ដេនី ក្វាន់ សុំចិត្តមហាជនឈប់រិះគន់រឿងកែសម្ផស្ស ក្រោយត្រូវគេដៀលថាមុខដូចខ្មោច

2018-06-19 02:19:29
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពី កញ្ញា ដេនីក្វាន់ ចំណាយលុយរាប់ម៉ឺនដុល្លារ ខំហោះទៅប្រទេសថៃដើម្បីកែសម្ផស្ស តែបែរជាត្រូវគេរិះគន់ថា មុខយ៉ាប់មើលមិនចូលភ្នែក តារាសម្ដែងរូបនេះបង្ហោះសារឈឺចាប់លើបណ្ដាញសង្គម សូមមហាជនបញ្ឈប់រិះគន់រឿងនេះបន្តទៀត ព្រោះសម្រស់ធម្មជាតិរបស់មនុស្សម្នាក់ៗ មិនស្អាតដូចក្តីប្រាថ្នាទាំងអស់នោះទេ។

ម្ល៉ោះហើយ កញ្ញាសុំចិត្តអ្នកចូលចិត្តរិះគន់សូមយល់ពីអារម្មណ៍អ្នកមានសម្រស់មិនទាន់ស្អាតពីធម្មជាតិហើយត្រូវឆ្លងកាត់មុខកាំបិតយ៉ាងឈឺចាប់ ដើម្បីមានសម្រស់ដូចក្ដីប្រាថ្នា។

កញ្ញា ដេនីក្វាន់បានសរសេរថា៖ "ខ្ញុំមិនដែលខ្លាចនឹងប្រាប់គេថាខ្ញុំស្អាតដោយសារកែសម្ផស្សនោះទេ ហើយក៏អត់ខ្វល់ពីមនុស្សមួយចំនួនដែលរិះគន់ថាខ្ញុំកែឡើងមុខដូចខ្មោច មុខដូចព្រះយូឡាយ..គីមីពេញខ្លួនរស់មិនបានយូរ តែក៏ចង់ប្រាប់ពួកគាត់វិញថាជីវិតមនុស្សមិនទៀងនោះទេ អ្នកខ្លះធម្មជាតិស្លាប់មុនគីមីក៏មានច្រើនដែរ ព្រោះជីវិតមនុស្សកើតមកគឺជៀសមិនផុតពីសេចក្ដីស្លាប់ទេ...ចឹងហើយសូមកុំប្រមាថជីវិតខ្ញុំអីបើអ្នកបានកើតមកមានសម្រស់ធម្មជាតិស្រស់ស្អាតហើយ គួរតែអាណិតដល់ខ្ញុំដែលកើតមកមិនស្អាត ខំចំណាយលុយចំណាយពេលវេលា ជាពិសេសត្រូវឆ្លងកាត់មុខកាំបិតយ៉ាងឈឺចាប់ ដើម្បីអោយមានសម្រស់ស្រស់ស្អាតដូចស្រីដទៃទៀត។ នៅលើលោកនេះមនុស្សស្រីណាដែលថាមិនចង់ស្អាត??? ដូច្នេះបើអ្នកមានសម្រស់ស្រស់ស្អាតហើយសូមកុំដៀលអ្នកដទៃដែលមិនស្អាត!”។

ដេនីក្វាន់បានកែសម្ផស្សជាច្រើនកន្លែង ដើម្បីសម្រេចក្តីសុបិន ហើយថ្មីៗនេះ នាងទើបហោះទៅបរទេសដើម្បីកែសម្ផស្សម្ដងទៀត ឲ្យមានមុខមាត់កាន់តែដូចតារាថៃ Kwan Usamanee៕

រូបភាព៖ FB Denny Kwan

អត្ថបទ៖ លឹម សុនា