ក្រុមហ៊ុនបច្ចេកវិទ្យា ២០ មានតម្លៃ លក់ចេញថ្លៃបំផុតលើលោក

2018-06-20 03:07:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនបច្ចេកវិទ្យាកំពូលដូចជា Microsoft, Facebook, Google បានចំណាយលុយពាន់លានដុល្លារទិញយកក្រុមហ៊ុនដទៃមកចូលជាចំណុះរបស់ខ្លួន។ ខ្លះក្រោមមូលហេតុដើម្បីពង្រីកអាជីវកម្មរបស់ខ្លួនទៅថ្ងៃមុខ ឬចង់បិទចោលស្លាកយីហោគូប្រជែងនៅក្នុងទីផ្សារ។ ក្នុងនោះមានកិច្ចព្រមព្រៀងទិញយកទាំង ២០ ដែលថ្លៃចំណាយចាប់ពី ១ ទៅ ៣៤ ពាន់លានដុល្លារ។

២០.Facebook ទិញ Instagram តម្លៃ ១ ពាន់លានដុល្លារ:

ក្រុមហ៊ុន Facebook បានទិញបណ្តាញសង្គមចែករំលែករូបភាពនិងវីដេអូក្នុងតម្លៃ ១ ពាន់លានដុល្លារកាលពីខែមេសា ឆ្នាំ ២០១២។ ក្រោយកិច្ចព្រមព្រៀងធ្វើឡើងដោយជោគជ័យ ចំនួនអ្នកប្រើប្រាស់ IG បានកើន ២៣ ភាគរយ រហូតដល់ ៨០០ លាននាក់ ខណៈ Facebook បានត្រឹម ៣ ភាគរយ ប្រហែល ២,១ ពាន់លាននាក់ នេះផ្អែកតាមរបាយការណ៍ក្នុងឆ្នាំ ២០១៧។

១៩.Yahoo ទិញ Tumblr តម្លៃ ១,១ ពាន់លានដុល្លារ:

ជាបណ្តាញសង្គមមួយដែលស្ថិតក្រោមការគ្រប់គ្រងរបស់ Yahoo តាំងពីខែឧសភា ក្នុងឆ្នាំ ២០១៣ ពោលក៏ជាកិច្ចព្រមព្រៀងដ៏ធំបំផុតក្នុងប្រវត្តិសាស្រ្ត ស្ថិតក្រោមការគ្រប់គ្រងរបស់អ្នកស្រី Marissa Mayer។ គិតត្រឹមខែមករា ឆ្នាំ ២០១៨ Tumblr ជាប់ឈ្មោះជាបណ្តាញសង្គមពេញនិយមបំផុតលំដាប់ទី ៨។

១៨.Ebay ទិញ Paypal តម្លៃ ១,៥ ពាន់លានដុល្លារ:

នាខែមិថុនា ឆ្នាំ ២០០២ ក្រុមហ៊ុន Ebay មានសិទ្ធកាន់កាប់លើ PayPal ជាផ្លូវការ ដែលជាក្រុមហ៊ុនពាណិជ្ជកម្មអេឡិចត្រូនិកអន្តរជាតិ អនុញ្ញាតឲ្យផ្ញើលុយនិងទូទាត់ទំនិញលើប្រព័ន្ធអ៊ីនធឺណិត។ គិតត្រឹមឆ្នាំ ២០១៧ ថ្លៃទូទាត់សរុបកើនដល់ ៤៥០ ពាន់លានដុល្លារ ជាមួយនឹងចំណូលប្រចាំឆ្នាំទទួលបាន ១៣ ពាន់លានដុល្លារ។

១៧.Google ទិញ YouTube តម្លៃ ១,៦៥ ពាន់លានដុល្លារ:

ស្ថាបនិកលោក Steve Chen និង Chad Hurley បានសម្រេចលក់គេហទំព័រចែករំលែកវីដេអូឲ្យទៅ Google នាខែតុលា ឆ្នាំ ២០១៦។ គិតត្រឹមឆ្នាំ ២០១៨ មានអ្នកចូលទស្សនាប្រចាំខែប្រមាណ ១,៣ ពាន់លាននាក់ និង វីដេអូ ៣០០ ម៉ោងបង្ហោះចូលរៀងរាល់នាទី បន្សំការចុចទស្សនាលើវីដេអូជាង ៥ ពាន់លានរៀងរាល់ថ្ងៃ។

១៦.Dell ទិញ Quest Software តម្លៃ ២,៣៦ ពាន់លានដុល្លារ:

ជាក្រុមហ៊ុនដែលផ្គត់ផ្គង់ TOAD ផលិតផលប្រើដោយអ្នកអភិវឌ្ឍគ្រប់គ្រងប្រព័ន្ធទិន្នន័យ មុនដល់ថ្ងៃទី ២ កក្កដា ឆ្នាំ ២០១២ ក្រុមហ៊ុន Dell បានប្រកាសទិញយក។

១៥.Microsoft ទិញ Minecraft តម្លៃ ២,៥ ពាន់លានដុល្លារ:

ក្រុមហ៊ុនផលិតហ្គេមរបស់ស៊ុយអែតឲ្យឈ្មោះ Mojang បានជោគជ័យលើហ្គេម Minecraft រហូតត្រូវក្រុមហ៊ុនយក្សអាមេរិកហ៊ានជះលុយដុំទិញយកកាលពីថ្ងៃទី ១៥ កញ្ញា ឆ្នាំ ២០១៤។

១៤.Google ទិញ Nest Labs តម្លៃ ៣,២ ពាន់លានដុល្លារ:

ជាក្រុមហ៊ុនផលិតឧបករណ៍ស្វ័យប្រវត្តិក្នុងគេហដ្ឋាន មានស្ថាបនិកលោក Tony Fadell ដែលធ្លាប់ជាអ្នកផ្តួចផ្តើមជួយ Apple ផលិតបាន iPod។

១៣.Verizon ទិញ Yahoo តម្លៃ ៤,៨ ពាន់លានដុល្លារ:

ក្រៅពីសេវាកម្ម Search Engine ក្រុមហ៊ុន Yahoo ក៏ពង្រីកអាជីវកម្មរបស់ខ្លួនទៅក្នុងវិស័យដទៃទៀត ពោលគឺថ្វីបើ Verizon ទិញយកក្រុមហ៊ុនយក្សអ៊ីនធឺណិតនេះក្តី ប៉ុន្តែម្ចាស់ហ៊ុនក៏នៅមានសិទ្ធវិនិយោគក្នុងវិស័យពាណិជ្ជកម្មអេឡិចត្រូនិករបស់ចិន Alibaba និង Yahoo Japan។

១២.Microsoft ទិញ Nokia តម្លៃ ៧,២ ពាន់លានដុល្លារ:

ក្រោយបាត់បង់ទំនុកចិត្តនិងតួលេខលក់ចេញស្មាតហ្វូន ក្រុមហ៊ុន Nokia ក៏សម្រេចបើកផ្លូវឲ្យ Microsoft ចូលគ្រប់គ្រងអាជីវកម្មខ្លួនបន្ត ប៉ុន្តែមិនបានប៉ុន្មានផង ក៏ត្រូវបរាជ័យសារជាថ្មី។

១១.Oracle ទិញ Sun Microsystems តម្លៃ ៧,៤ ពាន់លានដុល្លារ:

ជាអ្នកផ្តួចផ្តើមបង្កើតឡើងនូវភាសា Java ធ្វើឲ្យ Oracle ហ៊ានបោះលុយទាំងដុំទិញយកក្រុមហ៊ុន Sun Microsystems ដើម្បីបញ្ចៀសឲ្យនៅឆ្ងាយពីក្រុមហ៊ុន IBM។

១០.Microsoft ទិញ GitHub តម្លៃ ៧,៥ ពាន់លានដុល្លារ:

នាថ្ងៃទី ៤ មិថុនា ២០១៨ ក្រុមហ៊ុន Microsoft បានប្រកាសជាផ្លូវការជុំវិញការទិញយក GitHub ។ ហេតុផលក៏ដោយសារនាឆ្នាំ ២០១៧ ក្រុមហ៊ុនយក្សអាមេរិកធ្លាប់បិទចោលគូប្រជែង Codeplex ម្តងរួចមកហើយ មួយផ្សេងទៀតអ្នកអភិវឌ្ឍកម្មវិធីរាប់ពាន់នាក់នៃក្រុមហ៊ុនខ្លួនបានផ្ទុកកូដយ៉ាងសកម្មទៅក្នុងសេវាកម្មគ្រប់គ្រងកូដរបស់ GitHub។

៩.Microsoft ទិញ Skype តម្លៃ ៨,៥ ពាន់លានដុល្លារ:

សេវាកម្មផ្ញើសារនិងទាក់ទងតាមរយៈសំឡេងលើប្រព័ន្ធអ៊ីនធឺណិតត្រូវបានលក់ឲ្យ eBay នាឆ្នាំ ២០០៥ ក្នុងតម្លៃ ៣,១ ពាន់លានដុល្លារ ហើយលក់បន្តទៅឲ្យវិនិយោគិនឯកជនប្រមាណ ៤០ ភាគរយ ទើប Microsoft សម្រេចទិញបន្តនាខែឧសភា ឆ្នាំ ២០១១ ក្នុងតម្លៃឡើងដល់ ៨,៥ ពាន់លានដុល្លារ ក្រោយមកកម្មវិធី Sykpe រមែងលោតមានដោយស្វ័យប្រវត្តិក្នុងប្រព័ន្ធប្រតិបត្តិ Windows។

៨.Hewlett-Packard ទិញ Autonomy តម្លៃ ១០,២៤ ពាន់លានដុល្លារ:

នាខែសីហា ឆ្នាំ ២០១១ ក្រុមហ៊ុន HP បានទិញយក Autonomy ប៉ុន្តែដោយផ្ទុះរឿងអាស្រូវផ្នែកគណនេយ្យក្រោមភាពបរាជ័យមិនអាចសម្រេចគោលដៅចំណូល លោក Leo Apotheker និងនាយកប្រតិបត្តិ Mike Lynch ត្រូវបានបញ្ឈប់ពីមុខតំណែង។

៧.Google ទិញ Motorola Mobility តម្លៃ ១២,៥ ពាន់លានដុល្លារ:

ក្នុងគោលដៅប្រជែងទីផ្សារស្មាតហ្វូនជាមួយក្រុមហ៊ុន Apple ខ្លួនក៏សម្រេចជះលុយ ១២,៥ ពាន់លានដុល្លារទិញអាជីវកម្ម Motorola Mobility។ តិចជាង ៣ ឆ្នាំ ក្រុមហ៊ុនក៏លក់បន្តឲ្យទៅ Lenovo (មាន ២០០០ ប៉ាតង់) ក្នុងតម្លៃ ២,៩១ ពាន់លានដុល្លារ។

៦.Amazon ទិញ Whole Foods តម្លៃ ១៣,៧ ពាន់លានដុល្លារ:

ក្រុមហ៊ុនលក់ចំណីអាហារ Whole Foods បានទទួលលុយសុទ្ធ ១៣,៧ ពាន់លានដុល្លារពីក្រុមហ៊ុន Amazon ក្រោយកិច្ចព្រមព្រៀងត្រូវបញ្ចប់នាខែសីហា ឆ្នាំ ២០១៧ ហើយក្នុងមួយភាគហ៊ុនគ្រានោះថ្លៃ ៤២ ដុល្លារ។

៥.Walmart ទិញ Flipkart តម្លៃ ១៦ ពាន់លានដុល្លារ:

ក្រុមហ៊ុនពាណិជ្ជកម្មអេឡិចត្រូនិកធំបំផុតរបស់ឥណ្ឌា បានលក់ចេញទៅឲ្យ Walmart កាលពីថ្ងៃទី ៩ ឧសភា ឆ្នាំ ២០១៨ ក្នុងភាគហ៊ុន ៧៧ ភាគរយស្មើនឹងតម្លៃ ១៦ ពាន់លានដុល្លារ។ ក្នុងគោលដៅផ្តួល Amazon India ចាប់តាំងក្រុមហ៊ុនអាមេរិកបានប្រលូកចូលទីផ្សារយក្សមួយនោះ។

៤.Facebook ទិញ WhatsApp តម្លៃ ១៩ ពាន់លានដុល្លារ:

ដោយសង្កេតឃើញគូប្រជែងនៃសេវាកម្មដទៃ (WhatsApp) ជះឥទ្ធិពលដល់ទំហំអ្នកប្រើប្រាស់របស់ខ្លួន Facebook ក៏សម្រេចចាយលុយ ១៩ ពាន់លានដុល្លារទិញសេវាកម្មផ្ញើសាររហ័សរកឃើញដោយលោក Brian Acton និង Jan Koum។ ក្រោយកិច្ចព្រមព្រៀងបញ្ចប់ កម្មវិធីប្រើ Chat មានដូច Telegram ឡើងការទាញយក ៥ លានដងក្នុងមួយថ្ងៃ ខណៈ WhatsApp ត្រូវបាត់បង់អ្នកប្រើប្រាស់គ្រានោះជាង ១ លាននាក់ ប៉ុន្តែដោយជោគជ័យរួមជាមួយក្រុមហ៊ុនលោក Mark កម្មវិធីនេះក៏ទទួលបានអ្នកប្រើរហូតដល់ ១,៥ ពាន់លាននាក់ទល់ពេលបច្ចុប្បន្ន។

៣.Hewlett-Packard ទិញ Compaq តម្លៃ ២៥ ពាន់លានដុល្លារ:

រកឃើញក្នុងឆ្នាំ ១៩៨២ Compaq ជាក្រុមហ៊ុនលក់ផលិតផលកុំព្យូទ័រ ដោយអំឡុងទសវត្សរ៍ឆ្នាំ ១៩៩០ ក្រុមហ៊ុននេះក្លាយជាអ្នកផ្គត់ផ្គង់ប្រព័ន្ធ PC ធំបំផុតក្នុងលោក។ លុះដល់ថ្ងៃទី ៣ កញ្ញា ឆ្នាំ ២០០១ ក៏ត្រូវបានក្រុមហ៊ុន HP ទិញយកដើម្បីផ្តួល IBM ក្នុងតម្លៃ ២៥ ពាន់លានដុល្លារ។

២.Microsoft ទិញ LinkedIn តម្លៃ ២៦,២ ពាន់លានដុល្លារ:

ជាបណ្តាញសង្គមមានអ្នកប្រើប្រាស់ប្រមាណ ៤០០ លាននាក់ លុះក្នុងខែមិថុនា ឆ្នាំ ២០១៦ ត្រូវបានក្រុមហ៊ុន Microsoft ទិញយក ទាំងដែលលោក Jeff Weiner នៅបន្តកាន់តំណែងជា CEO ហើយក៏ជាអ្នកធ្វើរបាយការណ៍ឲ្យទៅ CEO ក្រុមហ៊ុនមេលោក Satya Nadella។

១.CenturyLink ទិញ Level 3 Communications តម្លៃ ៣៤ ពាន់លានដុល្លារ:

ក្រុមហ៊ុនផ្គត់ផ្គង់ប្រព័ន្ធទូរគមនាគមន៍ធំបំផុតលំដាប់ទី ៣ នៅសហរដ្ឋអាមេរិក CenturyLink បានទិញក្រុមហ៊ុនផ្គត់ផ្គង់សេវាកម្មអ៊ីនធឺណិត Level 3 Communication តាមរយៈលុយសុទ្ធនិងភាគហ៊ុនក្នុងតម្លៃ ៣៤ ពាន់លានដុល្លារ។ ដើម្បីពង្រឹងការប្រកួតប្រជែងលើទីផ្សាររវាងក្រុមហ៊ុនខ្លាំងមានដូចជា Verizon និង AT&T។