Neymar យល់យ៉ាងណា ចំពោះការជាប់ឈ្មោះជាកីឡាករមាន"តម្លៃផ្ទេរថ្លៃបំផុត"?
- 2018-06-14 11:18:10
- ចំនួនមតិ 0 | ចំនួនចែករំលែក 0
Neymar យល់យ៉ាងណា ចំពោះការជាប់ឈ្មោះជាកីឡាករមាន"តម្លៃផ្ទេរថ្លៃបំផុត"?
ចន្លោះមិនឃើញ
ខ្សែប្រយុទ្ធ Neymar ក្នុងថ្ងៃនេះ បាននិយាយថា មិនមាន "មោទនភាព" នឹងតម្លៃដែល PSG បានព្រមចំណាយដើម្បីផ្ទេរខ្លួនពីក្លឹប Barcelona កាលពីសីហា ឆ្នាំមុនឡើយ។
កីឡាករប្រេស៊ីលបានថ្លែងប្រាប់សារព័ត៌មាន Spox ថា៖ "ខ្ញុំមិនមានមោទនភាពទៅនឹងតម្លៃផ្ទេរ ឬជាប់ឈ្មោះជាកីឡាករដែលថ្លៃបំផុតលើលោកនោះទេ"។ ខ្សែប្រយុទ្ធសំដៅលើតម្លៃ ២២២ លានអឺរ៉ូ (ជាង ២៦០ លានដុល្លារសហរដ្ឋអាមេរិក) ដែលក្លឹបបារាំងបានប្រើប្រាស់ ដើម្បីនាំចូលខ្លួនពីក្លឹបអ្នកមានបុណ្យ កាលពីទីផ្សារដោះដូររដូវកាលមុន។
Neymar បន្ត៖ "វាគ្រាន់តែជាចំនួនទឹកប្រាក់ប៉ុណ្ណោះ វាមិនបានបញ្ជាក់អ្វីនោះទេ។ និយាយតាមត្រង់ទៅ បើតាមគំនិតខ្ញុំ ខ្ញុំមិនសមនឹងតម្លៃផ្ទេរហ្នឹងទេ"។
ខ្សែប្រយុទ្ធវ័យ ២៦ឆ្នាំ បានពន្យល់ថា តម្លៃផ្ទេរមិនអាចបញ្ជាក់ថា កីឡាករល្អកម្រិតណានោះទេ។ ផ្ទុយទៅវិញ គឺការខិតខំអភិវឌ្ឍអាជីពខ្លួនឯងទៅវិញទេ ដែលជារឿងសំខាន់។
ក្នុងឱកាសក្នុងការផ្ដល់បទសម្ភាសន៍នេះដែរ ខ្សែប្រយុទ្ធ Neymar ក៏បានឆ្លៀតនិយាយបន្តិចដែរអំពី World Cup លើកនេះ។ កីឡាករសង្ឃឹមថា ប្រេស៊ីលនឹងអាចជួបអាល្លឺម៉ង់ ដើម្បីធ្វើការ "សងសឹក" ទៅនឹងលទ្ធផលដែលជម្រើសជាតិអឺរ៉ុបមួយនេះ បានឈ្នះ ៧-១ លើក្រុមខ្លួនកាលពី World Cup ២០១៤៕