McGregor បង្ហោះវីដេអូបង្អួតស្បែកជើងថ្លៃៗខ្លួន គិតថ្លៃសរុបរាប់ពាន់
- 2018-06-29 12:09:41
- ចំនួនមតិ 0 | ចំនួនចែករំលែក 0
McGregor បង្ហោះវីដេអូបង្អួតស្បែកជើងថ្លៃៗខ្លួន គិតថ្លៃសរុបរាប់ពាន់
ចន្លោះមិនឃើញ
កីឡាករ Conor McGregor កាលពីពេលថ្មីៗនេះ បានបង្ហោះវីដេអូខ្លីមួយ ដែលបង្ហាញឲ្យឃើញពីបណ្ដាស្បែកជើងថ្លៃៗរបស់ខ្លួន។
កីឡាករគុនចម្រុះ McGregor បានបង្ហោះវីដេអូខ្លីមួយលើគណនីផ្លូវការ Instagram របស់ខ្លួន។ ក្នុងវីដេអូនោះ បានបង្ហាញពីកីឡាករសញ្ជាតិអៀរឡង់កំពុងរៀបចំសំលៀកបំពាក់លើសាឡុងវែងចំនួនពីរ។ បន្តិចក្រោយមក កូនរបស់កីឡាករ គឺ Conor Jnr ដែលមានវ័យទើប ១ខួប ក៏បានដើរចូលមក ទំនងសំដៅទៅរកឪពុកខ្លួន។
យ៉ាងនេះក្ដី ក្នុងវីដេអូក៏បានបង្ហាញអំពីបណ្ដាស្បែកជើងម៉ាកល្បី Gucci ជាច្រើនគូរបស់កីឡាករ។ ប្រភេទស្បែកជើងទាំងនោះ គឺចម្រុះតែម្ដង រួមមានទាំងប្រភេទស្បែកជើងប៊ូ ស្បែកជើងសង្រែក និងស្បែកជើងផ្ទាត់។
បើតាមការរាយការណ៍របស់ The Sun ស្បែកជើងទាំងនោះ មានតម្លៃសរុបជាង ៥០០០ ផោន (ជាង ៦៥៧៧ ដុល្លារសហរដ្ឋអាមេរិក)។
សូមបញ្ជាក់ផងដែរ McGregor បច្ចុប្បន្នកំពុងត្រៀមខ្លួនត្រលប់មកសង្វៀន UFC វិញ បន្ទាប់ពីបានអវត្តមានជិត ១ ឆ្នាំ ក្រោយប្រដាល់ចាញ់ Floyd Mayweather កាលពីខែសីហាឆ្នាំមុន។ កីឡាករបានចូលហ្វឹកហាត់វិញហើយក្នុងខែនេះ។
McGregor អាចប្រកួតជាមួយកីឡាករ Khabib Nurmagomedov ក្នុង UFC នាខែតុលាខាងមុខ៕