តម្លៃធូរថ្លៃដូចគ្នា គិតម៉េចដែរ រវាង Microsoft Surface Go និង Apple iPad?

2018-07-22 06:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Device ទាំងពីរខុសគ្នា មកពីត្រកូលខុសគ្នា តែស្ថិតនៅក្នុងប្រភេទតម្លៃស្រដៀងគ្នា ប្រហែលតិចជាង ៤០០ ដុល្លារ ល្មមគិតគូរបាន។ មានអេក្រង់ធំ កម្មវិធីច្រើន ហើយមិនចំណាយលុយច្រើន ដូចម៉ូដែលខ្ពស់ ដូចជា Surface Go និង Apple iPad ពិតណាស់បើមិនប្រើដំណើរការកម្មវិធីធ្ងន់ៗ។

ទំហំ iPad ស្ដើងស្រាល ជាង Surface Go ដោយ iPad មានទំហំ 9.4 x 6.6 អ៊ីង កម្រាស់ 0.29 អ៊ីង និងទម្ងន់ 1.05 ផោន ខណៈ Surface Go កម្រាស់ 0.33 អ៊ីង ទំហំ 9.6 x 7 អ៊ីង និងទម្ងន់ 1.15 ផោន។

បើប្រើសម្បកការពារ និងឧបករណ៍បំពាក់បន្ថែម ទម្ងន់ រួមទាំងទំហំ នឹងមានការប្រែប្រួលទៅតាមនោះ។

ប្រព័ន្ធប្រតិបត្តិការ Windows 10 និង iOS នេះជាចំណុចខុសគ្នាដាច់រវាង Device ទាំងពីរ។ Tablet ទំហំ ១០ អ៊ីងទាំងពីរនេះ មាន Keyboard និងប៉ិច (Stylus pens) អាចប្រើបង្កើតអ្វីៗបានច្រើន រួមទាំងការកម្សាន្តផងដែរ គ្រាន់តែមួយចេញពី Microsoft និងមួយទៀតមកពី Apple។

Surface Go ប្រើប្រព័ន្ធ Windows 10 S ជាជំនាន់ Window 10 រចនាឡើងសម្រាប់ប្រើលើ Tablet និងផ្ដោតលើជំនួយការអប់រំ មានលក្ខណៈស្រដៀងនឹង Windows 10 Home ដែរ ប៉ុន្តែប្រើបានតែកម្មវិធីទាញចេញពី Windows Store ប៉ុណ្ណោះ កម្មវិធីទាញចេញពីប្រភពផ្សេងប្រើមិនបាននោះទេ។ សំណាងដែរ អ្នកប្រើប្រាស់អាចឡើងជំនាន់ប្រើ Windows 10 Home បាន អាចប្រើប្រព័ន្ធ Windows បានពេញលេញដូចធម្មតា តែមិនអាចត្រលប់បកទៅប្រើ Windows 10 S ដើមបានវិញនោះទេ។

iPad ប្រើ iOS របស់ Apple ដូចគ្នាលើ iPhone អាចសប្បាយចិត្តនឹងអាយុកាលជាង ១០ឆ្នាំ របស់ App Store មានកម្មវិធីជម្រើសរាប់លាន អាចថា ចង់សម្រេចអ្វីក៏មានដែរ មានទាំងហ្គេម កម្មវិធីច្រើនប្រភេទ។ តែមិនដូច Windows 10 Home ប្រើលើ Surface Go នោះទេ ប្រព័ន្ធ iOS មិនអាចប្រើកម្មវិធីពេញលេញរបស់ macOS លើ iPad បានឡើយ ដោយជម្រើសមានតែមួយគត់គឺកម្មវិធីរបស់ iOS។

ប្រភេទអេក្រង់ PixelSense និង Retina Surface Go មាន Resolution ប្រមាណ 1 800 x 1 200 pixels អេក្រង់ 10.6 អ៊ីងប្រភេទ PixelSense បង្កើតជាពិសេសសម្រាប់ Tablet អាចប្រើប៉ិច ដោយកម្រិតសង្កត់មាន 4 096។ iPad ទំហំ 9.7 អ៊ីង ប្រភេទអេក្រង់ Retina មាន Resolution ខ្ពស់ជាងប្រមាណ 2 048 x 1 536 pixels ហើយអាចប្រើប៉ិច (Apple Pencil stylus) បាន ដែលធ្លាប់មានប្រើតែលើ iPad Pro ប៉ុណ្ណោះ។ អេក្រង់ iPad តូចស្ដើងមានដង់ស៊ីតេ Pixel ចំនួន 264ppi ខណៈ Surface Go មានត្រឹម 217ppi។

Pentium Gold ឬ A10 Surface Pro ប្រើ CPU Intel Core m3 អាចឡើងជំនាន់ CPU ខ្ពស់ជាងនេះបាន។ Surface Go ប្រើ CPU ប្រភេទ Pentium Gold 4415Y ដែលជា Processor Pentium មានពីរ Core មិនសូវខ្លាំង តែប្រើបានល្អត្រឹមកម្មវិធីល្មមៗ។

iPad ប្រើ Chip Fusion A10 របស់ Apple មានលក្ខណៈដូចគ្នាប្រើលើ iPhone 7 មានសមត្ថភាពគួរឲ្យចាប់អារម្មណ៍មិនខកចិត្តសម្រាប់ Tablet។ ជាជំនាន់មួយនៅពីក្រោយ Chip Bionic A11 ប្រើលើ iPhone 8 និង iPhone X។

RAM និង Storage Surface Go មាន RAM 4GB រួមជាមួយ Flash storage ទំហំ 64GB ខណៈ iPad មាន RAM ត្រឹម 2GB និង Storage ទំហំ 32GB។ Surface Go ក៏មាន microSD card slot អាចពង្រីកទំហំរក្សាទិន្នន័យ ដែលមិនអាចទៅរួចនោះទេលើ iPad។ ត្បិតថាចឹងមែន តែសមត្ថភាព Device មិនលើសគ្នាប៉ុន្មាននោះទេ នេះដោយសារប្រព័ន្ធប្រតិបត្តិការប្រើធនធានបានយ៉ាងល្អ។

ចុះ Tablet មួយណាលេចធ្លោជាង? ពិបាកថាណាស់ ដោយសារ Device ទាំងពីរប្រើប្រព័ន្ធប្រតិបត្តិការខុសគ្នា។ សំនួរចម្បង តើ CPU Pentium Gold កម្លាំងខុសគ្នាប៉ុណ្ណាទប់ទល់នឹង Intel Core m3 របស់ Surface Pro ក៏ដូចជា Processor Fusion A10 របស់ iPad។ Surface Go អាចទាញយកប្រយោជន៍ពីប្រព័ន្ធ Windows 10 តាមរយៈ Windows 10 Home ខណៈអេក្រង់ iPad គែមលាតស្អាត៕