុកដាក់ការយករថយន្តទៅប៉ូលាបន្ថែម ក្រៅពីការលាងសម្អាត ដោយសារគិតថាចំណាយពេលនិងខាតបង់ថវិកា។

ទាក់ទងការប៉ូលាឡាន លោក គង់ ឡាយ ម្ចាស់យានដ្ឋានគង់ឡាយ ឱ្យដឹងថា យ៉ាងហោចណាស់ ៦ ខែម្ដង អ្នកប្រើប្រាស់គួរយកឡានទៅប៉ូលាម្តង។ ការប៉ូលាឡាន ត្រូវចំណាយពេលវេលានិងកម្លាំងច្រើនទៅតាមប្រភេទឡាន គួបផ្សំស្ថានភាពប្រឡាក់ឬឆ្កូតខ្លាំងដែលត្រូវប្រើពេលយូរ។

លោកថា ឡានមួយគ្រឿងអាចចំណាយពេលប៉ូលាពីរទៅបីម៉ោង ប៉ុន្តែឡានខ្លះប្រលាក់ខ្លាំងអាចចំណាយពេលពេញមួយថ្ងៃក៏មាន។

ចំពោះតម្លៃវិញ គិតទៅតាមប្រភេទឡាន និងស្ថានភាពប្រឡាក់ ឬឆ្កូតខ្លាំងដូចជា Camry បាឡែន, ឆ្លាម, Prius តម្លៃចន្លោះពី ២០ ទៅ ៣០ ដុល្លារ និង Lexus, Highlander តម្លៃចន្លោះពី ៣០ ទៅ ៥០ ដុល្លារ និងប្រភេទឡានស៊េរីទំនើបអាចច្រើនជាងនេះ។

ការប៉ូលាឡានចែកចេញជា ៣ ដំណាក់កាល៖

+ដំណាក់កាលទី ១៖ ការប្រើថ្នាំកាត់ឲ្យភ្លឺ (វៃកាត់)

ឡានដែលប្រឡាក់ខ្លាំង ត្រូវប្រើថ្នាំកាត់ដើម្បីធ្វើឱ្យពណ៌ឡានភ្លឺ។ ជាងប៉ូលាត្រូវលាបថ្នាំកាត់លើឡានតែម្តង ហើយប្រើម៉ូទ័រដែលភ្ជាប់ដោយអេប៉ុង ខាត់ស្នាមប្រឡាក់ និងក្អែលជាប់ឡានចេញ។ បើសិនជាកន្លែងណាមានធូលីឬស្នាមប្រឡាក់លើរថយន្តច្រើន ត្រូវប្រើទឹកថ្នាំបាញ់បន្ថែម ដើម្បីងាយស្រួលសម្អាត។

+ដំណាក់កាលទីពីរ៖ ការសម្អាតកន្លុកកន្លៀត

បន្ទាប់មកត្រូវសម្អាតកន្លុកកន្លៀតចន្លោះតូចៗ ត្រូវដោះមើលកន្លុកកន្លៀតដែលមិនអាចប្រើម៉ូទ័រខាត់បានសម្អាតធូលីដីឱ្យស្អាត ជាពិសេសេកន្លែងដែលមានស្នាមឆ្កូតច្រើន ត្រូវខាត់ឲ្យមានពណ៌ភ្លឺជាមុនសិន ដើម្បីងាយស្រួលធ្វើការប៉ូលា។

+ដំណាក់កាលទីបី៖ ប្រើថ្នាំរលោង (ប៉ូលារលោង)

ការប៉ូលាបញ្ចប់ត្រូងប្រើថ្នាំរលោង ជាមួយក្រណាត់ឬកន្សែងទន់ខាតឲ្យភ្លឺរលោង កន្លែងមានស្នាមឆូត ទើបធ្វើឱ្យភ្លឺនិងមើលទៅថ្មីជាងមុន៕