ក្មេងប្រុសអាយុត្រឹម ៥ឆ្នាំសោះក្លាយជាអ្នកជំនាញ IT វ័យក្មេងបំផុតក្នុងលោក

2014-11-14 23:14:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារឿងនឹកស្មានមិនដល់ និងសឹងតែមិនគួរឲ្យជឿដែលក្មេងប្រុសអាយុត្រឹមតែ៥ឆ្នាំប៉ុណ្ណោះបានក្លាយជាអ្នកជំនាញ IT វ័យក្មេងបំផុតដោយបានប្រឡងជាប់វិញ្ញាសា IT របស់ Microsoft។

ក្មេងប្រុសដែលបានក្លាយជាអ្នកជំនាញព័ត៌មានវិទ្យានោះមានឈ្មោះ Ayan A Qureshi។ គេទើបតែបានចូលរៀនថ្នាក់បឋមសិក្សាប៉ុណ្ណោះ តែបានប្រឡងជាប់វិញ្ញាសា "ដើម្បីក្លាយជាអ្នកជំនាញ IT" ដែលរៀបចំឡើងដោយក្រុមហ៊ុនបច្ចេកវិទ្យាយក្ស Microsoft នៅសាកលវិទ្យាល័យ Birmingham City។ ការប្រឡងជាប់វិញ្ញាសារបស់ Microsoft នៅអាយុវ័យក្មេងបែបនេះធ្វើឲ្យ Ayan បំបែកកំណត់ត្រាពិភពលោកថ្មីមួយបន្ទាប់ពីកំណត់ត្រាចាស់ត្រូវបានបំបែកដោយក្មេងប្រុសអាយុ ៦ឆ្នាំមកពីប្រទេសប៉ាគីស្ថានឈ្មោះ Mehroz Yawar ។

Ayan នៅក្នុងបន្ទប់ Lab ផ្ទាល់ខ្លួន

ដំបូងបំផុតដែល Ayan ត្រូវបានឪពុករបស់គេជាអ្នកជំនាញ IT ណែនាំពីកុំព្យូទ័រ និងការដំឡើង Windows គឺចំពេលគេមានអាយុ ៣ឆ្នាំ។ ពេលនោះហើយទើបឪពុករបស់ក្មេងប្រុសដឹងថា Ayan ពិតជាមានដុងពីកំណើតខាងផ្នែកបច្ចេកវិទ្យា។ ក្រោយពីដឹងថាកូនរបស់ខ្លួនមានទេពកោសល្យពីកំណើតបែបនេះ Asim ក៏បានសាងសង់បន្ទប់កុំព្យូទ័រមួយនៅផ្ទះទុកឲ្យកូនប្រុសរបស់គាត់ហើយក៏បានពង្រឹងសមត្ថភាពរបស់ Ayan ដើម្បីត្រៀមប្រឡងវិញ្ញាសា IT របស់ Microsoft។

វិញ្ញាបនប័ត្ររបស់ Ayan A Qureshi ដែលចេញដោយ Microsoft

បន្ទាប់ពីរយៈពេល ៥ខែនៃការហ្វឹកហាត់នៅក្នុងបន្ទប់ Lab ក្មេងប្រុសអាយុ ៥ឆ្នាំរូបនេះក៏បានប្រឡងជាប់វិញ្ញាសាខាងលើប្រើពេលពីរម៉ោងដែលកាលនោះក៏មានមនុស្សធំចូលរួមប្រឡងដែរ ហើយបន្ទាប់មក Ayan ក៏ទទួលបានវិញ្ញាបនបត្របញ្ជាក់ពីសមត្ថភាពផ្នែក Supporting Windows 8.1 ពីក្រុមហ៊ុន Microsoft ផ្ទាល់។

"ខ្ញុំពិតជាមានមោទនភាពមែនទែនចំពោះកូនប្រុសម្នាក់នេះ"។ ឪពុករបស់ក្មេងប្រុសនិយាយទៅកាន់សារព័ត៌មាន Daily Mail។ លោកក៏បានបន្ថែមថា៖ "ពេលដែលខ្ញុំបង្រៀនអ្វីដល់ Ayan គេតែងតែចងចាំវាជានិច្ចនៅថ្ងៃបន្ទាប់"។

វិញ្ញាសាដែលដាក់ឲ្យបេក្ខជនទាំងអស់រួមទាំង Ayan ប្រឡងជាទម្រង់ពហុជ្រើសរើស បំពេញចន្លោះ និងបែបផែនផ្សេងទៀតទាក់ទងនឹងចំណេះដឹងផ្នែក Hardware, Software និងពីដំណើរការរបស់ Windowsដែលរៀបចំឡើងដោយ Microsoft សម្រាប់បេក្ខជនដែលចង់ក្លាយជាអ្នកជំនាញ IT។

បច្ចុប្បន្នក្មេងប្រុសដែលបានបំបែកកំណត់ត្រាពិភពលោករូបនេះពុំទាន់បានសម្រេចចិត្តថាចង់ធ្វើការងារអ្វីសម្រាប់ពេលអនាគតនៅឡើយទេ តែ Ayan សង្ឃឹមថាគេអាចធ្វើការងារមួយដែលទាក់ទងនឹងអ្វីដែលខ្លួនចូលចិត្តគឺគណិតវិទ្យា និងកុំព្យូទ័រ៕

អានព័ត៌មានបច្ចេកវិទ្យាសំខាន់ៗចុចត្រង់នេះ

ប្រែសម្រួល៖ ប៉ែត ផាន់និត ប្រភព៖ dailymail