លៀង ស៊ីពេជ្រ នឹងឡើងប្រកួតដណ្ដើមខ្សែក្រវាត់កម្មវិធីចម្លែកនៅថៃ

2018-07-11 03:15:07
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតជើងខ្លាំងគុនខ្មែរ លៀង ស៊ីពេជ្រ នឹងត្រូវចាក់ចេញពីកម្ពុជានាយប់នេះ ដើម្បីទៅចូលរួមប្រកួតដណ្ដើមខ្សែក្រវាត់នៅចម្លែកមួយនៅប្រទេសថៃ នាថ្ងៃទី១៣ ខែកក្កដា ឆ្នាំ២០១៨ ខាងមុខនេះ ដែលការប្រកួតនោះមានទាំងសកល សេរី និង MMA។

កីឡាករ លៀង ស៊ីពេជ្រ

លៀង ស៊ីពេជ្រ ប្រាប់ឲ្យដឹងថា គេនឹងត្រូវទៅប្រកួតនៅប្រទេសថៃនាថ្ងៃទី១៣ ដើម្បីដណ្ដើមខ្សែក្រវាត់នៅទីនោះ ប៉ុន្តែក៏មិនបានចាំឈ្មោះថាជាកម្មវិធីអ្វីនោះដែរ។ កម្មវិធីប្រកួតលើកនេះ ហាក់ចម្លែកបន្តិច ព្រោះគេបែងចែកលក្ខណៈប្រយុទ្ធទៅតាមទឹកនិមួយៗ ពោលទឹកទី១ វ៉ៃសកល ទឹកទី២ សេរីប៉ុន្តែបិទកែង និងទឹកទី៣ វ៉ៃគុនចម្រុះ(MMA)។

ចំពោះសមត្ថភាពដៃគូប្រកួតវិញ អ្នកលេងគុនខ្មែរមកពីខេត្តកោះកុងខាងលើបន្ថែមថា មាកីឡាករម្ចាស់ផ្ទះថៃ និងបរទេស ហើយកម្មវិធីប្រដាល់នេះ សម្រាប់អ្នកឈ្នះប្រកួតដំបូង នឹងត្រូវប្រកួតបន្តលើកទី២ ប្រសិនបើឈ្នះទៀតទើបអាចឡើងដល់វគ្គផ្ដាច់ព្រ័ត្រតែម្ដង។

កីឡាករ លៀង ស៊ីពេជ្រ

កូនសិស្សលោកគ្រូ ហ៊ុន ច័ន្ទរាជ្យ រូបនេះ ប្រាប់ទៀតថា បានហ្វឹកហាត់ជិត១ខែផងដែរ សម្រាប់ការត្រៀមឡើងសង្វៀនលើកនេះ ហើយក៏មានការបារម្ភខ្លះៗដែរ ព្រោះខានវ៉ៃយូរ ស្របពេលប្រកួតលើកនេះបើឈ្នះត្រូវប្រកួតបន្តទៀត ដូច្នេះខ្លាចឈឺខ្លួនខ្លាំងប៉ះពាល់ដល់ប្រកួតបន្ទាប។

លៀង ស៊ីពេជ្រ និងមិត្តរួមក្លឹប

រំលឹកដែរថា លៀង ស៊ីពេជ្រ ជាអតីតអ្នកប្រដាល់ជើងខ្លាំងគុនខ្មែរម្នាក់របស់កម្ពុជា ដោយសារតែជំងឺទើបឃ្លាតឆ្ងាយពីសង្វៀនដល់សព្វថ្ងៃ។ ការប្រកួតថ្ងៃទី១៣ ខែកក្កដា ឆ្នាំ២០១៨ នៅឯប្រទេសថៃនេះ ជាប្រកួតដំបូងរបស់គេហើយ បន្ទាប់ពីឈប់អស់មួយរយៈពេលធំនេះ៕

អត្ថបទ៖ នួន ស៊ីណា