«ទីក្រុងវៃឆ្លាត» របស់កម្ពុជាបានក្លាយជាប្រធានបទនៃពិព័រណ៍អន្តរជាតិ CAMBUILD ២០១៨

2018-09-03 08:17:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ការតាំងពិព័រណ៍វិស័យស្ថាបត្យកម្មអាគារ និងសំណង់ អន្តរជាតិធំជាងគេបំផុតនៅកម្ពុជា CAMBUILD 2018 នឹងផ្ដោតសំខាន់លើប្រធានបទ "គំនិតច្នៃប្រឌិត" នៃការរចនា និងការរៀបចំបែបទីក្រុងបៃតងសម្រាប់ "ទីក្រុងវៃឆ្លាត" ស្របតាមគម្រោងអភិវឌ្ឍទីក្រុងអនាគតនៅកម្ពុជា។ ការតាំងពិព័រណ៍នេះនឹងត្រូវធ្វើឡើងរយៈពេល ៣ថ្ងៃ គឺថ្ងៃទី ១២ -១៣ និង ១៤ កញ្ញា ២១០៨ នៅសាលពិព័រណ៍កោះពេជ្រ។

ក្រៅពីការតាំងពិព័រណ៍នេះ ក៏មាន "វេទិកាស្ថាបត្យករកម្ពុជាលើកទី ២” ដែលមានការគាំទ្រពីសំណាក់អ្នកជំនាញក្នុងស្រុកនិង អន្តរជាតិ ដើម្បីមកចែករំលែកចំណេះដឹង និងជំនាញដែលនឹងបង្កើតមូលដ្ឋានគ្រឹះសម្រាប់ការកសាងទីក្រុងឆ្លាតវៃនាពេលអនាគតសម្រាប់កម្ពុជា។ នេះបើយោងតាមការប្រកាសនៅក្នុងសន្និសីទសារព័ត៌មានដោយឯកឧត្តម ភឿន សោភ័ណ អគ្គលេខាធិការក្រុមប្រឹក្សាភិបាលស្ថាបត្យករកម្ពុជា និងរដ្ឋលេខាធិការនៃក្រសួងដែនដីនគរូបនីយកម្ម។

សន្និសីទសារព័ត៌មាន CAMBUILD 2018

«គំនិតផ្ដួចផ្ដើមរបស់ទីក្រុងវៃឆ្លាតនឹងធ្វើឲ្យទីក្រុងរបស់យើងកាន់តែមានសុវត្ថិភាព ប្រសិទ្ធភាព និងនិរន្តរភាពអមជាមួយបរិស្ថានល្អ ដោយផ្ដោតលើគំនិតនេះយើងសង្ឃឹមថាអ្នកសាងសង់ ស្ថាបត្យករ អ្នករចនា វិស្វករ និង អ្នកអភិវឌ្ឍន៍នឹងរក្សាគំនិតក្នុងការសាងសង់ទីក្រុងវៃឆ្លាត ក្នុងការអភិវឌ្ឍគម្រោងថ្មីៗ»។ នេះបើយោងតាមការលើកឡើងរបស់លោក Andrew Siow នាយកក្រុមហ៊ុន AMB Tarsus Events Group ដែលជាអ្នករៀបចំកម្មវិធី CAMBUILD 18 ។

«នេះជាលើកទី ៨ហើយ ដែលយើងរៀបចំឲ្យមាន CAMBUILD ដែលជាព្រឹត្តិការណ៍ដ៏មានអត្ថប្រយោជន៍បំផុត សម្រាប់ ស្ថាបត្យករ អ្នករចនា អ្នកអភិវឌ្ឍ វិស្វករ អ្នកម៉ៅការ អ្នកផ្គត់ផ្គង់ និងអ្នកចែកចាយ ដោយពួកគេនឹងជួបផ្ទាល់ជាមួយអ្នកផ្គត់ផ្គង់ផលិតផលថ្មីៗជាមួយបច្ចេកវិទ្យាទំនើបៗ និងទទួលបានគំនិតច្នៃប្រឌិតជាច្រើននៅក្នុងឧស្សាហកម្មសំណង់»។

រូបភាពពី CAMBUILD 2017

នឹងមានការចូលរួមតាំងពិព័រណ៍សរុប ៣៥០ក្រុមហ៊ុន ដូចជា ក្រុមហ៊ុនសម្ភារៈសំណង់ ការគ្រប់គ្រងអគារ ប្រព័ន្ធសន្តិសុខ និងសុវត្ថិភាព ថាមពលនិង អគ្គិសនី គ្រប់គ្រង់ប្រព័ន្ធគ្រប់គ្រងទឹក និងបន្សុតទឹក និងប្រព័ន្ធគ្រប់គ្រងម៉ាស៊ីនត្រជាក់ទំនើបជាដើម ពិសេសមានម៉ាកផលិតផលអន្តរជាតិមកពី ២៣ប្រទេសរួមមាន ចិន អ៊ីតាលី ជប៉ុន កូរ៉េខាងត្បូង អាល្លឺម៉ង់ ម៉ាឡេស៊ី តៃវ៉ាន់ ថៃ សិង្ហបុរី និងវៀតណាម និងអមកម្មវិធីផ្ដល់ជូនពិសេសៗភ្ជាប់ជាមួយការបញ្ចុះតម្លៃជាច្រើនផងដែរ ។

ចូលរួមដោយសេរី និងឥតគិតថ្លៃ សម្រាប់ពាណិជ្ជករ និងអ្នកជំនាញខាងវិស័យឧស្សាហកម្មសំណង់ ស្ថាបត្យករ និង វិស្វករ។ ពិព័រណ៍នេះក៏នឹងផ្ដល់ជូននូវឱកាសបង្កើតទំនាក់ទំនងអាជីវកម្មផងដែរ៕