មានការបង្កើតមជ្ឈមណ្ឌលស្រាវជ្រាវខួរក្បាលមួយនៅចិន ដើម្បីឆ្ពោះរកថ្នាំព្យាបាលជំងឺដុះសាច់ក្នុងខួរក្បាល
- 2018-07-19 13:02:14
- ចំនួនមតិ 0 | ចំនួនចែករំលែក 0
មានការបង្កើតមជ្ឈមណ្ឌលស្រាវជ្រាវខួរក្បាលមួយនៅចិន ដើម្បីឆ្ពោះរកថ្នាំព្យាបាលជំងឺដុះសាច់ក្នុងខួរក្បាល
ចន្លោះមិនឃើញ
កាលពីថ្ងៃពុធ មជ្ឈមណ្ឌលស្រាវជ្រាវវិទ្យាសាស្ត្រខួរក្បាលមួយត្រូវបានបង្កើតឡើងនៅក្នុងទីក្រុងសៀងហៃ ប្រទេសចិន។ មជ្ឈមណ្ឌលផ្ដោតសំខាន់លើការស្រាវជ្រាវរកវិធីសាស្ត្រព្យាបាលជំងឺខួរក្បាល តាមរយៈការសិក្សាលើការក្លូនសត្វស្វា។
និយមន័យនៃ ក្លូន អាចត្រូវបានអ្នកជំនាញជាច្រើននិយាយផ្សេងៗគ្នា។ យ៉ាងនេះក្ដី ការក្លូន សំដៅលើការបង្កើតសារពាង្គកាយថ្មីមួយឬច្រើនទៀត ដែលមានលក្ខណៈដូចគ្នាបេះបិទនឹងសារពាង្គកាយដើម។
មជ្ឈមណ្ឌលស្រាវជ្រាវនៅចិនខាងលើ ត្រូវបានបង្កើតឡើងក្រោមកិច្ចសហប្រតិបត្តិការរវាងវិទ្យាស្ថានវិទ្យាសាស្ត្រណឺរ៉ូន នៃរដ្ឋបណ្ឌិតសភាចិនផ្នែកវិទ្យាសាស្ត្រ និងរដ្ឋាភិបាលថ្នាក់តំបន់របស់ចិន។
បើតាមនាយកវិទ្យាស្ថានវិទ្យាសាស្ត្រណឺរ៉ូន លោក Poo Mu-ming មជ្ឈមណ្ឌលស្រាវជ្រាវវិទ្យាសាស្ត្រខួរក្បាល មានគោលបំណងក្នុងការលើកកម្ពស់ការស្រាវជ្រាវ ទាក់ទងនឹងជំងឺខួរក្បាល ដោយផ្អែកការសិក្សាពីការក្លូនសត្វស្វា។
ការស្រាវជ្រាវនេះ នឹងបើកផ្លូវដល់ការរកឃើញនូវវិធីថ្មី ដើម្បីព្យាបាលជំងឺខួរក្បាល ដូចជាជំងឺដុះសាច់ក្នុងខួរក្បាលជាដើម។ មិនតែប៉ុណ្ណោះ ការស្រាវជ្រាវបូកផ្សំជាមួយការសហការជាមួយក្រុមហ៊ុនថ្នាំលំដាប់ពិភពលោកមួយចំនួន នឹងរួមចំណែកដល់ការអភិវឌ្ឍថ្នាំថ្មីៗថែមទៀតផង។ នេះបើតាមការបញ្ជាក់របស់លោក Poo។
សូមបញ្ជាក់ផងដែរថា កាលពីខែមករា ឆ្នាំនេះ វិទ្យាស្ថានវិទ្យាសាស្ត្រណឺរ៉ូន បានប្រកាសជាសាធារណៈថា ខ្លួនធ្វើបានសម្រេចក្នុងការក្លូនសត្វស្វា។ ការណ៍នេះត្រូវបានមជ្ឈដ្ឋានជាច្រើនចាត់ទុកថា គឺជាជោគជ័យមួយផ្នែកវិទ្យាសាស្ត្រខួរក្បាល និងការក្លូន៕