បាក់ឌុបសល់ពេលតែ១ខែ កុំរវល់ដេកភ័យមិនដឹងរៀនបែបណា មកចេះក្បួនទាំង១០នេះ

2018-07-16 05:06:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី ២០ សីហា ឆ្នាំ២០១៨ នៅសល់រយៈពេលប្រមាណជា ១ខែទៀតប៉ុណ្ណោះ។ ប្អូនៗសិស្សទី១២ខ្លះ បានខ្នះខ្នែងសិក្សាទាំងយប់ទាំងថ្ងៃ និងខ្លះរវល់ព្រួយបារម្ភខ្លាចប្រឡងមិនបានល្អ ឬមិនជាប់នឹងគេ។

ទន្ទឹមនឹង Sabay នឹងលើកយកគន្លឹះទាំង ១០ រៀនក្នុងរយៈពេលខ្លី ទោះបីរៀនមិនសូវពូកែក៏ដោយ ក៏អាចទាញបាននិទ្ទេសល្អគាប់ចិត្តបានខ្លះដែរ។ ខាងក្រោមនេះជាដំបូន្មានពីលោកគ្រូ អ្នកគ្រូ និងសិស្សពូកែ បានចែករំលែករួមមាន៖

១. ថែទាំសុខភាពឲ្យបានល្អរហូតដល់ថ្ងៃប្រឡង

សុខភាព ជាកត្តាសំខាន់ដែលជះឥទ្ធិពលទៅលើខួរក្បាល។ ហេតុនេះ ប្អូនៗទី១២ ត្រូវប្រឹងញ៉ាំ គេងឲ្យបានគ្រប់គ្រាន់ និងមានលំហាត់ប្រាណ លេងកីឡា ដើម្បីជំនួយស្មារតីឲ្យបានញឹកញាប់តាមដែលអាចធ្វើបាន។

២. រៀនសរសេរអក្សរឲ្យបានស្អាត

ព្យាយាមសរសេរសំណេរឲ្យបានត្រឹមត្រូវ ជាពិសេសមិនត្រូវដាក់ ឬលួចយកប្រើទឹកលុប និងគូសវាសផ្ដេសផ្ដាស ដែលគេអាចសម្គាល់ថាជាសញ្ញាអ្វីមួយ ដែលនឹងត្រូវកំណត់ឲ្យក្រដាសប្រឡងនោះទុកជាអាសារបង់ ឬធ្លាក់ដោយស្វ័យប្រវត្តិ។

៣. រៀនសរសេរក្រដាសរ៉ាមឲ្យមានរបៀប

ក្រោយពីសរសេរអក្សរមិនមានកំហុសហើយ មករៀនសរសេរលើក្រដាសរ៉ាមឲ្យត្រង់ស្មើ និងទុកកន្លែងសរសេរឲ្យមានសណ្ដាប់ធ្នាប់ កុំសរសេរតាមតែនឹកឃើញ។

៤. សួរគ្រូពីរបៀបសរសេរចម្លើយឲ្យដូចក្នុងអត្រាកំណែ

ត្រូវឆ្លៀតសួរគ្រូរបៀបសរសេរចម្លើយយ៉ាងម៉េចឲ្យដូចក្នុងអត្រាកំណែ និងព្យាយាមកែតម្រូវរបៀបសរសេរចម្លើយរបស់ខ្លួនឯងតាមគម្រូអត្រាកំណែ។

៥. ហាមធ្វើលំហាត់សរសេរកាត់ខ្លាំងពេក

ពេលដោះស្រាយលំហាត់ ឬ សមីការ កុំព្យាយាមសរសេរលឿនហើយកាត់ៗ ត្រូវឆ្លងឲ្យបានគ្រប់ដំណាក់កាល ព្រោះខ្លាចបាត់ពិន្ទុ។

៦. រៀនខ្លួនឯងឲ្យបានច្រើន

រៀនខ្លួនបានច្រើនកាលណា អ្នកប្រាកដជាដឹងពីចំណុចខ្លាំងនិងខ្សោយរបស់ខ្លួន ហើយកត់ចំណាំចំណុចខ្សោយទុក ដើម្បីហ្វឹកហាត់បន្ថែម។

៧. ជួបជុំមិត្តភក្ដិរៀនជាក្រុមឲ្យញឹកញាប់

សំខាន់ណាស់ត្រង់ចំណុចនេះ ព្រោះថាការរៀនជាក្រុមអាចជួយឲ្យអ្នកបែកគំនិតបានច្រើន និងមិនចេះទាល់គំនិតពេលប្រឡងមែនទែន។

៨. ត្រូវធ្វើរាល់សំណួរឲ្យគ្រប់

នៅពេលប្រឡង អ្នកត្រូវព្យាយាមឆ្លើយសំណួរឲ្យបានគ្រប់មុខ ទោះមិនសូវចេះក៏ដោយ កុំឲ្យមានចន្លោះ។ សល់សំណួរដែលមិនសូវចេះ អាចទុកឆ្លើយតាមក្រោយ និងព្យាយាមរក្សាអារម្មណ៍ឲ្យមូល ដើម្បីគិត។

៩. កុំបោះចោលមុខវិជ្ជាបន្ទាប់បន្សំឲ្យសោះ បើចង់បាននិទ្ទេសល្អប្រសើរ

មុខវិជ្ជាបន្ទាប់បន្សំ ដូចជា ភាសាអង់គ្លេស ផែនដី និងបរិស្ថានវិទ្យា ព្រមទាំងមុខវិជ្ជាតូចៗផ្សេងទៀត សូមកុំទុកចោលឲ្យសោះ ត្រូវព្យាយាមទន្ទេញមេរៀនតូចៗជារៀងរាល់ព្រឹកព្រលឹម និងមានមិត្តភក្តិឆ្លើយឆ្លងសំណួរចម្លើយជាមួយ ដើម្បីដឹងត្រូវឬខុស។

១០. តាមដានផេកក្រសួងអប់រំ និងសារព័ត៌មានអនឡាញទាក់ទងនឹងបាក់ឌុប

ចំណុចចុងក្រោយនេះ ក៏ជាវិធីសាស្ត្រមួយ ប្អូនៗដឹង និងស្វែងរកវិញ្ញាសាដែលចេញប្រឡងរួចកាលពីឆ្នាំទៅ។ ជាក់ស្ដែងផេករបស់ក្រសួងអប់រំ ផេក Kruo Cambodia និងសារព័ត៌មានអនឡាញផ្សេងៗទាក់ទងនឹងបាក់ឌុប ជាពិសេស Sabay បានចែករំលែកគន្លឹះរៀន និងត្រៀមប្រឡងបាក់ឌុបជាច្រើន អាចចុចទីនេះ ដើម្បីទទួលព័ត៌មានលម្អិត៕

អត្ថបទ៖ ស៊ិន សាវ៉េត