ក្មេងថៃទាំង១៣ រៀបរាប់រឿងរ៉ាវក្នុងរូងភ្នំថាំហ្លួង និងវិធីអាចរក្សាជីវិតបាន

2018-07-19 02:12:26
ចំនួនមតិ 0 | ចំនួនចែករំលែក 0

ចន្លោះមិនឃើញ

បង្ហាញខ្លួននៅក្នុងឈុតកីឡានៃក្រុមបាល់ទាត់ «ជ្រូកព្រៃ» នៅក្នុងសន្និសីទសារព័ត៌មានមួយ នាល្ងាចថ្ងៃពុធ ទី១៨ ខែកក្កដា ឆ្នាំ២០១៨ ក្រោយចេញពីមន្ទីរពេទ្យ ក្មេងប្រុស និងគ្រូបង្វឹកទាំង១៣នាក់ បានរៀបរាប់ និងពន្យល់ប្រាប់ពីវិធីអាចរក្សាជីវិត រយៈពេល១១ថ្ងៃនៅក្នុងរូងភ្នំលិចទឹក។

គ្រូបង្វឹកវ័យ២៥ឆ្នាំ លោក Ekkapol Chantawong បាននិយាយថា ក្រោយពេលហ្វឹកហាត់បាល់ទាត់ចប់នៅថ្ងៃទី២៣ ខែមិថុនា ខ្លួន និងក្មេងៗបានសម្រេចចិត្តចូលទៅក្នុងរូងភ្នំនោះ ខណៈអ្នកខ្លះធ្លាប់បានចូលរួចពីមុនមកហើយ។ រយៈពេលមួយម៉ោងក្រោយពេលចូលទៅក្នុងនោះ ស្រាប់តែកម្រិតទឹកបានកើនឡើង ដោយសារតែទឹកភ្លៀង ធ្វើឲ្យពួកគេជាប់គាំងនៅក្នុងនោះតែម្តង។

ក្មេងប្រុសឈ្មោះ Nattawut Takamsai អាយុ១៤ឆ្នាំ និយាយថា «ខ្ញុំមិនភ័យស្លន់ស្លោទេ។ ខ្ញុំព្យាយាមរក្សាភាពស្ងប់ស្ងាត់ និងរកផ្លូវចេញ»។

នៅយប់នោះ ដោយសារតែរកផ្លូវចេញមិនបាន លោក Ekkapol ក៏បានប្រាប់ពួកគេថា គួរតែនៅទីនោះមួយយប់។ ពួកគេបានដេកក្បែរប្រភពទឹកស្អាតមួយកន្លែង ហើយគ្រោងនឹងរកផ្លូវចេញនៅថ្ងៃបន្ទាប់។ ជាមួយគ្នានេះ លោក Ekkapol បានប្រាប់ពួកគេកុំឲ្យប្រើពិលក្នុងពេលតែមួយ ដើម្បីសន្សំថ្មរបស់វា។

វាគឺជាយប់ទី២ នៅពេលដែលក្មេងៗបានចុះខ្សោយកម្លាំង។ ក្មេងប្រុស Chanin “Titan” Wiboonrungruang អាយុ១១ឆ្នាំ និយាយថា «ខ្ញុំស្ទើរតែដួលសន្លប់។ រាងកាយរបស់ខ្ញុំខ្សោយ។ ខ្ញុំព្យាយាមមិនគិតពីអាហារឡើយ ព្រោះខ្ញុំនឹងឃ្លានកាន់តែខ្លាំង»។

គួរបញ្ជាក់ឲ្យដឹងថា ផែនការដំបូងរបស់ពួកគេ គឺត្រូវរង់ចាំមនុស្សមកជួយសង្គ្រោះ ប៉ុន្តែនៅពេលឃើញកម្រិតទឹកឡើងកម្ពស់៣ម៉ែត្រ ពួកគេក៏ព្យាយាមរកផ្លូវចេញតែម្ដង។ ក្នុងអំឡុងពេលថ្ងៃ ពួកគេបានផ្លាស់វេនគ្នាដើម្បីជីកជញ្ជាំងរូងភ្នំ។ ក្មេងប្រុស Prajak Sutham បានប្រាប់ថា ពួកគេជីកបានជម្រៅពី ៣ ទៅ ៤ម៉ែត្រដែរ។

«យ៉ាងហោចណាស់ពួកយើងបានធ្វើអ្វីមួយ មិនមែនអង្គុយចាំតែជំនួយនោះទេ»។ នេះបើតាមសម្ដីគ្រូបង្វឹក Ekkapol។

វាគឺជាថ្ងៃទី១០ នៅពេលដែលពួកគេបានឮសំឡេងអ្នកផ្សេង។ ក្មេងប្រុសម្នាក់ក្នុងចំណោមនោះ ឈ្មោះ Adul និយាយថា ខ្លួនបានចាប់យកពិល ហើយបញ្ចាំងចុះទៅក្រោមទឹក ស្រាប់តែបានឃើញអ្នកមុជទឹកបរទេស២នាក់តែម្តង។

ក្រោយមកអ្នកមុជទឹកនៃកងទ័ពជើងទឹក SEAL រួមទាំងគ្រូពេទ្យ បានស្នាក់នៅជាមួយពួកគេសរុបរយៈពេល ៩ថ្ងៃរហូតដល់ពួកគេត្រូវជួយសង្គ្រោះចេញពីរូងភ្នំអស់។ នៅអំឡុងពេលនោះ ពួកគេបានប្រើដីសគូរលើជញ្ជាំងរូងភ្នំ និង ប្រើដុំថ្មលេងអុក ដើម្បីកំដរការអផ្សុក។

យ៉ាងណាមិញ ពួកគេទាំង១៣នាក់បានអរគុណដល់ការលះបង់របស់ អតីតកងទ័ពជើងទឹកថៃ លោក Saman Kunan ដែលបានស្លាប់នៅក្នុងប្រតិបត្តិការជួយសង្គ្រោះពួកគេ៕