គម្រោងផ្សារទំនើបអ៊ីអន៣ មានពន្លឺថ្មី តែរង់ចាំកែលម្អផ្សារដែលសង់រួចសិន
- 2018-06-20 08:34:51
- ចំនួនមតិ 0 | ចំនួនចែករំលែក 0
គម្រោងផ្សារទំនើបអ៊ីអន៣ មានពន្លឺថ្មី តែរង់ចាំកែលម្អផ្សារដែលសង់រួចសិន
ចន្លោះមិនឃើញ
ជុំវិញគម្រោងផ្សារទី៣នេះ សារព័ត៌មានក្នុងស្រុកមួយចំនួន បានចេញផ្សាយដោយស្រង់សម្ដីពីអ្នកជំនួញក្នុងវិស័យអចលនទ្រព្យ អះអាងថា ក្រុមហ៊ុនជប៉ុន បានទិញដី និងគ្រោងសាងសង់ផ្សារទំនើបអ៊ីអន៣ នៅតំបន់ភាគខាងត្បូង ពោលគឺតាមមហាវិថីសម្ដេចហ៊ុន សែន ផ្លូវ ៦០ម៉ែត្រ។
ឆ្លើយតបដំណឹងនេះ លោក SEIICHI CHIBA អគ្គនាយកគ្រប់គ្រងជាន់ខ្ពស់នៃក្រុមហ៊ុន AEON Mall Co.,Ldt បានប្រាប់អ្នកសារព័ត៌មានក្នុងសន្និសីទសម្ពោធជាផ្លូវការផ្សារទំនើបទី២ នៅខណ្ឌសែនសុខ នៅថ្ងៃទី ២០ មិថុនា ឆ្នាំ ២០១៨ ថា ក្រុមហ៊ុនមានគម្រោងសាងសង់ផ្សារទំនើបទី៣ ពិតមែនប៉ុន្តែគម្រោងនេះមិនទាន់មានរូបរាង និងទីតាំងច្បាស់លាស់នៅឡើយ ដោយរង់ចាំគម្រោងផ្សារចំនួនពីរដែលបានបើកសព្វថ្ងៃដំណើរការឲ្យរលូនសិន។
លោក SEIICHI CHIBA ថ្លែងថា៖ « យើងមានផ្សារទំនើបចំនួនពីររួចហើយ យើងត្រូវការកែលម្អ និងស្វែងរកបទពិសោធន៍ថ្មីៗពីអតិថិជនបន្ថែមទៀត ទើបយើងឈានដល់គម្រោងទី៣»។
ភ្ជាប់នឹងមហិច្ឆតារបស់អ្នកវិនិយោគជប៉ុនមួយនេះ ក្រុមហ៊ុនអ៊ីអននៅតែសង្ឃឹមខ្ពស់ថា ផ្សារទំនើបទី២ គឺធំ និងពិសេសជាងគេនៅក្នុងតំបន់អាស៊ាន ដែលនឹងអាចទាក់ទាញអតិថិជនច្រើនជាងទី១។ លោកឲ្យដឹងថា កាលពីឆ្នាំ២០១៧ ផ្សារអ៊ីអន១ បានស្រូបមនុស្សទាំងក្នុង និងក្រៅស្រុកប្រមាណ ១៨ លាននាក់លើសការរំពឹងទុក ក្នុងនោះនៅថ្ងៃធម្មតា មានអតិថិជនជាង ៣ម៉ឺននាក់ និងថ្ងៃបុណ្យទាន ឬឈប់សម្រាកមានប្រមាណ ៨ម៉ឺននាក់ ក្នុងមួយថ្ងៃ។
ចំពោះផ្សារជប៉ុនទើបសម្ពោធថ្មីនេះ គឺគ្របដណ្ដប់លើទំហំផ្ទៃដីសរុបប្រមាណជាង ១០០ ០០០ម៉ែត្រការ៉េ ខណៈដែលគម្រោងទី១ មានទំហំត្រឹមតែ ៦៨ ០០០ ម៉ែត្រការ៉េ។ ផ្សារទី២នេះ មានចំណតសម្រាប់រថយន្ត ២ ៣០០គ្រឿង និង ម៉ូតូ៣ ០០០គ្រឿង និងមានហាងទំនិញសរុបជាង ២០០ហាង។
លោកលើកឡើងថា តាមការសិក្សាចំណូលខ្ពស់អ្នកនៅក្រុងភ្នំពេញឡើងដល់១ម៉ឺនដុល្លារ ក្នុង១ឆ្នាំ ប្រហាក់ប្រហែលពលរដ្ឋនៅតាមបណ្ដាប្រទេសអាស៊ានផងដែរ។
ទោះយ៉ាងណា អ្នកជំនួញជនជាតិជប៉ុនរូបនេះ ក៏បង្ហើបដែរថា អ្នកវិនិយោគជប៉ុនជាច្រើន ចាប់អារម្មណ៍មករកស៊ីនៅកម្ពុជា តែការកង្វះព័ត៌មាននៅតែជាបញ្ហាសម្រាប់ពូកគេមកវិនិយោគនៅក្នុងប្រទេសមួយនេះ៕