ទីបំផុត ឃាតកបាញ់សម្លាប់ XXXTentacion ត្រូវបានចាប់ខ្លួន
- 2018-06-23 03:25:08
- ចំនួនមតិ 0 | ចំនួនចែករំលែក 0
ទីបំផុត ឃាតកបាញ់សម្លាប់ XXXTentacion ត្រូវបានចាប់ខ្លួន
ចន្លោះមិនឃើញ
ជនសង្ស័យដែលបានបាញ់សម្លាប់តារារ៉េបដ៏ល្បី XXXTentacion ត្រូវបានឃាត់ខ្លួន និងបញ្ជូនទៅតុលាការហើយកាលពីថ្ងៃទី ២១ ខែមិថុនា ឆ្នាំ២០១៨នេះ។
ជនសង្ស័យនោះមានឈ្មោះ Dedrick D.Williams អាយុ ២២ឆ្នាំ មានមុខរបរជាអ្នកចាក់សាក់។ បើតាមប៉ូលិសបានឲ្យដឹងថា នេះមិនមែនជាករណីទី១នោះទេ ដែលជនរូបនេះបានប្រព្រឹត្តបទល្មើសនោះ កាលពីឆ្នាំ ២០១៤ ជនសង្ស័យរូបនេះ បានជាប់ចោទលើករណីមួយផ្សេងទៀត ហើយនឹងត្រូវឡើងតុលាការសាជាថ្មីនៅថ្ងៃច័ន្ទនេះពាក់ព័ន្ធនឹងករណីនោះ។
ជនសង្ស័យឈ្មោះ Dedrick D.Williams ត្រូវបានចាប់ខ្លួនកាលពីថ្ងៃទី ២០ ក្នុងភាគខាងត្បូងនៃរដ្ឋFlorida និងត្រូវដាក់ទោសឲ្យជាប់ពន្ធនាគារតាមច្បាប់ឃាតកម្មកម្រិត១។ ពីមុន លោកក៏ធ្លាប់បានឃាត់ខ្លួនពាក់ព័ន្ធនឹងការប្រើថ្នាំកូកាអ៊ីន ការប្រើប្រាស់កាំភ្លើង បង្កហិង្សាក្នុងគ្រួសារ និងការប្លន់ផងដែរ។
មួយវិញទៀត ក្រុមប៉ូលិសក៏បានដាក់ការសង្ស័យលើជន២រូបទៀតដែលអាចនឹងពាក់ព័ន្ធលើករណីបាញ់សម្លាប់តារារ៉េប XXXTentacion ។ ខាងក្រុមតុលាការក៏បានចេញលិខិតតាមចាប់ជនទាំង២រូបនោះផងដែរ ប៉ុន្តែនៅមិនទាន់រកឃើញនៅឡើយទេ។
តារាចម្រៀងរ៉េបដ៏ល្បី XXXTentacion ដែលមានឈ្មោះពិតប្រាកដថា Jahseh Onfroy មានអាយុទើបតែ ២០ឆ្នាំប៉ុណ្ណោះ។ លោកត្រូវបាន ឃាតកបាញ់សម្លាប់ពេលថ្ងៃត្រង់កាលពីថ្ងៃទី ១៨ ខែមិថុនា ខណៈលោកអង្គុយក្នុងឡានរបស់លោកដែលបានថតមុខហាងលក់ម៉ូតូមួយកន្លែង។ បើតាមប៉ូលិសឆែកមើលគ្រប់កាមេរ៉ាសុវត្ថិភាព ពួកគេបានអះអាងថានេះជាករណីប្លន់សម្លាប់ ព្រោះជនសង្ស័យបានលួចយកកាបូបម៉ាក Louis Vuitton របស់លោកទៅបាត់៕