ដំណោះស្រាយថ្មី ដើម្បីបង្កើនទម្លាប់ក្មេងឲ្យចូលចិត្តអានសៀវភៅ គាំទ្រដោយ Starbucks កម្ពុជា

2018-09-21 02:51:38
ចំនួនមតិ 0 | ចំនួនចែករំលែក 0

ចន្លោះមិនឃើញ

នរណាក៏ទទួលស្គាល់ដែរថាសៀវភៅរឿងនិទានតែងតែបន្សល់ទុកនូវការចងចាំដិតដាមមួយនៅក្នុងបេះដូងកុមារគ្រប់ៗរូប ។ វាធ្វើឲ្យកុមារចេះស្រមើស្រមៃ ចេះយល់ដឹងពីក្តីស្រលាញ់ ក្តីសង្ឃឹម ភាពក្លាហាន និងអ្វីៗលើសពីនេះទៀត។

ដូចនេះ ដើម្បីជំរុញអោយវិស័យមួយផ្នែកនេះកាន់តែប្រសើរឡើងក្នុងប្រទេសកម្ពុជា រួមទាំងបង្កើតទម្លាប់អានសៀវភៅដល់កុមារតូចៗផងនោះ Starbucks Cambodia បានសហការជាមួយ អង្គការមូលនិធិអាស៊ីកម្ពុជា (The Asia Foundation Cambodia) គាំទ្រគម្រោង “Let’s Read!” ដោយរៀបចំកម្មវិធីបង្កើតសៀវភៅរឿងនិទាន នៅសាខា Starbucks មួយក្នុងរាជធានីភ្នំពេញ។

"តាមពិតទៅ គម្រោង Let's Read! ដំណើរការតាំងពី ២០១៦ មកម្ល៉េះនៅកម្ពុជា។ គោលបំណងធំ ដើម្បីបង្កើតឲ្យមានធនធានអ្នកអាន និងបង្កើនទម្លាប់អានឲ្យកាន់តែច្រើនសម្រាប់កុមារនៅកម្ពុជា។ ឆ្នាំមុន Starbucks Cambodia បានចូលរួមជួយបោះពុម្ពបន្ថែមនូវសៀវភៅដែលមានស្រាប់ចំនួន ៥០០ ក្បាល ដើម្បីចែកជូនក្មេងៗ។ ហើយថ្ងៃនេះ យើងបានរៀបចំកិច្ចពិភាក្សាបង្កើតសៀវភៅថ្មីវិញម្ដងជាភាសាជាតិ"។ នេះបើតាមការរៀបរាប់ពីកញ្ញា អ៊ុក អេលីតា មន្ត្រីកម្មវិធីប្រចាំអង្គការមូលនិធិអាស៊ីកម្ពុជា។

កញ្ញា អ៊ុក អេលីតា

ក្រុមការងារបានបញ្ជាក់ថា សៀវភៅដំបូងដែលត្រៀមចេញផ្សាយនេះ និយាយពីប្រវត្តិនៃរបកគំហើញកាហ្វេ ដែលនឹងរៀបរៀងឡើងពីអ្នកនិពន្ធ វិចិត្រករ និងការីនិពន្ធអាជីពដែលមានជំនាញស្រាប់ រួមជាមួយការបើកឱកាសឲ្យ Starbucks Partners (អ្នកជំនាញឆុងកាហ្វេ) ចំនួន ៨ នាក់ ពីសាខាខុសៗគ្នា មកបញ្ចេញពីមតិយោបល់ផ្សេងៗជុំវិញប្រធានបទ ដើម្បីផលិតឆ្អឹងរឿង។

លោក ប៉ោ លីម នាយកគ្រប់គ្រងទូទៅរបស់ Starbucks Cambodia ថ្លែងថា៖ "យើងពិតជារីករាយនឹងលទ្ធផលដែលទទួលបានកាលពីឆ្នាំកន្លងទៅ ហើយរឹតតែសប្បាយចិត្តក្នុងការជំរុញឲ្យមានគម្រោង “Let’s Read!” នេះបន្តដំណើរនៅពេលខាងមុខទៀតដោយសារកិច្ចសហការមួយនេះ ត្បិតយើងចង់លើកស្ទួយឲ្យវប្បធម៌អាននៅកម្ពុជាកាន់តែរីកលូតលាស់ឡើង"។

លោក ប៉ោ លីម

តំណាងឲ្យអ្នកឆុងកាហ្វេទាំងអស់ប្រចាំ Starbucks Cambodia លោក ភិន វីរៈរដ្ឋា និយាយថា នេះជាលើកទី១ សម្រាប់លោកក្នុងការសរសេររឿងជាលក្ខណៈផ្លូវការ។ "ខ្ញុំសប្បាយចិត្ត ព្រោះតាមគម្រោងនេះ ខ្ញុំអាចបង្ហាញពីក្រុមហ៊ុនខ្ញុំផ្ទាល់ និងមានឱកាសបង្ហាញស្នាដៃថ្មីៗជាមួយStarbucks Partners ផ្សេងទៀត។ ខ្ញុំយល់ថា សៀវភៅនេះអាចទាក់ទាញក្មេងៗ ព្រោះរបកគំហើញរបស់កាហ្វេ វាគួរឲ្យចាប់អារម្មណ៍ស្រាប់ ហើយខ្ញុំជឿជាក់លើ Asia Foundation ដែលពួកគាត់ធ្លាប់មានបទពិសោធជោគជ័យច្រើនលើគម្រោងស្រដៀងគ្នានេះ"។

សាធារណជនទាំងអស់ក៏អាចក្លាយជាចំណែកមួយក្នុងគម្រោងនេះបានដែរ តាមរយៈការទិញសៀវភៅនៅតាមហាងណាមួយក្នុងចំណោមហាងទាំង ១៤ សាខារបស់ Starbucks Cambodia ដែលនឹងលេចរូបរាងនៅចុងឆ្នាំនេះ។

Let’s Read! គឺជាគំនិតផ្ដួចផ្ដើមរបស់អង្គការមូលនិធិអាស៊ីធ្វើឡើងដើម្បីបង្កើនចំនួនសៀវភៅកុមារជាភាសាតាមតំបន់ ដោយអនុញ្ញាតឲ្យពួកគេអាចប្រើប្រាស់បានគ្រប់ពេលវេលា និងគ្រប់ទីកន្លែង។ គម្រោងនេះក៏មានបណ្ណាល័យឌីជីថលដែលផ្ទុកសៀវភៅមានគុណភាពខ្ពស់សម្រាប់កុមារ ជិត ២០០ ក្បាលជាភាសាខ្មែរ ច្រើនក្បាលទៀតជាភាសាអង់គ្លេស និងភាសាក្នុងតំបន់អាស៊ី។ អ្នកអាចចូលអាន និងដោនឡូតដោយសេរីពីវិបសាយ www.letstreadasia.org ឬដោនឡូតកម្មវិធី Let’s Read! សម្រាប់ Android លើ Play Store៕

អត្ថបទ៖ សុខណា

ពាក្យទាក់ទង