ពីមុនចង់បានប្ដីស្រីៗរក មាន សង្ហា ខ្ពស់ មាឌធំ តែឥឡូវបើអត់មាន៥យ៉ាងនេះ សុខចិត្តអត់លិឍ

2018-08-18 04:05:24
ចំនួនមតិ 0 | ចំនួនចែករំលែក 0

ចន្លោះមិនឃើញ

សង្ហា ខ្ពស់ មានទ្រព្យសម្បត្តិ គឺជាលក្ខណៈពិសេសរបស់បុរសដែលងាយនឹងទាក់ចិត្តបេះដូងនារីៗ តែមានចំណុចទាំងនេះក៏មិនទាន់អាចនិយាយថា ត្រូវតែមានមនុស្សស្រីដែលយល់ច្បាស់ពីរឿងអនាគតព្រមស្រលាញ់នោះដែរ។ នារីស្ទើរគ្រប់រូបតែងប្រាថ្នាចង់បានបុរសម្នាក់ ដែលមានចំណុចពិសេស៥យ៉ាងនេះ ក្រៅពីរូបសម្បត្តិ និងទ្រព្យធន។

១. មនុស្សដែលប្រាកដប្រជាជាមួយនាង

គ្មានមនុស្សស្រីឯណានៅលើលោកនេះ ចង់មានស្នេហាម្ដងហើយម្ដងទៀតនោះទេ ព្រោះបេះដូងនាងមិនមែនចង់បញ្ជាឲ្យស្រលាញ់អ្នកណាក៏ស្រលាញ់ ចង់ឲ្យស្អប់អ្នកក៏ស្អប់បានឡើយ។ នាងចង់ឲ្យមនុស្សប្រុសដែលនាងជ្រើសរើសជាមនុស្សដំបូង ហើយក៏ជាអ្នកចុងក្រោយ ដែលព្រមដឹកដៃនាងចូលរោងការ មិនមែនចូលមកក្នុងជីវិតនាងគ្រាន់តែប្រាថ្នាត្រឹមកាយនោះឡើយ។ មនុស្សប្រុសដែលច្បាស់លាស់នឹងរឿងគូស្រករនារីណាក៏ប្រាថ្នាចង់បានដែរ។

រូបតំណាង

**២. ប្រៀបដូចជាខែលតែងការពារនាងទោះក្នុងកាលៈទេសៈណាក៏ដោយ**

មិនថានាងកើតទុក្ខ នាងឈឺថ្កាត់ នាងមានបញ្ហាក្នុងជីវិត គឺមានវត្តមានបុរសដែលនាងស្រលាញ់នៅក្បែរនាងលើកទឹកចិត្ត ចាំជួយនាង ការពារនាង។ បើថ្ងៃណាមួយមានអ្នកដទៃព្យាយាមធ្វើអាក្រក់ដាក់នាង និយាយអាក្រក់ពីនាងបែបនេះបែបនោះ គឺត្រូវជឿជាក់លើនាង ហើយចាំការពារនាងជានិច្ច។ បុរសណាដែលមានលក្ខណៈបែបនេះ គឺតែងតែជាទីសុវត្ថិភាព និងកក់ក្ដៅបំផុតសម្រាប់មនុស្សដែលគេស្រលាញ់ ហើយនារីណាដែលមានបុរសបែបនេះជាគូស្នេហ៍ចាត់ទុកថាសំណាងណាស់។

៣. លែងសម្លឹងឃើញនារីណាល្អជាងនាងទោះនារីផ្សេងព្យាយាមឲ្យដៃក៏ដោយ

មនុស្សស្រីគ្រប់រូបតែងចង់បានបុរសម្នាក់ជាកម្មសិទ្ធបេះដូងនាង មិនអាចបែងចែកឲ្យអ្នកណាបានឡើយ។ នាងចង់បានបុរសម្នាក់ដែលជ្រើសរើសនាងជាមនុស្សចុងក្រោយ ហើយឃើញនាងក្នុងកែវភ្នែកជានារីដ៏ស្រស់ស្អាតជាងគេបំផុតក្នុងលោក។ មិនថាទៅថ្ងៃក្រោយគេជួបនារីណាដែលស្អាតជាងនាង ក៏មិនអាចធ្វើឲ្យបេះដូងរបស់គេរង្គោះរង្គើបានឡើយ ទោះនារីម្នាក់នោះព្យាយាមបើកដៃយ៉ាងណាក៏ដោយ។

រូបតំណាង

៤. រក្សាតម្លៃនាងទោះនាងធ្វើខុសឆ្គាំឆ្គងដោយប្រការណាមួយក៏ដោយ

ទោះទៅថ្ងៃក្រោយមានរឿងអ្វីកើតឡើង មិនថានាងនិយាយសម្ដីមិនពីរោះស្ដាប់ នាងធ្វើឲ្យមានកំហុសណាមួយ សូមកុំប្រើពាក្យជេរប្រមាថ ប្រើអំពើហិង្សាលើនាង ត្រូវចាំទុកថានាងមិនដែលមានចេតនាចង់ឲ្យរឿងនោះកើតឡើងនោះទេ អ្វីៗគ្រប់យ៉ាងព្រោះនាងស្រលាញ់បុរសម្នាក់នោះខ្លាំង។ មនុស្សស្រីទាំងអស់មិនអាចទ្រាំនឹងការប្រមាថមើលងាយពីមនុស្សដែលនាងស្រលាញ់ឡើយ។ ដូច្នេះទោះជាមានរឿងអ្វីកើតឡើងក៏ដោយ ត្រូវរក្សាតម្លៃនាង ក្នុងនាមជាមនុស្សដែលអ្នកស្រលាញ់ខ្លាំងបំផុត។

៥. ស្រលាញ់នាងមិនផ្លាស់ប្ដូរទោះទៅថ្ងៃក្រោយនាងធ្លាក់សម្រស់ក៏ដោយ

ជាមនុស្សស្រីទោះព្យាយាមរក្សាសម្រស់យ៉ាងណា ក៏មិនអាចឈ្នះជាមួយការងាររាប់ជំពូកទាំងក្នុង និងក្រៅផ្ទះ នាងត្រូវធ្វើម្ហូប ទុកដាក់ផ្ទះសម្បែង ត្រូវមានកូន ហើយត្រូវរកលុយ ដើម្បីផ្គត់ផ្គង់ជីវភាពទៀត។ ដូចនេះហើយបើស្រលាញ់នាងត្រឹមសម្រស់ នោះថ្ងៃណាមួយ អ្នកនឹងអស់ចិត្តពីនាង តែបើស្រលាញ់នាងដោយចេញពីបេះដូងពិតប្រាកដ នោះមិនថានាងស្បែកជ្រីវជ្រួញ សាច់លែងស ក៏អ្នកមិនអាចផ្លាស់ប្ដូរចិត្តបានឡើយ៕

អត្ថបទ៖ វឌ្ឍនៈ