រឿងលក់អាចថា Apple ចាញ់គេ តែបើលុយចំណេញវិញស៊ីដាច់ក្រុមហ៊ុនណាៗទាំងអស់

2018-09-20 02:06:19
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីដើមខែសីហាកន្លងទៅ Huawei បានផ្ដួល Apple ឡើងឈរតំណែងលេខពីរ ជាក្រុមហ៊ុនលក់ស្មាតហ្វូនបានច្រើនជាងគេប្រចាំត្រីមាសទី ២ ឆ្នាំ ២០១៨ ខណៈដែល Samsung ឈរនៅតំណែងលេខមួយ។

ត្បិតថា Apple លក់ស្មាតហ្វូនបានតិចជាង Samsung និង Huawei ប៉ុន្តែបើមើលលើប្រាក់ចំណេញវិញ ក្រុមហ៊ុនផលិត iPhone នេះស៊ីដាច់ក្រុមហ៊ុនជាគូប្រជែងដទៃទៀតតែម្ដង។ តាមរយៈរបាយការណ៍របស់ Counterpoint Research បានបង្ហាញថា Apple ក្ដោបក្ដាប់ប្រាក់ចំណេញពីទីផ្សារស្មាតហ្វូនបានសរុប ៦២% ក្នុងត្រីមាសទី ២ ឆ្នាំ ២០១៨។

ក្នុងត្រីមាសដដែលនេះ Samsung ក្ដោបក្ដាប់ផលចំណេញបានពីការលក់ស្មាតហ្វូនត្រឹម ១៧% ប៉ុណ្ណោះ ខណៈឯ Huawei ក្ដោបក្ដាប់បាន ៨% និងតាមពីក្រោយដោយក្រុមហ៊ុនចិនបីទៀតរួមមាន Oppo (៥%), Vivo (៤%) និង Xiaomi (៣%)។

របាយការណ៍របស់ Counterpoint Research បានបង្ហាញដែរថា Apple ក្ដោបក្ដាប់ប្រាក់ចំណេញបាន ៨៨% ពីទីផ្សារស្មាតហ្វូនដែលមានតម្លៃចាប់ពី ៨០០ ដុល្លារឡើង។ ចំណែកទីផ្សារស្មាតហ្វូនតម្លៃ ៦០០ – ៨០០ ដុល្លារ កាន់កាប់ដោយ Apple ៤៤% រួមជាមួយ Samsung កាន់កាប់ ៤១%។

ចំពោះទីផ្សារស្មាតហ្វូនតម្លៃ ៤០០ – ៦០០ ដុល្លារវិញ នាំមុខដោយ Oppo និង Apple ដែលកាន់កាប់ចំណែក ២២% ដូចគ្នា។ Samsung កាន់កាប់ ១៦%, Huawei កាន់កាប់ ១៤%, Xiaomi ៦% និង OnePlus ៥%៕

ប្រភព៖ PhoneArena ប្រែសម្រួល៖ សុខហេង