ស្ត្រីខ្មែរតែ១គត់ បោះបង់ជំនាញការងារក្រៅប្រទេស រត់មករកស៊ីច្នៃម៉ូតចង្កៀងលក់ (វីដេអូ)

2018-06-25 04:06:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីអ្នកជំនួញវ័យក្មេង អ្នកនាង រី ថានី ដែលចាប់របរច្នៃម៉ូតចង្កៀងលក់ដំបូងគេនៅខេត្តសៀមរាប បានពង្រីកខ្លួនជាសិប្បកម្មធំមួយឈ្មោះថា Norea Decor Product មានលក់ផលិតផលគ្រឿងបរិក្ខារជាច្រើនប្រភេទ ចង្កៀង អំពូល ខ្នើយ វាំងនន គ្រឿងសាឡុង ផលិតដោយដៃ សម្រាប់តុបតែងផ្ទះ សណ្ឋាគារ ភោជនីយដ្ឋាន និងបន្ទប់គ្រប់ប្រភេទ ទាំងបែបបុរាណ និងសម័យ។

អ្នកនាង រី ថានី

នៅពីក្រោយភាពជោគជ័យថ្ងៃនេះ ថានី ក៏មានខ្សែជីវិតកម្សត់ទាំងវ័យក្មេង ដែលត្រូវបាត់បង់ម្ដាយ ត្រូវដើររកលុយដើម្បីរៀន និងតស៊ូជម្នះពាក្យប្រមាថទាំងទឹកភ្នែក។ តទៅនេះ សូមតាមប្រវត្តិសង្ខេបខ្លះៗ អ្នកនាង រី ថានី បានពុះពាររហូតចាប់ផ្ដើមអាជីវកម្មមួយអាចជួយលើកជីវភាពស្ត្រីមេផ្ទះ និងយុវជនពេញកម្លាំងដែលផ្នែកសំខាន់មួយក្នុងសសរស្ដម្ភសេដ្ឋកិច្ច។

ជាស្ត្រីខ្មែរតែមួយគត់ ជាប់ជាបុគ្គលធ្វើការក្រុមហ៊ុនលំដាប់នៅក្រៅប្រទេស

ទាក់ទិននឹងការសិក្សាថ្នាក់បរិញ្ញាបត្រ ថានី ជាសិស្សឆ្នើមប្រចាំសាលា ថែមទាំងមានឱកាសបានធ្វើការនៅប្រទេសម៉ាឡេស៊ីដែលជាប់ជាបុគ្គលិកស្រីផ្នែកទីផ្សារតែម្នាក់គត់រើសពីកម្ពុជាក្នុងការប្រកួតប្រជែងកម្មវិធីជ្រើសរើសលំដាប់ថ្នាក់អន្តរជាតិរបស់ AIESEC ខណៈប្រទេសទាំង៩ទៀតក្នុងតំបន់អាស៊ាន សុទ្ធតែជាមនុស្សប្រុស។

ការងារស្រុកគេមិនស្រួលដូចគិតនោះឡើយ គ្រាន់តែទៅដល់ថ្ងៃទី១ភ្លាមត្រូវគេដៀលថា «មនុស្សស្រីធ្វើអីកើត... គេស្ដីឲ្យខ្ញុំចំៗនៅមុខអ្នកដទៃ»។ សម្ដីមើលងាយក្លាយជាគំនុំឲ្យថានីខំប្រឹងទាល់តែការងារជោគជ័យក្នុងចំណោមមនុស្សប្រុសមកពីប្រទេសផ្សេងៗ។ អាចនិយាយបានថាការងារនេះមានភាពជូរចត់ តែមានតម្លៃអស្ចារ្យដល់ថានី ព្រោះមានទាំងបទពិសោធការងារយ៉ាងក្រាស់ក្រែល និងយល់បែបផែននៃការទំនាក់ទំនងជាមួយមនុស្សនៅតាមបណ្ដាប្រទេសផ្សេងៗកាន់តែជ្រៅ។

ចាប់របរខុសពីជំនាញដែលខ្លួនមាន

រយៈពេលមួយឆ្នាំ ត្រូវបញ្ចប់កុងត្រាការងារ ថានីត្រឡប់មកទឹកដីកម្ពុជាវិញ និងនាំយកជំនាញខ្លួនដើម្បីធ្វើការនៅក្រុមហ៊ុនលំដាប់ៗ ចិញ្ចឹមជីវិតបន្ត។ អ្វីដែលធ្លាប់គិតបែរជាប្រែប្រួល ថានី ស្រាប់តែបោះការងារចំណូលខ្ពស់ចោល ហើយមកងាកចាប់របរធ្វើចង្កៀងលក់ ខុសជំនាញដែលខ្លួនមាន និងបានសិក្សាទាំងស្រុង។

ទីតាំងលក់គ្រឿងសង្ហារឹម ខេត្តសៀមរាប

កាលគ្រានោះ ថានីដើរលេងនៅខេត្តសៀមរាប ស្រាប់តែដក់ចិត្តនឹងភ្លើងចង្កៀងភ្ជួរនៅផ្សាររាត្រី ហើយការទាញប៊ិចមកគូរច្នៃម៉ូតលេង រហូតសុំមិត្តភក្តិឲ្យជួយទិញស្នាដៃដំបូងរបស់ខ្លួន។ យុវតីកាត់៤ សាសន៍រូបនេះហាក់ជាប់ចិត្តនឹងរបរធ្វើចង្កៀង និងមានដុងរកស៊ីពីកំណើតផងនោះ ក៏ហ៊ានដាច់ចិត្តយកប្រាក់ខែដែលសន្សំទុកមក គួបផ្សំនឹងជំនាញកន្លង ក៏សម្រេចដើរលើវិថីជំនួញនៅខេត្តសៀមរាប ដោយសម្លឹងឃើញពីសក្ដានុពលតំបន់ទេសចរណ៍ និងអតិថិជនជាភ្ញៀវជាតិ និងបរទេសស្រាប់ផងដែរ។

អ្នកនាង ថានី និងកូនស្រីនៅកណ្ដាល និងបុគ្គលិក

មិនតែប៉ុណ្ណោះ របរមួយនេះ មិនត្រឹមតែជាក្ដីការស្រឡាញ់របស់អ្នកនាងឡើយ ថែមទាំងអាចជួយស្ត្រីមេផ្ទះអាចរកចំណូលបន្ថែម និងយុវជនពេញកម្លាំងកុំឲ្យចំណាកស្រុកធ្វើការនៅស្រុកគេទៀតផង។

មូលហេតុមួយទៀតដោយសារតែអ្នកនាងជាកូនអ្នកភ្នំពេញ ពូកែវោហារសព្ទចាក់ទឹកលិចតាំងតែពីតូច។ កាលអាយុ ៥ឆ្នាំ ថានី ចូលចិត្តជួយម្ដាយរកស៊ីស្ទើរគ្រប់មុខរបរ អ្វីដែលពិសេសនោះ អ្នកនាងចេះធ្វើ Marketing (ទីផ្សារ) តាំងនៅក្មេងខ្ចី ដែលគ្រានោះ ថានី ជាអ្នកលក់សាំងតាមផ្ទះ តែដោយចង់លក់ដាច់ ក៏នឹកឃើញវិធីសាស្ត្រមួយ គឺចាក់សាំងថែមផ្លែកន្ទួត។ ពេលនោះ ថានី និយាយថា៖ «បើពូចាក់សាំងខ្ញុំ ២លីត្រ ខ្ញុំនឹង Free ឲ្យកន្ទួតកន្លះកំប៉ុង» ហើយភ្ញៀវក៏ចាក់ដល់ទៅ២លីត្រមែន ដែលរឿងនេះបានចាក់ដោតកុមារីនេះ រហូតបច្ចុប្បន្នក្លាយសហគ្រិនវ័យក្មេងមួយរូបរបស់កម្ពុជា។

បរាជ័យ ១០ដង មិនរុញរា តែនៅខ្លាចរឿង២យ៉ាង

ដូចលោកអ្នកដឹងស្រាប់ផងដែរ ការរកស៊ីមានឡើងមានចុះ ឯថានីដែលទើបប្រឡូកដំបូងក្នុងវ័យ ២២ឆ្នាំ ជួបឧបសគ្គអស់លុយពីខ្លួន និងផ្ដើមមានគំនិតបោះបង់របរនេះ តែក៏សួរខ្លួនឯងថា៖ «បើបោះបង់ តើបុគ្គលិកប៉ុន្មាននាក់ ដែលបានបង្វឹកឲ្យមានជំនាញនោះ នឹងទៅជាយ៉ាងណា? … ខ្ញុំសម្រេចចិត្តបន្ត បើទោះសល់ ប្រាក់ត្រឹមតែ ៤០០០រៀលសម្រាប់ញាំបាយក៏ដោយ»។

ទម្រាំឈរជើងមកទល់សព្វថ្ងៃនេះ សហគ្រិនវ័យ ២៨ឆ្នាំ បានហែរឆ្លងបញ្ហាបរាជ័យក្នុងការរកស៊ី មិនក្រោម ១០ដងឡើយ ហើយដើរដល់ចំណុចនេះ ថានីលែងមានគំនិតចុះចាញ់ដូចមុន ថែមទាំងមានចិត្តតស៊ូទ្វេដង។ ទោះបែបណាក្ដី ភាពភ័យខ្លាច ក្នុងនាមជាអ្នករកស៊ីនៅតែមាន តួយ៉ាងបញ្ហាធនធានមនុស្ស និងដើមទុន ។ ចង់ដឹងថា សហគ្រិនស្រ្តី ដាក់ថ្នាំអ្វី ដើម្បីបំបាត់ភាពភ័យនូវបញ្ហាស្នូលក្នុងការអាជីវកម្ម សួមតាមដានវីដេអូខាងក្រោមនេះ៖