អ្នកគាំទ្រកាន់តែសង្ស័យខ្លាំងឡើង ថា CLវេចបង្វេចចេញពី YG ពិតៗ

2018-07-13 03:35:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយបំបែកក្រុម 2NE1 និងឈានមកទល់ពេលនេះ អ្នកគាំទ្រជាច្រើននៅតែមិនយល់ពីអនាគតរបស់តារាស្រីគ្រប់គ្នាតែហៅថា "Queen” ជាមួយផលិតកម្ម YG។

CL ជ្រកក្រោមទ្រនំផលិតកម្មនេះអស់រយៈពេលជាង ១០ឆ្នាំហើយ ហើយក៏សាងកេរ្តិ៍ឈ្មោះមិនធម្មតានាពេលកន្លងមកដែរ។ ប៉ុន្តែរយៈពេលចុងក្រោយនេះ ដោយសារការងារខាងប៉ែកអាមេរិករបស់នាងកាន់តែដើរទៅមុខ ទើបបណ្ដាលឲ្យអ្នកគាំទ្រជាច្រើនគិតថាតារាស្រីរូបនេះប្រហែលជិតចេញពីផលិតកម្មហើយ។

បើរម្លឹកទៅកាលពីខែមមករា ឆ្នាំ២០១៨នេះវិញ ម្ចាស់បទ "Baddest Female” បានទម្លាយថាខ្លួនកំពុងរង់ចាំផលិតកម្ម YG ចេញអាល់ប៊ុមថ្មីរបស់នាង ប៉ុន្តែមកទល់ពេលនេះហើយ អ្វីៗនៅមិនទាន់បង្ហាញនៅឡើយ។

ក្នុងខែមិថុនា CL ក៏បានបង្ហាញតម្រុយ ដោយបានចុច Like ខមមិនមួយរបស់ អ្នកគាំទ្រដែលបានសរសេរថា៖ "Baby ហេតុអ្វីអ្នកនៅ YG ទៀត? ខ្ញុំសង្ឃឹមថាអ្នកចាកចេញ វាល្អជាង... YG កំពុងព្យាយាមសង្កត់អ្នកទុក ស្របពេល gzbs ទ្រាំចាំទាំងហត់នឿយ, សូមកុំឲ្យគាត់ប្រើប្រាស់អ្នកម្ដងទៀត”។

ដោយឡែកថ្មីៗនេះ អ្នកគាំទ្រកាន់តែភ្ញាក់ផ្អើលទៀតក្រោយឃើញ CL និងគណនីឈ្មោះ @new.ygupdatefam ឆ្លើយឆ្លងគ្នា។

@new.ygupdatefam បានសរសេរថា៖ "សុំកុំចាកចេញ ពី YG។ ខ្ញុំស្រឡាញ់ Queen @chaelincl។ Blackjack និងអ្នកគាំទ្រ YG ទាំងអស់តែងតែគាំទ្រអ្នក។ សូមមានសុខភាពល្អ”។

CL ក៏តបវិញ៖ "@new.ygupdatefam មានអ្នកដែលមានសមត្ថភាពអស្ចារ្យជាច្រើនមានវត្តមាននៅ YG បច្ចុប្បន្ន!!! ដូចអ្នកបានឃើញស្រាប់:))) ខ្ញុំស្រឡាញ់អ្នកទាំងអស់គ្នាជារៀងរហូត!!! អរគុណគ្រប់គ្នាដែលតែងតែគាំទ្រ!”។

ទោះជាយ៉ាងណាតាមរយៈខមមិននេះនាងមិនបានបញ្ជាក់ថានៅបន្ត ឬចាកចេញទេ ប៉ុន្តែអ្វីដែលនាងបង្ហាញ បានធ្វើឲ្យអ្នកគាំទ្រភាគច្រើនបំផុតគិតថា CL ប្រហែលនឹងចេញពីផលិតកម្មនេះមិនខាន។ ក្នុងចំណោមអ្នកទាំងនោះមានខ្លះសោកស្ដាយ ខ្លះសាទរចំពោះការសម្រេចចិត្តរបស់តារាស្រីរូបនេះពេញទំហឹង៕