ចង់ទៅលេងកោះបាលី១សប្ដាហ៍ ឲ្យសប្បាយមួយចាស់ដៃ ចាយលុយប៉ុន្មានបានគ្រប់?

2018-07-16 05:09:14
ចំនួនមតិ 0 | ចំនួនចែករំលែក 0

ចន្លោះមិនឃើញ

កោះបាលីជាគោលដៅទេសចរណ៍មួយដ៏មានប្រជាប្រិយភាព នៃប្រទេសឥណ្ឌូណេស៊ី ហើយក៏មានបងប្អូនខ្មែរមិនតិចអ្នកឡើយធ្លាប់ទៅដល់ទីនោះផ្ទាល់ដើម្បីផ្ដិតទេសភាពដ៏ស្រស់ត្រកាល។ ថ្ងៃនេះមកដឹងទាំងអស់គ្នាថា បើចង់ទៅលេងកោះបាលីរយៈពេល១សប្ដាហ៍ត្រូវចំណាយអស់ប៉ុន្មានទើបគ្រប់? ហើយចំណាយទៅលើអ្វីខ្លះ? តទៅនេះគឺជាការចែករំលែកពី រុន វិរៈ ទើបតែទៅកម្សាន្តកាលពីថ្មីៗនេះ។

យុវជន រុន វិរៈ ជាប្រធានក្រុម Unseentra ប្រាប់ថាចំនាយដែលធំជាងគេនោះគឺ សំបុត្រយន្តហោះ ដែលមានតំលៃ ២២២ដុល្លារ ហើយអ្នកទាំងអស់គ្នានិងត្រូវចំណាយពេល យ៉ាងហោចណាស ១ថ្ងៃដើម្បីធ្វើដំណើរ ព្រោះត្រូវប្តូរជើងហោះហើរនៅកូឡាឡាំពួ បើអ្នកជិះ Air Asia Malindo Air ឬ Malaysian Air ។

ប្រធានក្រុមរៀបចំដំណើរកម្សាន្តបែបបោះតង់ និង ជាអ្នកសរសេរអត្ថបទខ្លី ពីទីតាំងដំណើរកម្សាន្តផ្សេងៗ ក្នុងប្រទេសកម្ពុជា និង ក្រៅប្រទេសរូបនេះបន្តថា ចំណាយធំទី២ គឺ ថ្លៃស្នាក់នៅ គឺ ១២៥ ដុល្លារម្នាក់ ក្នុងរយៈពេលមួយអាទិត្យ ហើយត្រូវស្នាក់នៅ Bangalow និង Hotel ស្អាតមានផាសុកភាពគួរឲ្យចង់ស្នាក់នៅ។ អតីតនិស្សិតផ្នែកគ្រប់គ្រងនៅសាកលវិទ្យាល័យជាតិគ្រប់គ្រង់និយាយថា៖ «ចំណែកអាហារយើងចំណាយប្រហែល ១០០ ដុល្លារ។ ប៉ុន្តែកុំភ្លេចវេច សៀង ត្រីខ និង មីកំប៉ុងទៅផងទើបគ្រប់ បើមិនអញ្ចឹងទេ ដឹងតែអំបិលហើយ ម្ហូបញ៉ាំអត់កើត ហើយថ្លៃទៀត ១ ពេល បើញ៉ាំនៅភោជនីយដ្ឋានអាចអស់ម្នាក់ ១០ ដុល្លារជាង។»

ហើយចុងក្រោយថ្លៃ ជួលម៉ូតូ ឡានជិះ និង ទូក គឺ សរុបអស់ប្រហែលជា ១២០ ដុល្លារក្នុងម្នាក់។សរុបចុងក្រោយចំណាយយ៉ាងហោចណាស់ ៥៥០ដុល្លារ ក្នុងម្នាក់ សម្រាប់រយៈពេល ១ អាទិត្យនៅកោះបាលី៕