ដឹងច្បាស់ពីគោលការណ៍ "សាលាជំនាន់ថ្មី" គ្រប់គ្នានឹងពេញចិត្តបំផុត

2018-09-19 03:31:34
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលារៀនជំនាន់ថ្មី គឺជាកម្មវិធីកំណែទម្រង់ប្រព័ន្ធអប់រំខ្នាតធំរបស់ក្រសួងអប់រំ។ គម្រោងនេះ រដ្ឋាភិបាលត្រូវចំណាយប្រាក់ជិតមួយលានដុល្លារដើម្បីចាប់ផ្តើមនេះ ផ្តោតសំខាន់ទៅលើទំនើបកម្មនៃការរៀន បង្រៀន គ្រឿងបរិក្ខារ។

អ្វីដែលប្លែកក្នុងកម្មវិធីសាលាជំនាន់ថ្មីមានភាពខុសគ្នាពីកម្មវិធីដែលសាលាចំណេះដឹងទូទៅនានា ពោលគឺផ្តោតលើមុខវិជ្ជាសំខាន់ៗមួយចំនួនមានដូចជា វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (Science, Technology, Engineering and Mathematics) ហើយសិស្សដែលអាចចូលរៀនសាលានេះបាន ចាំបាច់ត្រូវប្រឡងចូលជាមុន។ ចំពោះការអនុវត្តក្នុងការសិក្សាជាប្រចាំថ្ងៃដូចជា ៖

- ការសិក្សាមាន ២ ពេលក្នុង ១ ថ្ងៃ (៧ ម៉ោង) ចាប់ពីថ្ងៃចន្ទ ដល់ថ្ងៃសៅរ៍

- សិស្សក្នុង ១ ថ្នាក់ត្រូវបានកំណត់ចន្លោះពី ៣០-៣៥ នាក់

- មានសម្ភារឧបទេសគ្រប់គ្រាន់ក្នុងការរៀន និងបង្រៀន

- មានកម្មវិធីសិក្សាភាសាបរទេស និងកុំព្យូទ័រជាដើម។

ប៉ុន្តែជុំវិញការបង្កើតសាលាជំនាន់ថ្មីនេះឡើង ធ្វើឲ្យគ្របង្រៀនក្នុងសាលារដ្ឋ ពោលគឺលោកគ្រូអ្នកគ្រូនៅវិទ្យាល័យព្រះស៊ីសុវត្ថិមិនពេញចិត្ត ផ្ទុះការតវ៉ានៅថ្ងៃទី១៨ កញ្ញា ២០១៨ ឲ្យក្រសួងអប់រំដកសាលាជំនាន់ថ្មីចេញសាលារដ្ឋមួយនេះ។

ចុចអាន៖ ក្រសួងបំភ្លឺច្បាស់ៗ រឿងគេផ្អើលថា វិទ្យាល័យព្រះស៊ីសុវត្ថិដូរជាសាលាឯកជន និងបង់ថ្លៃ

ជាមួយគ្នានេះ លោក សម្យ កឹមសាន្ត ជានាយកគ្រប់គ្រងសាលាជំនាន់ថ្មី និងជានាយករងនៃវិទ្យាល័យព្រះស៊ីសុវត្ថិ ចេញមុខបង្ហាញពីគោលបំណងនៃការបង្កើតសាលាជំនាន់ថ្មីនេះឡើង ព្រោះហេតុផលសំខាន់ខាងក្រោមនេះ៖

លោក សម្យ កឹមសាន្ត

គំនិតសម្រាប់ការធ្វើកំណែទម្រង់ប្រព័ន្ធអប់រំត្រូវផ្តួចផ្តើមឡើងដំបូងដោយអង្គការ KAPE ដែលជាអង្គការក្នុងស្រុកធំបំផុតដែលផ្តោតសំខាន់ទៅលើវិស័យអប់រំនៅកម្ពុជា ហើយក្រោយអង្គការនេះត្រូវបានអនុម័ត និងត្រូវបានឧបត្ថម្ភថវិកាដោយក្រសួងអប់រំ យុវជន និងកីឡា។ កម្មវិធីសាកល្បងរបស់ពួកគេដែលជាគំនិតផ្តួចផ្តើមសាលា Beacon ត្រូវបានស្ថាបនាឡើងនៅឆ្នាំ ២០១៤ នៅខេត្តកំពង់ចាមហើយនៅពេលដែលកម្មវិធីមានការពង្រីកធំទៅៗ សាលានេះក៏ក្លាយជាសាលាជំនាន់ថ្មី New Generation School (NGS) នេះឯង។

គោលបំណងរបស់ NGS គឺការបង្កើតសាលារដ្ឋដែលរក្សាបាននូវស្តង់ដារនៃការអប់រំបានខ្ពង់ខ្ពស់បំផុតតាមរយៈការវិនិយោគថវិកាច្រើន។ NGS ផ្តោតទៅលើការពង្រឹងតម្លាភាព និងទទួលខុសត្រូវដោយការផ្លាស់ប្តូរវិធីគ្រប់គ្រងសាលា។ នេះគឺជាការខុសប្លែកពីវិធីសាស្ត្រប្រពៃណីរបស់រដ្ឋាភិបាលដែលរមែងតែងតែបែងចែកមូលនិធិស្មើៗគ្នាទាំងអស់។

ប្រសិនបើមិនមានការទទួលខុសត្រូវក្នុងការគ្រប់គ្រងសាលារៀនទេនោះ សម្ភារបរិក្ខារដូចជាបន្ទប់ពិសោធវិទ្យាសាស្ដ្រនឹងមិនត្រូវបានប្រើប្រាស់ឲ្យអស់ពីសមត្ថភាពទេពីព្រោះគ្រូបង្រៀនរវល់តែស្វិតស្វាញក្នុងការបង្រៀនគួរយកលុយក្រៅម៉ោងវិញ និងមានភាពលម្អៀងទៅលើសិស្សរៀនគួរជាងសិស្សដែលមិនមានលុយរៀនគួរ។

សាលាជំនាន់ថ្មីព្យាយាមដោះស្រាយបញ្ហានេះ ដោយការលុបបំបាត់ការអនុវត្តបែបនេះទាំងស្រុង។ គ្រូបង្រៀនត្រូវបានជ្រើសរើសយ៉ាងល្អិតល្អន់ និងទទួលបានអត្ថប្រយោជន៍ជាច្រើនដូចជាការផ្តល់អាហារូបករណ៍ដើម្បីពង្រឹងគុណធម៌ក្នុងការបង្រៀន និងសុចរិតភាព។ គេបានសង្កេតឃើញថានៅក្នុងបរិយាកាសថ្មីនេះគ្រូបង្រៀនលែងមានការប្រកួតប្រជែងជាមួយគ្នាដើម្បីទាក់ទាញអតិថិជនដែលជាសិស្សនោះទេ ហើយវាធ្វើឲ្យការពង្រឹងគុណភាពនេះប្រព្រឹត្តទៅដោយរលូន។

"វាមានន័យចឹង មិនមែនគេមានបំណងលុបចោលសាលាព្រះស៊ីសុវត្ថិទេ។ មានន័យថា សាលាព្រះស៊ីសុវត្ថិ នៅតែជាសាលាព្រះស៊ីសុវត្ថិ ប៉ុន្តែគេគ្រាន់តែបញ្ចូលកម្មវិធីសិក្សាគឺមានការកែទម្រង់តាម NGS" ។ លោកនាយករងបន្ថែម។

គូសបញ្ជាក់បន្ថែមថា សម្រាប់ឆ្នាំសិក្សា ២០១៧-២០១៨ នេះក្រសួងអប់រំ យុវជន និងកីឡា បានចាប់ផ្ដើមអនុវត្តកម្មវិធីនេះនៅសាលាគោលដៅចំនួន ៣ ដែលរួមមាន វិទ្យាល័យព្រះស៊ីសុវត្ថិ (រាជធានីភ្នំពេញ) សាលាបឋមសិក្សាអង្គរបាន (ខេត្តកំពង់ចាម) និងសាលាបឋមសម្តេចព្រះរាជអគ្គមហេសី នរោត្តមមុនីនាថ សីហនុ (ឧដុង្គខេត្តកំពង់ស្ពឺ)។

អត្ថបទ៖ ស៊ិន សាវ៉េត