គុជសារ ច័ន្ទរាជ្យ តឲ្យដៃគូច្រើនគីឡូ នៅតែអាចឈ្នះបានខ្សែក្រវាត់

2018-07-09 06:43:33
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់វ័យក្មេងទើបប្រឡូកចូលសង្វៀនគុនចម្រុះ គុជសារ ច័ន្ទរាជ្យ អំឡុងការប្រកួតនៅប្រទេសថៃប៉ុន្មានថ្ងៃមុននេះ ដៃគូលើសទម្ងន់ប្រហែល ៥-៦គីឡូក្រាម ប៉ុន្តែនៅតែយល់ព្រមប្រកួតថែមទាំងឈ្នះខ្សែក្រវាត់១គ្រឿងទៀតផង។

គុជសារ ច័ន្ទរាជ្យ អាវខ្មៅ

ហ៊ុន ច័ន្ទរាជ្យ គ្រូរបស់ គុជសារ ច័ន្ទរាជ្យ បានឲ្យដឹងកាលពីយប់មិញនេះថា កូនសិស្សរបស់ហាក់ចាញ់កម្លាំងបន្តិច នាជំនួបដណ្ដើមខ្សែក្រវាត់ក្នុងកម្មវិធី Big Box Beatdown(BBB) ព្រោះដោយសារដៃគូលើសទម្ងន់ដល់ទៅ ៥-៦គីឡូក្រាមឯណោះ។

បើទោះជាដៃគូមានទម្ងន់លើសបែបនេះក្ដី ប៉ុន្តែកូនសិស្សរបស់លោកនៅតែអាចយកឈ្នះបាន តាមរយៈការចេះការពារបានល្អនៅពេលត្រូវគេចាប់ ថែមទាំងចេះវ៉ៃវាយបកទៅវិញក៏ល្អ កណ្ដាប់ក៏មានទម្ងន់ផងនោះ ជាហេតុធ្វើឲ្យកីឡាករថៃបោះបង់ការប្រកួតនៅទឹក១តែម្ដង។

កីឡាករ គុជសារ ច័ន្ទរាជ្យ

រូបភាពហ្វេសបុក(BBB)

គ្រូប្រដាល់មានបទពិសោធច្រើនខាងលើបន្ថែមថា លោកនឹងព្យាយាមឲ្យកូនសិស្សថ្មីៗទាំងនេះ ចូលប្រកួតសង្វៀនតូចៗនៅប្រទេសថៃ ឬកម្មវិធីផ្សេងៗចំនួនទៀតឲ្យបានច្រើន ដើម្បីសន្សំបទពិសោធឲ្យច្រើនឈានចូលសង្វៀនធំ One Championship នៅពេលខាងមុខ។

អរុណា ច័ន្ទរាជ្យ

អរុណា ច័ន្ទរាជ្យ ពេលគេសម្រេចដំបូង(រូបភាពហ្វេសបុក)

រំលឹកដែរថា គុជសារ ច័ន្ទរាជ្យ ផ្ដួលកីឡាករថៃឲ្យបោះបង់ការប្រកួតនៅទឹកទី១ នាជំនួបដណ្ដើមខ្សែក្រវាត់លក្ខណៈគុនចម្រុះក្នុងកម្មវិធី Big Box Beatdown(BBB) កាលពីថ្ងៃទី៧ ខែកក្ដដា ឆ្នាំ២០១៨នៅប្រទេសថៃ។ ចំណែកកីឡាករកម្ពុជាមួយរូបទៀត អរុណា ច័ន្ទរាជ្យ ត្រូវបានប្រកាសឲ្យឈ្នះវិញបន្ទាប់ពី គណៈកម្មការមើលវីដេអូប្រកួតសារឡើងវិញ ឃើញថាដៃគូដែលជាជនជាតិរុស្សីប្រកួតខុសលក្ខន្តិកៈ៕

អត្ថបទ៖ នួន ស៊ីណា