១ថ្ងៃ គេង៦ម៉ោង បូកនឹងគន្លឹះរៀនច្បាស់ ទើបសិស្សបាក់ឌុបម្នាក់ បាននិទ្ទេស A ពិន្ទុជិត ១០០ពេញ

2018-08-01 08:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលដែលការប្រឡងសញ្ញាប័ត្រមធ្យមសិក្សាទុតិយភូមិឆ្នាំ ២០១៨ កាន់តែខិតជិតចូលដល់ បេក្ខជនច្បាស់ជាបានត្រៀមខ្លួនជាស្រេច ដើម្បីចូលរួមប្រយុទ្ធ ក្នុងការបញ្ចេញសមត្ថភាព។

ក្រៅពីលទ្ធផលមួយជាប់ៗ សម្រាប់សិស្សខ្លះ ដែលស្រវាស្រទេញ រឿងជាប់ហើយ បាននិទ្ទេសល្អ ច្បាស់ជាប្រឹងខ្លាំង រហូតភ្លេចបាយភ្លេចទឹក ឬភ្លេចគេងជាដើម។

មិនដូច្នោះទេ ការរៀនដែលជោគជ័យ គឺតោងត្រូវមានគន្លឹះច្បាស់ ដែលសមស្រប។ នេះជាសម្ដីរបស់ អតីតសិស្សស្រីមួយរូប ដែលបានប្រលងបាក់ឌុប កាលពីឆ្នាំ២០១៧។ ជាលទ្ធផលគឺកញ្ញាទទួលបាននិទ្ទេស A ក្នុងលំដាប់ពិន្ទុខ្ពស់ ៩៩.៩០៦។

កញ្ញា ជ្រីវ សុគន្ធទេពី ជាអតីតសិស្សប្រលងសញ្ញាប័ត្រ បាក់ឌុប ឆ្នាំ២០១៧ រៀននៅវិទ្យាល័យជា ស៊ីម សន្ធរមុក នៅរាជធានីភ្នំពេញ។ បច្ចុប្បន្ន កញ្ញាជានិស្សិតឆ្នាំទី១ ផ្នែកសិក្សាអន្តរជាតិ នៃវិទ្យាស្ថានភាសាបរទេស សកលវិទ្យាល័យភូមិន្ទភ្នំពេញ។

ក្នុងកិច្ចសម្ភាសជាមួយ Sabay ក្នុងកម្មវិធីផ្សាយផ្ទាល់ បាក់ឌុបអនាគតខ្ញុំ រៀងរាល់ថ្ងៃចន្ទ ម៉ោង ១១ព្រឹក កន្លងទៅ កញ្ញា ជ្រីវ សុគន្ធទេពី បានប្រាប់ថា គន្លឹះរៀន និងការតាំងចិត្តខ្ពស់ គឺជាចំណុចសំខាន់ មុនកញ្ញាទទួលលទ្ធផលដូចការរំពឹងទុកនាំកិត្តិយសជូនគ្រួសារ និងសាលារៀន។

កញ្ញា ជ្រីវ សុគន្ធទេពី អតីតសិស្សនិទ្ទេស A ក្នុងលំដាប់ពិន្ទុខ្ពស់ ៩៩.៩០៦ បានរំលឹកប្រាប់ពីផែនការដែលបានរៀបចំយ៉ាងច្បាស់ នៅមុនកាលប្រលង ខិតចូលមកដល់ មិនមែន ដល់ពេលកៀកប្រលងទើបប្រឹងរៀននោះទេ។

១. ម៉ោងគេង

នេះជាកត្តាសំខាន់ដែលចាំបាច់ត្រូវកំណត់មុនគេ បើមិនចង់ដល់ថ្ងៃប្រលងធំ ដេកឈឺទាន់។ កញ្ញា ១ថ្ងៃ គេងចន្លោះពីចំនួន ៦ម៉ោង ឬលើសពីនេះតិចតួច គឺចូលគេងនៅពេលយប់ ភាគច្រើន នៅម៉ោង ១២ និងក្រោកពីគេងនៅម៉ោង ៦ព្រឹក។

២. គន្លឹះរៀនសំខាន់ៗ

អតីតសិស្ស A លំដាប់ពិន្ទុខ្ពស់រូបនេះ បានបញ្ជាក់ថា កញ្ញាបានរៀបចំផែនការរៀនច្បាស់លាស់ មុនការប្រលងមកដល់។ កញ្ញាក៏បានព្យាយាមសួរនាំសិស្សច្បង ស្រាវជ្រាវលំហាត់តាមអ៊ីនធឺណិត និងសួរលោកគ្រូ អ្នកគ្រូ ដែលមានបទពិសោធន៍ នៅពេល កញ្ញាទេពី មានសំណួរ ឬចម្ងល់នានា។

៣.ការរៀនគួរក្រៅបន្ថែម

និយាយដល់ចំណុចនេះ អតីតបេក្ខជនបាក់ឌុប ជ័យលាភីនិទ្ទេស A ក្នុងលំដាប់ពិន្ទុខ្ពស់ ៩៩.៩០៦ សឹងតែ១០០% រូបនេះ ប្រាប់ថា ខ្លួនបានចំណាយពេលរៀនគួរតិចបំផុត។

កញ្ញា រៀនគួរ តែមុខវិជ្ជាណា ដែលឆ្ងល់ ឬមិនសូវច្បាស់ ជាមួយគ្រូទទួលបង្រៀនក្នុងថ្នាក់តែម្ដង។

សល់ពេលប៉ុន្មានពីរៀននៅក្នុងថ្នាក់ គឺកញ្ញា ព្យាយាមជួបជុំមិត្តភក្តិ រៀនជាក្រុម ឬជួយណែនាំសិស្សនានា ដែលបានសួរ ជាជាងចាយពេលច្រើនរៀនគួរ ព្រោះមិនសូវជាល្អទេ បើល្គឹកណា យើងមិនបានអនុវត្តឲ្យច្រើន។

កញ្ញារំលឹកថា កាលនោះ មានសិស្សជាច្រើន មកពីថ្នាក់ផ្សេងៗបានសួរនាំពីការធ្វើលំហាត់ និងគន្លឹះដោះស្រាយ ឬគណនាលេខ ដោយមិនប្រើម៉ាស៊ីនគិតលេខជាដើម។

មុខវិជ្ជាដែលរៀនកញ្ញារៀនពូកែ គឺមុខវិជ្ជា វិទ្យាសាស្ត្រ ពិសេសផ្នែកលេខ និងមានប្រើរូបមន្ត មានគណិតវិទ្យា រូបវិទ្យា គីមីវិទ្យា និងជីវវិទ្យា ដោយពេលប្រលង ជាលទ្ធផល ៤មុខនេះ បានពិន្ទុខ្ពស់ និងនិទ្ទេស A។

កញ្ញារំលឹកថា មុនការប្រលងមកដល់ កញ្ញាមិនសូវជាសម្រុកខ្លាំងប៉ុន្មានទេ មានន័យថា រៀនតាមសម្រួល ព្រោះ កាន់តែកៀកថ្ងៃប្រលង យើងត្រូវប្រយ័ត្ន គឺបារម្ភក្រែងប៉ះពាល់សុខភាព ឈឺថ្កាត់ជាដើម រាំងស្ទះដល់ការទៅប្រលងមិនកើត គឺចប់ហើយ ការប្រឹងប្រឹងរបស់យើង។

អត្ថបទ៖ ពៅ រក្សា