យុវជនកម្ពុជា ៨រូបចេញទៅប្រកួតពានរង្វាន់មួយនៅប្រទេសប៊ុលហ្គារី

2018-08-13 07:26:37
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនថ្នាលបាល់ទាត់អង្គការផ្កាយសមុទ្រ ៨រូប មានឱកាសទៅប្រទេសប៊ុលហ្គារី ដើម្បីចូលរួមកម្មវិធីប្រកួតបាល់ទាត់ពានរង្វាន់ SATUC WORLD CUP BULGARIA 2018។

លោក សុភ័ក្ក មករា គ្រូបង្គោលដែលនាំកីឡាករ៨នាក់ចេញទៅប្រកួតពានរង្វាន់ខាងលើ បាននិយាយថាកម្មវិធីប្រកួតបាល់ទាត់នេះមានប្រទេសចូលរួមចំនួន១៦ប្រទេស។ ដោយក្នុងតំបន់អាស៊ីអាគ្នេយ៍មានចូលរួមតែប្រទេសកម្ពុជា និងឥណ្ឌូណេស៊ីប៉ុណ្ណោះ។ លោកថា ការប្រកួតនេះប្រទេសប៊ុលហ្គារីរៀបចំឡើង គឺដើម្បីផ្ដល់ឱកាសឱ្យក្រុមយុវជនដែលស្រលាញ់បាល់ទាត់នៅតាមបណ្ដាអង្គការក្នុងប្រទេសតំបន់អាស៊ី និងអឺរ៉ុបដែលមិនមានឱកាសបញ្ចេញសមត្ថភាពក្នុងកម្មវិធីបាល់ទាត់ធំ ឲ្យពួកគេទទួលបានឱកាសបញ្ចេញសមត្ថភាពតាមរយៈការប្រកួតប្រជែងនៅក្នុងកម្មវិធីប្រកួតពានរង្វាន់មួយនេះ។

ប្រធានក្រុមបាល់ទាត់យុវជនថ្នាលអង្គការផ្កាយសមុទ្របានប្ដេជ្ញាថា ខ្លួន និងមិត្តរួមក្រុមនឹងខិតខំប្រឹងប្រែងឱ្យអស់ពីលទ្ធភាព ដើម្បីទទួលបានលទ្ធផលល្អប្រសើរមួយមកកម្ពុជាវិញ ហើយរូបគេ និងមិត្តរួមអះអាងនិងនាំយកចំណេះដឹងដែលជាបទពិសោធល្អពីប្រទេសចូលរួមទាំងនោះមកចែករំលែកដល់មិត្តភ័ក្ដិរួមអាជីពនៅកម្ពុជា។

កម្មវិធីប្រកួតបាល់ទាត់ SATUC WORLD CUP BULGARIA 2018 ដំណើរការប្រកួតផ្លូវការចាប់ពីថ្ងៃទី១២រហូតដល់ថ្ងៃទី១៧ ខែសីហា ឆ្នាំ២០១៨ទើបបញ្ចប់។ ហើយការប្រកួតនេះមានប្រទេសមកពីក្នុងតំបន់អឺរ៉ុប និងអាស៊ីចូលរួមចំនួន១៦ប្រទេស។ ក្រុមយុវជនកម្ពុជា ឆ្លងកាត់បាន២ប្រកួតហើយ ក្នុងនោះស្មើក្រុមមកពីប្រទេសប៉េរូ ក្នុងលទ្ធផល ១-១ ហើយប្រកួតទី២ ឈ្នះក្រុមលីបេរីយ៉ាក្នុងលទ្ធផល ៥-០៕

អត្ថបទ៖ មុន្នីរម្យ