គ្រូ Leicester និយាយចាក់ដោត ពេលឆ្លើយសំណួរថា Maguire មក Man Utd ឬអត់

2018-08-09 13:04:14
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្លឹប Leicester City លោក Claude Puel ក្នុងថ្ងៃនេះ បាននិយាយថា ខ្សែការពារ Harry Maguire នឹងបន្តនៅក្លឹប។

ក្នុងសន្និសីទសារព័ត៌មាន លោក Puel បាននិយាយ៖ "ខ្ញុំមានជំនឿចិត្តថាគេ (Maguire) នឹងទៅ Manchester United ប៉ុន្តែគេនឹងទៅទីនោះតែរយៈពេលពីរម៉ោងប៉ុណ្ណោះជាមួយយើងនៅថ្ងៃស្អែក"។

លោកអ្នកចាត់ការរូបនេះ បន្ត៖ "យើងចង់ទុកកីឡាករដែលល្អៗរបស់យើង ដើម្បីបន្តមហិច្ឆតារបស់ក្លឹប។ គេ (Maguire) បានត្រលប់មកវិញជាមួយស្នាមញញឹម។ គេគឺជាមនុស្សដ៏អស្ចារ្យណាស់។ គេបានបង្ហាញគុណភាពរបស់រូបគេតាមរយៈការលេងឲ្យក្រុមជម្រើសជាតិ។ គេត្រលប់មកវិញជាមួយស្មារតី និងឥរិយាបថយ៉ាងល្អ"។

Manchester United នឹងត្រូវប្រកួត Premier League ជាមួយ Leicester City នៅវេលា ២ រំលងអាធ្រាត្រថ្ងៃទី ១០ សីហាខាងមុខ។

ការបង្ហាញទម្រង់លេងល្អនៅក្លឹប Leicester City និងជាពិសេសនៅក្រុមជម្រើសជាតិអង់គ្លេសនៅក្នុង World Cup ធ្វើឲ្យ Maguire ស្ថិតក្នុងចំណោមបណ្ដាខ្សែការពារដែលត្រូវបានរាយការណ៍ថា Manchester United បានតាមប្រមាញ់។

ដោយក្លឹប Leicester ទើបប្រកាសពីការនាំចូលខ្សែការពារថ្មី Filip Benkovic កាលពីរសៀលថ្ងៃនេះ ធ្វើឲ្យសារព័ត៌មានជាច្រើនដាក់ការសង្ស័យថា កីឡាករ Maguire អាចនឹងមកចូលរួមជាមួយបិសាចក្រហម។

ទីផ្សារដោះដូរកីឡាករនៅអង់គ្លេស នឹងធ្វើការបិទក្នុងវេលាម៉ោង ១១ យប់ថ្ងៃនេះ (ម៉ោងនៅកម្ពុជា)៕

ប្រភព៖ Four Four Two ប្រែសម្រួល៖ ហ៊ីម រស្មី