ប្រាក់ចំណូល Real Madrid កើនឡើងច្រើនបំផុតក្នុងរយៈពេល១៨ឆ្នាំ

2018-09-09 07:05:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាក់ចំណូលរបស់ក្លឹបយក្សអេស្ប៉ាញ ក្នុងរយៈពេល ១២ ខែចុងក្រោយនេះ គឺជាចំណូលច្រើនបំផុតរបស់ក្លឹប គិតចាប់តាំងពីឆ្នាំ ២០០០ នៅពេលដែល Florentino Perez បានក្លាយជាម្ចាស់ក្លឹប Real Madrid។ នេះបើតាមការចុះផ្សាយរបស់សារព័ត៌មាន Goal។

ក្លឹបរហ័សនាម Los Blancos បានប្រកាសប្រាក់ចំណូលនៅលើវេបសាយផ្លូវការរបស់ខ្លួនថា ក្លឹបរកចំណូលបាន ៧៥០,៩ លានអឺរ៉ូ (ប្រហែល ៨៧៤ លានដុល្លារ) កាលពីរដូវកាល ២០១៧/១៨ ជាឆ្នាំដែល Zidane បានដឹកនាំ Real Madrid ឈ្នះពានរង្វាន់ UEFA Champions Leauge ៣ឆ្នាំជាប់ៗគ្នា។

ចំណេញដុលរបស់ក្លឹបបន្ទាប់ពីផាត់ទាត់រាល់ការចំណាយនានា មានចំនួន ៣១,២ លានអឺរ៉ូ (៣៦ លានដុល្លារ) ហើយ ក្លឹបយក្សមួយនេះចំណេញជាប់ៗគ្នា៣ឆ្នាំមកហើយ។

តួលេខនេះធ្វើឲ្យក្លឹបកើនប្រាក់ចំណូល ១១,៣% បើធៀបនឹងរដូវកាល២០១៦/១៧ ហើយ ជាប្រាក់ចំណូលខ្ពស់បំផុតរបស់ពួកគិតតាំងពីឆ្នាំ ២០០០ មក។ ប្រភពខាងលើបន្ត។

ការព្យាករណ៍រំពឹងថា រដូវកាលនេះ Real សង្ឃឹមនឹងបន្តកើនប្រាក់ចំណូល ៧៥២ លានអឺរ៉ូ (៨៧៥ លានដុល្លារ) ដោយមិនរាប់បញ្ចូលការលក់កីឡាករ ហើយ សង្ឃឹមថា ចំណេញដុល នឹងកើនពី ៣៦ លានដុល្លារ កាលពីរដូវកាលមុន ទៅដល់ ៥០ លានដុល្លារ នៅរដូវកាល ២០១៨/១៩ នេះ។

ទោះបីជា Cristiano Ronaldo ម្ចាស់ពាន Ballon d'Or ៥សម័យកាលចាកចេញពីក្លឹប ប៉ុន្តែ Real Madrid នៅតែសង្ឃឹមថាគ្រូបង្វឹក Julen Lopetegui អាចបន្តជួយក្លឹប ដើម្បីគ្រប់គ្រងតំណែងជើងឯកកំពូលទ្វីបអឺរ៉ុប ជាលើកទី៤ ក្រោយ Zidane លាឈប់។

យុទ្ធនាការស្វែងរកពាន Champions League ៤ឆ្នាំជាប់ៗគ្នារបស់ Real នឹងត្រូវចាប់ផ្តើមដោយប្រកួតដំបូងរបស់គេនឹងបើកទ្វារស្វាគមន៍ Roma នៅរាត្រីថ្ងៃទី ១៩ ខែសីហានេះ៕

ប្រភព៖ Goal ប្រែសម្រួល៖ សុខ លាងហ៊ត