ល្បីថា នីកូ និង ពេជ្រ សូលីកា ត្រៀមថតរឿងភាគថ្មីជាមួយគ្នាក្នុងពេលឆាប់ៗ

2018-06-15 07:24:18
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមប្រភពជិតស្និទ្ធជាមួយតារាចម្រៀងទាំងពីរឲ្យដឹងថា ឥឡូវនេះផលិតកម្មហង្សមាស បានត្រៀមរួចរាល់ហើយសម្រាប់រឿងភាគឲ្យ នីកូ និង ពេជ្រ សូលីកា ចាប់ដៃគ្នាសម្ដែងជាតួឯកប្រុសស្រីតែម្ដង។

ប្រភពដដែលអះអាងថា បានជាហង្សមាសផ្សំផ្គុំឲ្យ ពេជ្រ សូលីកា និង នីកូ បានប៉ះគ្នាក្នុងខ្សែភាពយន្តភាគថ្មី ដោយសារតែអ្នកទាំងពីរនៅក្មេង។ រីឯរូបសម្រស់ទៀតសោតស្រស់ស្អាតសក្ដិសមគ្នាមិនចាញ់អ្នកសិល្បៈរួមជំនាន់ឡើយ។

បន្ថែមពីនេះ ពេលប៉ះគ្នាម្ដងៗអ្នកទាំងពីរសម្ដែងស៊ីចង្វាក់គ្នាបានល្អណាស់។ ដូច្នេះហើយទើបហង្សមាសជឿជាក់ថា រឿងភាគថ្មីដែលសម្ដែងដោយ ពេជ្រ សូលីកា និង នីកូ ទទួលបានការគាំទ្រពីទស្សនិកជន ព្រោះអ្នកទាំងពីរមានហ្វេនៗគាំទ្រច្រើន។

ដំណឹងនេះត្រូវបាន នីកូ ទទួលស្គាល់ថា ជាការពិតអំឡុងពេលនេះ ខ្លួនត្រូវបានផលិតកម្មហង្សមាសត្រៀមឲ្យថតរឿងភាគថ្មីមែនក្នុងតំណែងជាតួឯក។ ចំណែកឯតួឯកស្រី ពេជ្រ សូលីកា ឬ អត់លោកមិនទាន់ច្បាស់នៅនោះទេ ចាំដល់ថ្ងៃក្រុងពាលីចេញថតរឿង នឹងដឹងហើយថាតួឯកស្រីអ្នកណានោះ។

នីកូ ថា៖" រឿងគាត់(ពេជ្រ សូលីកា) ចូលហង្សមាសអត់ទេ ប៉ុន្តែបើរឿងគាត់សម្ដែងកុនខ្ញុំអត់ច្បាស់ដែរ គ្រាន់តែថាខ្ញុំបានទទួលដំណឹងពីខាងក្រុមហ៊ុនឲ្យខ្ញុំថតរឿងភាគថ្មី តែមិនដឹងតួស្រីអ្នកណាគេទេ ហើយរឿងចំណងជើងអ្វីខ្ញុំអត់ទាន់ដឹងទេ"៕

អត្ថបទ៖ ឆុង ស៊ីណាន