ប៊ុន សុធា រំលឹកប្រវត្តិជូរចត់ពីមុនមក ស្ទើរបោះបង់អាជីពប្រដាល់ចោល

2018-08-16 01:35:40
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ស្រករក្រោយ និងកំពុងសាងកេរ្តិ៍ឈ្មោះ ប៊ុន សុធា រំលឹកប្រវត្តិជូរចត់ក្នុងអាជីពប្រដាល់ទម្រាំមានថ្ងៃនេះ ពិបាកខ្លាំងស្ទើរតែបោះបង់ចោលហើយ ប៉ុន្តែដោយមានការតស៊ូ រួមទាំងលើកទឹកចិត្តពីឪពុកផងនោះបានដល់សព្វថ្ងៃ។

លោក ធន់ សុភា និង ប៊ុន សុធា(រូបភាពហ្វេសបុក)

ប៊ុន សុធា ប្រាប់ឲ្យដឹងថា អាជីពប្រដាល់នេះ គឺគេស្រឡាញ់តាំងតែពីតូចមកម្ល៉េះ និងតែងតែមើលការប្រកួតតាមទូរទស្សន៍ជានិច្ចជាមួយឪពុក ក្រៅពីនេះនិងចូលចាប់អាជីពនេះតែម្ដងនៅពេលដែលខ្លួនរៀនចប់។

រំលឹកទៅដល់ ៣ ទៅ ៤ឆ្នាំមុននេះ អ្នកប្រដាល់មកពីខេត្តកំពង់ចាមខាងលើលើកឡើងថា ទម្រាំចាប់អាជីពនេះបាន គឺពិបាកខ្លាំងណាស់ ពោលសុំគ្រូៗហាត់គេមិនយក ព្រោះមើលទៅរាងកាយមិនសមជាអ្នកកីឡា និងទម្ងន់ស្រាលទៀតផង។ ក្រៅពីការលំបាកមួយនេះ សុធា ក៏ជួបបញ្ហាទៅលើការស្នាក់នៅ លុយកាកចាយវាយ ការធ្វើដំណើរជាដើម។

ប៊ុន សុធា និង ថៃ រិទ្ធី(រូបភាពហ្វេសបុក)

កីឡាករល្អកែង និងជង្គង់រូបនេះបន្ថែមថា ដោយមានការពន្យល់ពីឪពុកឲ្យខំតស៊ូបន្តទៀត ហើយលោកតែងតែលើកទឹកចិត្តកុំឲ្យបោះបង់ផងនោះ ទើបជើងខ្លាំងស្នងគុនខ្មែរម្នាក់នេះ អាចមានមុខ និងបានឱកាសឡើងសង្វៀនដល់សព្វថ្ងៃ។

កីឡាករ ប៊ុន សុធា

ប៊ុន សុធា ជាកូនសិស្សលោក ធន់ សុភា នៅសមាគមប្រដាល់ក្រសួងការពារជាតិ បច្ចុប្បន្នកំពុងប្រកួតលើប្រភេទទម្ងន់ ៥៤គីឡូក្រាម និងជាបេក្ខភាពម្នាក់ដណ្ដើមខ្សែក្រវាត់គូបូតានៅសង្វៀនបាយ័ន។ អ្នកលេងគុនខ្មែររូបនេះចូលហ្វឹកហាត់ប្រដាល់អំឡុងឆ្នាំ២០១៤៕

អត្ថបទ៖ នួន ស៊ីណា