Richarlison៖ ពីកម្មករក្រីក្រ ក្លាយជាកីឡាករមានតម្លៃខ្លួនជាង ៦៥ លានដុល្លារ នៅ Premier League

2018-07-22 08:10:04
ចំនួនមតិ 0 | ចំនួនចែករំលែក 0

ចន្លោះមិនឃើញ

Everton ជិតឈានដល់កិច្ចព្រមព្រៀងទិញ ខ្សែប្រយុទ្ធសញ្ជាតិប្រេស៊ីល Richarlison ពី Watford ហើយក្នុងតម្លៃ ៥០ លានផោន (ប្រហែល ៦៥ លានដុល្លារ)ហើយ។ នេះបើតាម BBC។

លោក Marco Silva គឺជាផ្នែកមួយដ៏សំខាន់ក្នុងការនាំយក Richarlison ពី Watford មកតាមលោក បន្ទាប់ពីគ្រូបង្វឹកសញ្ជាតិព័រទុយហ្គាល់ បានដឹកនាំ Watford ពេញមួយរដូវកាល ២០១៧-១៨ ហើយ បច្ចុប្បន្នលោកគឺជាគ្រូបង្វឹករបស់ Everton។

កំណត់ត្រាកីឡាករថ្លៃបំផុតបច្ចុប្បន្នក្លឹបEverton គឺកីឡាករ Gylfi Sigurdsson ទិញមកពី Swansea កាលពីខែសីហា ឆ្នាំ២០១៧ ក្នុងតម្លៃ ៥៩ លានដុល្លារ ហើយ ប្រសិនបើកីឡាករប្រេស៊ីលវ័យ២១ឆ្នាំឈានដល់កិច្ចព្រមព្រៀង ៦៥ លានដុល្លារមែន ដូច្នេះ Richarlison នឹងក្លាយទៅជាកីឡាករថ្លៃបំផុតនៅ Everton។

កើតក្នុងគ្រួសារកម្មករក្រីក្រ នៃតំបន់ទេសចរណ៍ដ៏សម្បូរសប្បាយនៃប្រទេសប្រេស៊ីល

កាលពីជាង ៤ ឆ្នាំមុន Richarlison គ្មានលទ្ធភាពសូម្បីទិញស្បែកជើងទាត់បាល់សមរម្យមួយគូ ប៉ុន្តែជីវិតបានផ្លាស់ប្ដូរ១៨០ដឺក្រេ បន្ទាប់ពីបុរសម្នាក់បាននាំយុវជនសញ្ជាតិប្រេស៊ីលនេះឲ្យសម្រេចក្ដីសុបិន្ត ក្លាយជាកីឡាករលំដាប់ពិភពលោកនៅ Premier League។

Renato បច្ចុប្បន្នជាភ្នាក់ងាររបស់ Richarlison គឺជាមនុស្សដំបូងហើយដែលបានផ្ដល់កាដូជាទីគាប់ចិត្ត ឲ្យខ្សែប្រយុទ្ធសញ្ជាតិប្រេស៊ីល នូវស្បែកជើងទាត់បាល់ថ្មីមួយគួ ដែលពីមុនមកកុមារកើតពីគ្រួសារក្រីក្រមួយនេះធ្លាប់ពាក់តែស្បែកជើងចាស់ៗ។

Renato ទៀតសោតក៏បាននាំយកយុវជន ដែលធ្លាប់តែទាត់បាល់លើឆ្នេរខ្សាច់ក្នុងភូមិ ឲ្យទៅលេងលីគទី២របស់ប្រេស៊ីល ក្នុងឆ្នាំ២០១៤។ មួយឆ្នាំក្រោយមក បានផ្លាស់ទៅលេងឲ្យក្លឹប Fluminense នៅក្របខ័ណ្ឌកំពូលប្រេស៊ីល។ ទីបំផុត នៅចុងខែកក្កដា ២០១៧ ខ្សែជីវិតរបស់ Richarlison បានផ្លាស់ប្តូរទាំងស្រុង បន្ទាប់ពីបានផ្លាស់ទៅលេងឲ្យក្លឹប Watford ក្របខ័ណ្ឌកំពូល English Premier League ក្នុងតម្លៃខ្លួនជិត ១៥លានដុល្លារ (១១,២ លានផោន) ពោលគឺមុនពេល Marco Silva បានទៅដឹកនាំក្លឹប Watford មុននេះបន្តិច។

Richarlison មានស្រុកកំណើតនៅភូមិភាគអាគ្នេយ៍ជាប់ដែនសមុទ្រនៃប្រទេសប្រេស៊ីល មានឆ្នេរដ៏ស្រស់ស្អាត និង ជាតំបន់ឧស្សាហកម្មផលិតដែក និង ប្រេង ដ៏មានសក្ដានុពល។ ប៉ុន្តែកុមារប្រេស៊ីលរូបនេះ ជាកូនច្បងនៃបងប្អូន៥នាក់នៃគ្រួសារក្រីក្រ ដែលមានឪពុក ជាកម្មករកាត់ថ្ម និង ម្ដាយ ជាអ្នកបោសសម្អាត។

"ខ្ញុំធ្លាប់មើលបាល់ Premier League តាមកញ្ចក់ទូរទស្សន៍ពូខ្ញុំ ហើយស្រមៃថានឹងបានទៅលេងទីនោះថ្ងៃណាមួយ"។ កីឡាករវ័យ២១ឆ្នាំនិយាយ។

មនុស្សសំខាន់៣នាក់ពីក្រោយខ្សែជីវិតជោគជ័យ លើទឹកដីប៉ងប្រាថ្នា របស់ Richarlison

កីឡាករវ័យ២១ឆ្នាំនិយាយថា អ្នកចាំទី Heurelho Gomes របស់ Watford ដែលជាជនរួមសញ្ជាតិប្រេស៊ីលដូចគ្នា បានជួយគេគ្រប់យ៉ាង រាប់តាំងពីជួយរកផ្ទះ រថយន្ត ជាអ្នកណែនាំពីរបៀបរស់នៅលើទឹកដីថ្មីនៅអង់គ្លេស ជាអ្នកបកប្រែ និងមែនទែនទៅជាអ្នកសម្របសម្រួលតាំងពីការហូបចុកជាដើម។

Heurelho Gomes និង Troy Deeney អបអរគ្រាប់បាល់របស់ Richarlison

"និយាយឱ្យស្មោះទៅ ខ្ញុំមិនដឹងអ្វីទាំងអស់អំពី Watford ថាជា ទីក្រុង ឬ ក្រុមបាល់ទាត់។ ប៉ុន្តែខ្ញុំមានអារម្មណ៍កក់ក្ដៅខ្លាំងណាស់ កីឡាករ បុគ្គលិក អ្នកចាត់ការក្លឹប រួមក្រុមអ្នកគាំទ្របានស្វាគមន៍ខ្ញុំជាខ្លាំង "។ កីឡាករវ័យក្មេងសញ្ជាតិប្រេស៊ីលបាននិយាយ។

ជារួម ខ្សែជីវិតរបស់ កីឡាករវ័យក្មេងប្រេស៊ីល ផ្លាស់ប្តូរទាំងស្រុង នៅពេលបាន Renato បាននាំយករូបគេទៅលេងបាល់ទាត់កម្រិតអាជីព ក្លាយទៅជាកីឡាករលំដាប់ពិភពលោក និង ពេលទៅលេងឲ្យ Watford ដោយបានការជួយជ្រោមជ្រែងពីអ្នកចាំទីជាកីឡាកររួមសញ្ជាតិ ពិសេសរឿងភាសា ដោយសារតែកុមារភាពក្រីក្រ Richarlison មិនបានរៀនសូត្រជ្រៅជ្រះ និង ចុងក្រោយបានគ្រូបង្វឹកលោក Marco Silva សម្លឹងឃើញទេពកោសល្យ Richarlison ទិញចូល Watford ក្នុងតម្លៃ ១៥ លានដុល្លារ កាលពី១ឆ្នាំមុន ហើយ ពេលនេះ នៅពេលគ្រូបង្វឹកវ័យ៤១ឆ្នាំទៅដឹកនាំ Everton លោកថែមទាំងបញ្ចុះបញ្ចូលក្លឹបឲ្យចុះកុងត្រាយកយុវជននេះ ក្លាយជាកីឡាករបំបែកកំណត់ត្រាថ្លៃបំផុតរបស់ក្លឹប ក្នុងតម្លៃ៦៥លានដុល្លារ៕

ប្រភព៖ BBC | The Sun ប្រែសម្រួល៖ សុខ លាងហ៊ត