មានអ្វីពិសេស ផ្ទាំង និងបណ្តាញផ្សព្វផ្សាយធំៗនាំគ្នានិយាយពីរឿង "បាតដៃខ្មៅ"? (វីដេអូ)

2018-06-22 09:29:41
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅសល់ពេលមិនដល់១សប្តាហ៍ទៀតទេ ខ្សែភាពយន្តខ្នាតធំរឿង "បាតដៃខ្មៅ" នឹងដាក់បញ្ចាំងនៅគ្រប់រោងភាពយន្តហើយ គឺថ្ងៃទី២៨ ខែកក្កដា ខាងមុខនេះ។ មិនថាតាមរយៈបណ្តាញផ្សព្វផ្សាយព័ត៌មានកម្សាន្តតូចធំក្នុងស្រុក នៅតាមរោងកុន ឬទីសាធារណៈ សង្កេតឃើញមានការផ្សព្វផ្សាយច្រើនអំពីរឿងដែលដកស្រង់ចេញប្រលោមលោកដ៏ល្បីដែលមានអ្នកអានរាប់លាននាក់មួយនេះ។

តើភាពយន្តខ្នាតធំ "បាតដៃខ្មៅ" មានចំណុចពិសេសអ្វីខ្លះ ទើបលេចធ្លោក្នុងបណ្តាញផ្សព្វផ្សាយបែបនេះ?

បើតាមអ្នកដឹកនាំរឿង លោក មាស រស្មី "បាតដៃខ្មៅ" ជារឿងខ្នាតធំទីមួយក្នុងអាជីពការងារជិត១០ឆ្នាំរបស់លោក។ លោកបានចំណាយពេលជាងមួយភាគបីនៃគម្រោងទៅលើការសរសេរអត្ថបទរឿង ដោយត្រូវសម្រួលពីប្រលោមលោកដែលសរសេរសម្រាប់ការស្រមៃ មកជាអត្ថបទរឿងដែលសរសេរសម្រាប់ការថតជារូបភាព និងសំឡេង។ មិនតែប៉ុណ្ណោះលោកក៏បានចំណាយពេលចុះទៅដល់ខេត្តដែលសាច់រឿងដើមបាននិយាយ ដូចជាតាកែវ ស្ទឹងត្រែងជាដើម។

លោកថា "បាតដៃខ្មៅ" នេះមិនមែនត្រឹមតែជារឿងខ្នាតធំទីមួយរបស់លោកប៉ុណ្ណោះទេ វាជារឿងខ្នាតធំទីមួយរបស់តួអង្គយុវវ័យដូចគ្នា! ដូច្នេះអ្នកដែលពាក់ព័ន្ធនឹងការងារនេះខិតខំសម្រិតសម្រាំងអស់ពីសមត្ថភាព។ "ខ្ញុំគិតថារឿងនេះគឺស័ក្តិឥតខ្ចោះទៅនឹងបរិបទសង្គមបច្ចុប្បន្ន ដែលបង្ហាញពីភាពរកាំរកូសមួយចំនួនរវាងយុវវ័យសម័យថ្មី និងវប្បធម៌បុរាណខ្មែរ"។

បទសម្ភាសន៍ជាមួយលោក មាស រស្មី អ្នកដឹកនាំរឿង "បាតដៃខ្មៅ"

ក្នុងបទសម្ភាសន៍ជាមួយទូរទស្សន៍ក្នុងស្រុកកាលពីពេលថ្មីៗនេះ លោក ជី សិលា នាយកប្រតិបត្តិក្រុមហ៊ុន Sabay ដែលអ្នកវិនិយោគក្នុងការផលិតរឿងនេះ បញ្ជាក់ថា "បាតដៃខ្មៅ" ជាភាពយន្តថ្មីប្លែកខុសពីអ្វីដែលមាននៅលើទីផ្សារភាពយន្តខ្មែរបច្ចុប្បន្ន វាជាភាពយន្តមានខ្លឹមសារបណ្ដុះគំនិតយុវវ័យអោយចេះកំណត់គោលដៅជីវិត របៀបដែលត្រូវដើរ និងអ្វីដែលពួកគេត្រូវធ្វើក្រោយបញ្ចប់ការសិក្សា។ លោកថា ការវិនិយោគទៅលើវ័យជំទង់ គឺជាការវិនិយោគដ៏ល្អមួយដោយសារពួកគេមានគំនិតច្នៃប្រឌិតខ្ពស់ មានទេពកោសល្យ ហើយមោះមុតនឹងការងារ។

លោក ជី សិលា នាយកប្រតិបត្តិក្រុមហ៊ុន Sabay

មិនត្រឹមតែប៉ុណ្ណឹងទេ អ្វីដែលពិសេស និងខុសប្លែកពីរឿងដទៃនោះ ស្នាដៃភាពយន្តថ្មីនេះ ប្រមូលម្តុំដោយតារាOriginal Song ល្បីៗ ដូច Sai ខាំ ជេន ម៉ានិត ជន រតនៈ រួមទាំង ចែ ឡេង និងយុជនវ័យក្មេង ហេង ចន្ទតារាវិត។ ពួកគេមិនត្រឹមតែមានទេពកោសល្យខាងចម្រៀងប៉ុណ្ណោះទេ តែសមត្ថភាពសម្តែងក៏រស់រវើក ស៊ីនឹងសាច់រឿងដ៏ល្អបែបយុវវ័យមួយនេះ។

អ្វីដែលមិនអាចរំលង ថែមទាំងជួយរំលេចផ្ទៃរឿងទាំងមូលឲ្យកាន់តែល្អនោះ គឺបទចម្រៀង ដែលប្រកបដោយអត្ថន័យ និងមនោសញ្ចេតនាជ្រាលជ្រៅរបស់យុវវ័យ ដែលបទនេះមានចំណងជើងថា "មិនព្រាត់"។ ចម្រៀងថ្មីនេះជាស្នាដៃនិពន្ធទំនុកដោយអ្នកនិពន្ធរឿងនេះផ្ទាល់ គឺអ្នកស្រី ម៉ីសន សុធារី ហើយអ្នកបង្កើតសាច់ភ្លេងជាតន្រ្តីករដ៏មានទេពកោសល្យ លោក កង ពិសិដ្ឋ និងច្រៀងដោយ តារាចម្រៀង សាយ និង ខាំ ជេន ដែលជាតួសំខាន់ក្នុងរឿង «បាតដៃខ្មៅ»។

អ្នកនិពន្ធ ម៉ីសន សុធារី

បើតាមអ្នកនិពន្ធបទចម្រៀងនេះ «មិនព្រាត់» ជាចម្រៀងដែលបង្ហាញពីមិត្តភាពរបស់ក្រុមតន្រ្តីក្មេងវ័យមួយក្រុម លាយឡំមនោសញ្ចេតនាជ្រាលជ្រៅ។ បទនេះត្រូវបានលោក កង ពិសិដ្ឋ រៀបចំសាច់ភ្លេងដោយយកចិត្តទុកដាក់ និងក្តីស្រលាញ់លើសលុប ព្រោះជាស្នាដៃរួមបញ្ចូលគ្នាជាមួយអ្នកមានទេពកោសល្យ។

ងាកមកតួអង្គដ៏សំខាន់ម្នាក់ក្នុងរឿងនេះ Sai សម្តែងតួ រ៉ាយុទ្ធ បានឱ្យដឹងថា ភាពយន្តថ្មីនេះបង្កើតឡើងដោយក្តីស្រលាញ់ភាពយន្ត ហើយគ្រប់គ្នាដែលផលិតរឿងនេះ សង្ឃឹមថានឹងមានការគាំទ្រច្រើន។ Sai បន្តថា នេះជារឿងខ្នាតធំមួយដែលមានទាំងសារអប់រំ និងមានចំណុចបត់បែនច្រើន ដែលទស្សនិកជនទៅទស្សនាមិនស្តាយលុយឡើយ។

វីដេអូចម្រៀង "មិនព្រាត់"

ទាំងនេះគ្រាន់តែជាលក្ខណៈពិសេសត្រួសៗរបស់ភាពយន្តខ្មែររឿង «បាតដៃខ្មៅ» តែប៉ុណ្ណោះ នៅមានចំណុចលេចធ្លោជាច្រើនទៀត ដែលអ្នកនិពន្ធ និងដឹកនាំរឿងមិនអាចបង្ហាញបានច្រើនជាងនេះ ព្រោះវាអាចប៉ះពាល់ដល់សាច់រឿងទាំងមូល។

បើសិនជាចង់ជ្រាបច្បាស់ពីសាច់រឿងមួយនេះ និងគាំទ្រដល់ភាពយន្តខ្មែរ ប្រិយមិត្តកុំភ្លេចទៅទស្សនារឿង «បាតដៃខ្មៅ» ដែលនឹងចាក់បញ្ចាំងនៅគ្រប់រោងភាពយន្ត ចាប់ពីថ្ងៃទី២៨ ខែមិថុនានេះតទៅ៕

ទស្សនា Trailder រឿង "បាតដៃខ្មៅ"

អត្ថបទ៖ ដេត ធន្នី