ធ្លាប់ថើបថ្នាក់ថ្នម តែឥឡូវសុនខសំណព្វរបស់ Yuri បានស្លាប់ចោលម្ចាស់ឲ្យនៅតែឯង
- 2018-06-15 01:57:51
- ចំនួនមតិ 0 | ចំនួនចែករំលែក 0
ធ្លាប់ថើបថ្នាក់ថ្នម តែឥឡូវសុនខសំណព្វរបស់ Yuri បានស្លាប់ចោលម្ចាស់ឲ្យនៅតែឯង
ចន្លោះមិនឃើញ
សត្វសុនខសំណព្វចិត្តរបស់ Yuri សមាជិកក្រុម Girls' Generation បានស្លាប់ចោលម្ចាស់ហើយ ក្រោយស្ថិតក្រោមការមើលថែ ៧ឆ្នាំ និងបានធ្វើឲ្យមនុស្សជាច្រើនមានការសោកស្ដាយឥតឧបមា ក្រោយដឹងដំណឹងនេះ។
Yuri បានទម្លាយរឿងក្ដុកក្ដួលនេះលើគណនី Instagram កាលពីខែឧសភាកន្លងទៅ ថាសុនខជាទីស្រឡាញ់របស់ខ្លួនឈ្មោះ Hani មានជំងឺតម្រង់នោមដំណាក់កាលចុងក្រោយ ហើយបានធ្វើឲ្យអ្នកគាំទ្រមានការអាណិតអាសូរជាខ្លាំង។ ទីបំផុត សុនខកម្សត់នេះ បានស្លាប់ចោលម្ចាស់ហើយ ក្រោយប្រយុទ្ធនឹងជំងឺនេះអស់រយៈពេលជាយូរ។
ដើម្បីបញ្ជាក់ពីស្រឡាញ់ និងអារម្មណ៍សោកស្ដាយឥតឧបមា Yuri ក៏បានបង្ហោះរូបភាពជាច្រើនកាលពីម្សិលមិញ ពីសត្វចិញ្ចឹមសំណព្វចិត្តនាងមួយនេះ។ ក្នុងសារនោះមានសេចក្ដីថា៖ "ខ្ញុំសម្លឹងមើលភ្នែកឯងគ្រប់ពេល និងតែងបន់ស្រន់សុំឲ្យឯងឆាប់ជាវិញរហូតដល់ថ្ងៃខ្ញុំត្រឡប់មកវិញ។ ថ្ងៃដែលខ្ញុំជិះយន្តហោះជាមួយអារម្មណ៍តឹងតែង ក្រោយខ្ញុំឃើញរូបឯង។ ឯងប្រាកដជាឈឺចាប់ពេញខ្លួន និងខំជម្នះខ្លាំងណាស់ហើយ។ តាំងពីដើមមក ឯងតែងនៅក្បែរខ្ញុំរហូត ហើយខ្ញុំក៏តែងទទួលបានក្ដីស្រឡាញ់ពីឯងដែរ។ គ្រប់ពេលដែលនៅជាមួយគ្នា យើងសប្បាយចិត្ត។ ខ្ញុំក៏សង្ឃឹមថាឯងនឹងនៅជាមួយខ្ញុំឲ្យបានយូរអង្វែងនៅជាតិក្រោយ។ រង់ចាំរហូតដល់ថ្ងៃយើងជួបគ្នាជាថ្មី...អរគុណ! ខ្ញុំស្រឡាញ់ឯង និងសុំទោសផង Hani”។
Yuri គឺជាតារា K-Pop ម្នាក់ដែលស្រឡាញ់សត្វខ្លាំង ហើយកន្លងមកនាងតែងបង្ហោះរូបភាពជារឿយៗជាមួយសុនខជាទីស្រឡាញ់។ ប៉ុន្តែពេលនេះបែរជាត្រូវជួបរឿងស្មានមិនដល់ក្នុងមួយពព្រិចភ្នែក ហើយអារម្មណ៍ពេលនេះ មានតែអ្នកធ្លាប់ចិញ្ចឹម និងស្រឡាញ់សត្វទេ ទើបយល់៕