កម្ពុជាប្រឹងអូសទាញបរទេសរកស៊ីផ្នែកអចលនទ្រព្យក្នុងលក្ខខណ្ឌពិសេសៗ

2018-08-25 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្ពុជាធ្វើជាម្ចាស់ផ្ទះលើកទី១ រៀបចំព្រឹត្តិការណ៍អចលនទ្រព្យក្នុងតំបន់អាស៊ាន ERANA Conventions And Exhibition ដែលបានប្រមូលផ្ដុំអ្នកជំនាញពីបណ្ដាប្រទេសទាំង៧ រួមមាន សិង្ហបុរី ថៃ វៀតណាម មីយ៉ាន់ម៉ា ម៉ាឡេស៊ី ហ្វីលីពីន និងកម្ពុជា។ កម្មវិធីនេះធ្វើរយៈពេលពីរថ្ងៃ ដោយចាប់ផ្តើមពីថ្ងៃទី២៤ ដល់២៥ ខែសីហា ២០១៨។

ឯកឧត្តម ម៉ី វ៉ាន់ អគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុ ថ្លែងថា វាជាឱកាសដ៏មានតម្លៃសម្រាប់កម្ពុជា បង្ហាញពីសក្ដានុពលនៃការវិនិយោគលើវិស័យអចលនទ្រព្យ ដែលក្នុងនោះកម្ពុជាបានបើកផ្លូវសម្រាប់អ្នកវិនិយោគបរទេសមានបំណងរកស៊ីទទួលទានលើការអភិវឌ្ឍលំនៅឋាននៅកម្ពុជាផងដែរ។

ឯកឧត្តម បញ្ជាក់ថា បច្ចុប្បន្ន ក្រសួងអនុញ្ញាតផ្ដល់អាជ្ញាបណ្ណដល់ម្ចាស់អាជីវកម្មអភិវឌ្ឍលំនៅឋានសាងសង់ចាប់ពី ០៤ ល្វែង ឬ ០៤ យូនីតឡើង និងរយៈពេលយ៉ាងយូរ ៣០ថ្ងៃ នៃថ្ងៃធ្វើការ ក្នុងការពិនិត្យ និងសម្រេចផ្តល់ ឬមិនផ្តល់អាជ្ញាបណ្ណ ឬបន្តសុពលភាពអាជ្ញាបណ្ណជូនក្រុមហ៊ុន។ សូមចុចទីនេះ ដើម្បីមើលលក្ខខណ្ឌលម្អិត។

លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ ព្រឹត្តិការណ៍ដ៏ធំនេះនាំមកនូវអ្នកជំនាញផ្នែកអចលនទ្រព្យ ពិសេសផ្នែកដីធ្លីពីជុំវិញពិភពលោក មកចូលរួមចែករំលែកបទពិសោធន៍របស់ពួកគេ ដល់អ្នកចូលរួមក្នុងព្រឹត្តិការណ៍នេះ ដែលអ្នកចូលរួមមិនត្រឹមតែអាចសិក្សាពីបទពិសោធថ្មីៗនោះទេ តែពួកគេក៏អាចចាប់ដៃគូសហការជាមួយក្រុមហ៊ុនជាតិ អន្តរជាតិដែលចូលរួមក្នុងព្រឹត្តិការណ៍នេះ ដើម្បីវិនិយោគរួមគ្នាផងដែរ។

លោកគីម ហ៊ាងបានបន្តថា “ព្រឹតិការណ៍នេះជាការនាំកម្ពុជាទៅកាន់ពិភពលោក និងនាំពិភពលោកមកកាន់កម្ពុជា ហើយនេះជាមោទនភាពរបស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា”។

យោងតាមរបាយការណ៍របស់ក្រសួងដែនដី បានឲ្យដឹងថា គិតត្រឹមខែធ្នូ ឆ្នាំ ២០១៧ មានគម្រោង ៣០៥២ គម្រោងលើផ្ទៃដី១១លានម៉ែត្រការ៉េ ក្នុងទំហំទឹកប្រាក់ ៦ពាន់លានដុល្លារ ខណៈឆមាសទី១ ឆ្នាំ២០១៨ មាន១១៦៤៣ គម្រោង ផ្ទៃដី ៥លានម៉ែត្រការ៉េ ទំហំទឹកប្រាក់ជាង ២ពាន់លានដុល្លារ ៕

អត្ថបទ៖ ស៊ិន សាវ៉េត