សំនួរមួយចំនួនទាក់ទងនឹងប្រព័ន្ធប្រតិបត្តិការ Android អ្នកក៏ប្រហែលជាធ្លាប់ឆ្ងល់ដែរ

2018-07-28 04:35:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Android ជាប្រព័ន្ធប្រតិបត្តិការស្មាតហ្វូនដ៏ពេញនិយមលើពិភពលោករបស់ក្រុមហ៊ុន Google មានអ្នកប្រើប្រាស់ច្រើនជាង ២ ពាន់លាននាក់។ ប្រព័ន្ធមានការប្រើប្រាស់យ៉ាងទូលំទូលាយ លើបណ្ដាលក្រុមហ៊ុនផលិតស្មាតហ្វូននានា មិនដូច iOS ត្រឹមប្រើលើផលិតរបស់ Apple ដូចជា iPhone ឬ iPad។

អ្វីជា Android? ជាប្រព័ន្ធប្រតិបត្តិការប្រភេទ Open Source (អាចយកប្រើបន្តបានដោយឥតគិតថ្លៃ) ដែលមានប្រភេទ Device ជាច្រើន ក្រៅពីស្មាតហ្វូនកំពុងប្រើប្រាស់ ដូចជាទូរទស្សន៍ រថយន្ត ឬទូរទឹកកក។

មិនជាខុសគ្នាប៉ុន្មាននោះទេរវាង ទូរសព្ទ Android និង iPhone គ្រាន់តែ Android ហាក់មានការគ្រប់គ្រងកែប្រែបានច្រើនជាង iOS មានការកំណត់ដោយ Apple។

Android device ភាគច្រើនមានលទ្ធភាពអាចដំណើរការ Launcher នានា ជាកម្មវិធីប្រើជំនួស Home Screen ធម្មតា ផ្លាស់ប្ដូររូបរាង Device ពីធម្មតាទៅមិនធម្មតាតាមចំណូលចិត្ត ពណ៌ និងរូបភាព។

អ្វីជា Stock Android? Stock Android ជាជំនាន់ដើមបានប្រើដោយ Google ឬជាស្រទាប់មូលដ្ឋានរបស់ Android មានកម្មវិធីស្តង់ដាររបស់ Google ដូចជា YouTube, Maps និង Google Drive តែមិនមានន័យថា ខ្វះខាតមុខងារសំខាន់ៗនោះទេ។ Stock Android ជាប្រព័ន្ធប្រតិបត្តិការល្អបំផុត ដំណើរការភាគច្រើនលើស្មាតហ្វូនត្រកូល Pixel ជាពិសេស របស់ Google បូកផ្សំនឹងមុខងារសំខាន់មួយចំនួន។

Stock Android លឿន ជាងជំនាន់ផ្សេងទៀតរបស់ Android ដោយសារស្រាល មិនមានអ្វីច្រើនដំណើរការនៅពីក្រោយ ប្រើ Resources (RAM និង CPU) ពេញលេញបានល្អ។

អ្វីជា Oreo? Nougat ឬ Oreo ជាជំនាន់អាប់ដេតរបស់ Android មានការផ្លាស់ប្ដូរទាំងរូបរាង បទពិសោធន៍ និងមុខងារថ្មីៗផងដែរ។ ជំនាន់អាប់ដេតទាំងនេះ មិនមានប្រើលើគ្រប់ Android device នោះឡើយ ទៅតាមម៉ូដែល និងលក្ខណៈសម្បត្តិស្មាតហ្វូន។ អាប់ដេតបន្ទាប់គឺ Android 9.0 ឬ Android P នឹងមានការផ្លាស់ប្ដូរបទពិសោធន៍អ្នកប្រើប្រាស់មួយបែបទៀត ខណៈបច្ចុប្បន្ននៅជាជំនាន់ Beta នៅឡើយ។

អ្វីជា Android Go ឬ Android One? Android Go ជាជំនាន់ Stock Android រចនាឡើងគោលដៅសម្រាប់ Device មានសមត្ថភាពទាប មិនអាចដំណើរការជំនាន់ចុងក្រោយរបស់ Android។ ទីផ្សារសំខាន់របស់ Android Go មានលើស្មាតហ្វូន ក្នុងប្រទេសឥណ្ឌា និងប្រេស៊ីល។

Android One ជាជំនាន់មុន Android Go ប្រភេទ Stock Android ប្រើភាគច្រើនលើស្មាតហ្វូនតម្លៃធូរថ្លៃដូចជា HTC U11 Life និង Moto X4។

SKIN Google មិនមែនជាក្រុមហ៊ុនតែមួយដែលផ្លាស់ប្ដូររូបរាង Android នោះឡើយ។ ក្រុមហ៊ុនផលិតស្មាតហ្វូននីមួយៗ មានជម្រើសអាចកែប្រែរូបរាង Android ប្រើលើ Device ផ្ទាល់ខ្លួន ទៅតាមការចង់បាន ចេញពីរូបរាងដើម Stock Android ដោយបន្ថែមមុខងារ រូបរាង បែបបទប្រើប្រាស់ តាមវិធីខ្លួន ខុសពីជំនាន់ Android ដទៃទៀត។

កុំបារម្ភការផ្លាស់ប្ដូរនេះ តែរូបរាង និងមុខងារមួយចំនួនប៉ុណ្ណោះ ខណៈកម្មវិធីប្រើប្រាស់ដូចធម្មតា។ ប៉ុន្តែបើ ចង់ប្រើប្រព័ន្ធមានការអាប់ដេតចុងក្រោយ ទាំងសុវត្ថិភាព និងដំណោះស្រាយបញ្ហាប្រព័ន្ធ គួរប្រើ Stock Android device ដូចជា Google Pixel ឬទូរសព្ទប្រើ Android One ដោយសារមានការអាប់ដេតដោយផ្ទាល់ពី Google។

ស្មាតហ្វូនកែប្រែរូបរាងក្រុមហ៊ុនដទៃទៀត អាចចំណាយពេលយូរជាង ដើម្បីអាប់ដេត។ ឧទាហរណ៍ Samsung Galaxy S8 អាប់ដេតឡើង Android 8.0 Oreo ក្នុងខែកុម្ភៈ ឆ្នាំ ២០១៨ ខណៈកំណែទម្រង់ចេញជាផ្លូវការតាំងពីខែសីហា ឆ្នាំ ២០១៧។

មែនទែនទៅ សុវត្ថិភាពជាចំណុចសំខាន់ត្រូវការអាប់ដេតទាន់ពេលវេលា ដើម្បីការពារប្រព័ន្ធ ខណៈរូបរាង និងមុខងារបានកែប្រែពីក្រុមហ៊ុនផលិតស្មាតហ្វូននានា ត្រឹមជាសម្បកខាងក្រៅប៉ុណ្ណោះ។ គួរមានការស្រាវជ្រាវ ចំណូលចិត្តផ្ទាល់ខ្លួន មុនពេលវិនិយោគ។

អ្វីជា Forked Android? Android ជាប្រភេទ Open Source កូដ និងមុខងារសំខាន់ៗ អាចប្រើតាមការចង់បាន ជាលទ្ធផលក្រុមហ៊ុនផលិតស្មាតហ្វូនជាច្រើន បង្កើតជំនាន់ Android ផ្ទាល់ខ្លួន។ Android បើកទូលាយក្នុងការប្រើជាប្រយោជន៍ តែសេវាកម្មរបស់ Google មិនដូច្នេះទេ ការចូលឃ្លាំងកម្មវិធីលើ Google Play Store ត្រូវចំណាយ ជាការចង់បានរបស់ក្រុមហ៊ុនផលិតស្មាតហ្វូន។

ក្រុមហ៊ុនខ្លះ មិនដើរតាមវិធី Google នោះឡើយ ទើបមាន Forked Android ដោយយក Android ជាមូលដ្ឋាន តែមិនភ្ជាប់ជាមួយប្រព័ន្ធ Google ឡើយ។

Fire Tablet របស់ Amazon ប្រព័ន្ធបានបង្កើតពី Android តែមិនមានកម្មវិធី និងសេវាកម្មរបស់ Google ក្នុងនោះឡើយ។ ក៏អាចឃើញលើស្មាតហ្វូនចិន មួយចំនួនផងដែរ មិនមាន Google Play Store នោះទេ៕