ព័ត៌មានរូបថត៖ មានរូបថតអ្វីប្លែកសប្តាហ៍នេះ
- 2018-07-12 00:20:00
- ចំនួនមតិ 0 | ចំនួនចែករំលែក 0
ព័ត៌មានរូបថត៖ មានរូបថតអ្វីប្លែកសប្តាហ៍នេះ
ចន្លោះមិនឃើញ
ព័ត៌មានរូបថតសប្តាហ៍នេះមានអ្វីប្លែកខុសពីសប្តាហ៍មុន! រូបក្នុងសប្តាហ៍នេះមាន រូប២សន្លឹកថតនៅខេត្តសៀមរាប ២សន្លឹកថតនៅរាជធានីភ្នំពេញ និង១សន្លឹកថតទៀតនៅ ស្រុកល្វាឯម ខេត្តកណ្តាល។
១. ដៃស្ត្រីចំណាស់ម្នាក់កំពុងដាក់ទានទៅបុរសគ្មានទីពឹង និងពិការ២នាក់នៅជិតព្រះអង្គដង្កើមុខព្រះបរមរាជវាំងក្នុងថ្ងៃបុណ្យសីល។ សម្រាប់ពុទ្ធបរិស័ទនៅកម្ពុជាតែងតែធ្វើបុណ្យ និងទានជាមួយគ្នា។ ការធ្វើបុណ្យនៅទីវត្តអារាមធ្វើឡើងដើម្បីឧទ្ទិសបុណ្យកុសលជូនដល់ជីដូនជីតាដែលចែកឋានទៅ ចំណែកការធ្វើទានទៅមនុស្សទីទាល់ធ្វើក្នុងបំណងដើម្បីចង់ជួយ និងចង់បានបុណ្យកុសល និងសេចក្ដីសុខចម្រើនក្នុងជីវិត។
២. នេះជារូបដៃរបស់ពុទ្ធបរិស័ទកំពុងចាប់សត្វចាបមកលែងនៅព្រះអង្គដង្កើមុខព្រះបរមរាជវាំង។ តាមជំនឿរបស់បងប្អូនប្រជាពុទ្ធបរិស័ទជនជាតិខ្មែរភាគច្រើនរាល់ពេលថ្ងៃបុណ្យទានធំតូច ឬពេលថ្ងៃសីលតែងតែលែងសត្វបន្ទាប់ពីយកផ្កាឈូក ធូប ទៀន ទៅអុជថ្វាយព្រះរួច។ ការលែងសត្វនេះពួកគេយល់ថា សត្វទាំងនោះនឹងកាត់គ្រោះកាត់ថ្នាក់ នាំលាភនិងសំណាងល្អដល់គេបន្ទាប់ពីគេលែងសត្វនោះរួច។
៣. ភ្ញៀវទេសចរបរទេសម្នាក់យកកន្សែងរុំខ្លួនក្រាលដេកចាំមើលទិដ្ឋភាពព្រះអាទិត្យរះនៅបរិវេណខាងមុខជាប់ស្រះទឹកខាងជើងផ្លូវចូលប្រាសាទអង្គរវត្ត។ ជាទូទៅនៅទីនេះជារៀងរាល់ព្រឹកចន្លោះពីម៉ោង៥ទៅម៉ោង ៧ព្រឹក ភ្ញៀវទេសចរដែលមកទស្សនាប្រាសាទអង្គរវត្ត ដែលភាគច្រើនភ្ញៀវអន្តរជាតិតែងតែមកអង្គុយ ឈរ ដេក ចាំទស្សនាទិដ្ឋភាពដ៏អស្ចារ្យនេះដោយខានមិនបានជារៀងរាល់ថ្ងៃ។
៤. ភ្ញៀវទេសចរបរទេសស្រីប្រុសកំពុងមើលស្ត្រីខ្មែរម្នាក់ដើរលក់សត្វបំពង(ពស់, ខ្យាដំរី, អាពីង, ដុកឌឿ និងចង្រិត) នៅ Pub Street នៅកណ្ដាលក្រុងសៀមរាប។ នៅក្នុងរូបមុខភ្ញៀវបរទេសស្រីប្រុសនេះដូចជាឆ្ងល់ ប្លែកភ្នែក និងនឹកស្មានមិនដល់ថាសត្វល្អិតទាំងនេះជាអាហារប្លែក និងពេញនិយមរបស់ជនជាតិកម្ពុជា។ សម្រាប់ភ្ញៀវទេសចរអាចមើលបាន តែបើថតគិតលុយមួយប៉ុស្តិ៍ ០.៥០ដុល្លារ តែបើទិញអាចថតបាន។
៥. លោកយាយម្នាក់កំពុងដាក់បាតព្រះសង្ឃនិមន្តបិណ្ឌបាតនៅឃុំអរិយក្សត្រ ស្រុកល្វាឯម ខេត្តកណ្ដាល។ តាមទម្លាប់របស់អ្នកស្រុកនេះជារៀងរាល់ថ្ងៃតែងតែត្រៀមចង្ហាន់សម្រាប់រាប់បាតដាក់នៅផ្ទះរៀងៗខ្លួន។ ព្រះសង្ឃគង់នៅវត្តនៅតំបន់នោះតែងតែនិមន្តបិណ្ឌបាតម្តងៗចាប់ពី៥អង្គ រហូត ៣០អង្គ។ បើគិតត្រឹមថ្ងៃនេះនៅសល់តែ ១៦ថ្ងៃទៀតតែប៉ុណ្ណោះពិធីបុណ្យចូលវស្សានឹងចូលមកដល់។ តាមពុទ្ធបញ្ញត្តិ ភិក្ខុសង្ឃសាមណេរ អ្នកបួសក្នុងពុទ្ធសាសនា ទោះគង់នៅទីណាក្តី គឺត្រូវប្រារព្ធកិច្ចវត្តប្រតិបត្តិចូលកាន់វស្សារយៈពេលបីខែនៅរាល់រដូវវស្សា បើពុំនោះសោតនឹងត្រូវអាបត្តិទុក្កដ ឬមានទោសព្រោះកន្លងវិន័យ។