Ferrari ឆ្នាំ១៩៦២ លក់ដេញថ្លៃបានតម្លៃថ្លៃបំផុតក្នុងប្រវត្តិសាស្ត្រ

2018-08-27 08:09:23
ចំនួនមតិ 0 | ចំនួនចែករំលែក 0

ចន្លោះមិនឃើញ

Ferrari 250 GTO ជាប្រភេទរថយន្តដ៏កម្រមួយ ដែលផលិតនៅអំឡុងឆ្នាំ១៩៦២ ហើយវាត្រូវគេលក់ដេញថ្លៃបានក្នុងតម្លៃមិនធ្លាប់មានគឺចំនួន ៤៨,៤លានដុល្លារ។ ការលក់នេះ ធ្វើឡើងនៅព្រឹត្តិការណ៍ដេញថ្លៃល្បីឈ្មោះ RM Sotheby's ស្ថិតក្នុងទីក្រុង Monterey រដ្ឋ California កាលពីថ្ងៃទី២៥ ខែសីហា ឆ្នាំ២០១៨។

រថយន្ត Ferrari 250 GTO ឆ្នាំ១៩៦២ ត្រូវបានផលិតឡើងក្នុងចំនួនត្រឹមតែ ៣៦គ្រឿងប៉ុណ្ណោះនៅលើពិភពលោក ដោយក្នុងនោះរថយន្តនីមួយៗសុទ្ធតែមានលក្ខណៈប្លែកខុសពីគ្នាបន្តិចបន្តួច។

រថយន្តដែលទើបលក់ចេញនេះ មិនធ្លាប់ទទួលរងការខូចខាត ឬធ្លាប់ជួសជុលអ្វីនោះឡើយ បើទោះជាវាត្រូវគេប្រើសម្រាប់ក្នុងការប្រណាំងរថយន្តជាច្រើនលើកច្រើនសាមកហើយ នៅអំឡុងទសវត្សឆ្នាំ៦០។ ផ្ទុយទៅវិញ វាជារថយន្តដែលធ្លាប់ឈ្នះតំណែងជើងឯកថ្នាក់ជាតិ ព្រមទាំងពានរង្វាន់ធំៗមួយចំនួនថែមទៀតផង។

លោក Greg Whitten អតីតនាយកប្រតិបត្តិក្រុមហ៊ុន Microsoft បានទិញរថយន្ត Ferrari 250 GTO នេះ កាលពីឆ្នាំ២០០០ ក្នុងតម្លៃប្រមាណជា ១០លានដុល្លារ។

សូមជម្រាបថា តម្លៃបំបែកកំណត់ត្រានៃការលក់ដេញថ្លៃរថយន្តលើកមុន មានចំនួន ៣៨លានដុល្លារសម្រាប់ប្រភេទរថយន្ត Ferrari 250 GTO ផលិតឆ្នាំ១៩៦៣។ បន្ទាប់ពីការលក់នៅឆ្នាំ២០១៤ រថយន្ត Ferrari 250 GTO ឆ្នាំ១៩៦៣ ត្រូវគេលក់ជាលក្ខណៈឯកជនបានតម្លៃ ៧០លានដុល្លារ កាលពីដើមឆ្នាំ២០១៨៕

ប្រភព៖ Kley Kley ប្រែសម្រួល ៖ ឈាង.