iPhone ស៊េរីឆ្នាំ ២០១៨ ទាំងបីម៉ូដែល ចាប់ផ្ដើមចូលរោងចក្រហើយ

2018-08-28 02:34:30
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការចុះផ្សាយរបស់សារព័ត៌មាន Bloomberg បានឲ្យដឹងថា រោងចក្រ Foxconn របស់តៃវ៉ាន់បានចាប់ផ្ដើមការដំឡើង iPhone ស៊េរីឆ្នាំ ២០១៨ ពីរម៉ូដែលដែលប្រើប្រាស់អេក្រង់ OLED ចាប់តាំងពីចុងខែកក្កដាកន្លងទៅម្ល៉េះ។

គេថែមទាំងដឹងទៀតថា ដោយសារតែមានបញ្ហាជាមួយនឹងអេក្រង់ លើ iPhone ប្រើប្រាស់អេក្រង់ LCD ហេតុនេះដំណើរការដំឡើង iPhone អេក្រង់ LCD ទើបបានចាប់ផ្ដើមនៅដើមខែសីហានេះប៉ុណ្ណោះ។ មានការសង្ស័យថា iPhone អេក្រង់ LCD អាចនឹងត្រូវពន្យារពេលចេញលក់ ដោយអាចអូសបន្លាយដល់ខែវិច្ឆិកាឯណោះ។

iPhone X ឆ្នាំ ២០១៧

អ្នកវិភាគល្បីឈ្មោះលោក Ming Chi Kuo ក៏បានលើកឡើងដែរថា Foxconn នឹងទទួលរ៉ាប់រងដំឡើង iPhone អេក្រង់ OLED ទំហំ ៥,៨ អ៊ីញទាំងអស់ ហើយដំឡើង iPhone អេក្រង់ OLED ទំហំ ៦,៥ អ៊ីញប្រមាណ ៨០% ទៅ ៩០%។ ចំណែក iPhone ប្រើអេក្រង់ LCD ទំហំ ៦,‌១ អ៊ីញ វិញ Foxconn នឹងផលិតទទួលដំឡើង ៣០%។

រោងចក្រ Pegatron នឹងទទួលដំឡើង ៦០% នៃ iPhone អេក្រង់ LCD និង ១០% ទៅ ១៥% នៃ iPhone អេក្រង់ OLED ទំហំ ៦,៥ អ៊ីញ។ នៅសេសសល់ទាំងប៉ុន្មានគឺរោងចក្រ Wistron ជាអ្នកដំឡើង។

សម្រាប់ឆ្នាំ ២០១៨ នេះ គេជឿជាក់ថា Apple នឹងប្រកាសចេញ iPhone ស៊េរីថ្មីចំនួន ៣ ប្រភេទ មានពីរប្រភេទប្រើអេក្រង់ OLED និងមួយប្រភេទប្រើអេក្រង់ LCD មានតម្លៃធូរថ្លៃ។ ស្មាតហ្វូនទាំងបីនឹងមានរចនាបថដូចគ្នា ដោយមានក្បាលឆក និងមានមុខងារស្កេនមុខដើម្បីដោះសោ។ គេរំពឹងថា iPhone ឆ្នាំ ២០១៨ នឹងប្រកាសចេញនៅថ្ងៃទី ១២ ខែកញ្ញា នៅទីស្នាក់ការថ្មីរបស់ Apple៕

ប្រភព៖ PhoneArena ប្រែសម្រួល៖ សុខហេង