លក់ស្មាតហ្វូនមិនសូវដាច់ទេ តែកុំមើលប្រាក់ចំណេញ Apple ស៊ីដាច់គេភឹងក្នុងត្រីមាសទី ២

2018-09-20 11:50:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបី Appleមិនអាចជាប់ឈ្មោះជាក្រុមហ៊ុនលក់ចេញស្មាតហ្វូនដាច់បំផុតក្នុងលោក ប៉ុន្តែផ្អែកតាមទិន្នន័យស្រាវជ្រាវចុងក្រោយចេញពី Counterpoint Research រកឃើញថាចំណែកនៃប្រាក់ចំណេញរបស់ក្រុមហ៊ុនយក្សអាមេរិកមួយនេះឈរនៅលំដាប់កំពូល ចន្លោះបីខែចុងក្រោយពីខែមេសាដល់មិថុនា។

ប្រភពសង្កត់ធ្ងន់ Appleទទួលបាន ៦២ ភាគរយ នៃប្រាក់ចំណេញសរុបក្នុងត្រីមាសទី ២ ខណៈ SAMSUNG ធ្លាក់ចុះបីឆ្នាំជាប់គ្នាមកសល់ ១៧ ភាគរយ ពោលគឺអាចនិយាយថា Apple ចំណេញលើស SAMSUNG ដល់ទៅ ៣ ដង។ ទៅមើលក្រុមហ៊ុនប្រទេសចិន Huawei មានចំណែក ៨ ភាគរយ តាមពីក្រោយដោយគូប្រជែងក្តៅគគុក Oppo មាន ៥ ភាគរយ Vivo មាន ៤ ភាគរយ និង Xiaomi មាន ៣ ភាគរយ។ ជាលើកទីមួយដែលប្រាក់ចំណេញក្រុមហ៊ុនយក្សចិនបូកបញ្ចូលគ្នាកើនបានជាង ២ ពាន់លានដុល្លារ។

តាមការគណនាក្នុងចំណែក ៦២ ភាគរយនោះ Apple នឹងនាំប្រាក់ចំណេញចូលក្រុមហ៊ុនបានប្រមាណ ៦ ពាន់លានដុល្លារ អំឡុងត្រីមាសទី ២ នៃចំណូលសរុប ៣០ ពាន់លានដុល្លារ។ Counterpoint បញ្ជាក់ថាការដែល SAMSUNG ចាប់ចុះអន់ថយក្នុងត្រីមាសនេះ ក៏ដោយសារតួលេខលក់ចេញត្រកូល Galaxy S9 ធ្លាក់ដល់ទៅ ២៤ ភាគរយធៀបនឹង S8 ឆ្នាំ ២០១៧។

បើនិយាយពីស្មាតហ្វូនធុនកណ្តាលថ្លៃចន្លោះពី ៤០០ ទៅ ៦០០ ដុល្លារក្នុងត្រីមាសដដែល Oppo និង Apple ជាអ្នកឆ្មក់តំណែងកំពូលបានយ៉ាងល្អ ស្របពេល Samsung មានត្រឹម ១៦ ភាគរយ Huawei មាន ១៤ ភាគរយ Xiaomi មាន ៦ ភាគរយ និង OnePlus មាន ៥ ភាគរយ។