កសិករខ្មែរបង្កាត់ពូជស្រូវថ្មីបានដោយខ្លួនឯង ដាក់ឈ្មោះតាមត្រីមួយប្រភេទ
- 2018-09-27 02:49:21
- ចំនួនមតិ 0 | ចំនួនចែករំលែក 0
កសិករខ្មែរបង្កាត់ពូជស្រូវថ្មីបានដោយខ្លួនឯង ដាក់ឈ្មោះតាមត្រីមួយប្រភេទ
ចន្លោះមិនឃើញ
កសិករខ្មែរនៅខេត្តស្ទឹងត្រែងបានបង្កាត់ពូជស្រូវម្យ៉ាងមានឈ្មោះថា «ត្រីរៀល» ដែលមានរយៈពេលដាំតិចជាងបីខែ អាចប្រមូលផលបាន និងថាងាយស្រួលដាំ បានផលច្រើនទៀតផង។
នៅលើទំព័រហ្វេសប៊ុករដ្ឋមន្ត្រីក្រសួងព័ត៌មាន ឯកឧត្តម ខៀវ កាញារីទ្ធ នៅព្រឹកនេះបានដកស្រង់ព័ត៌មានពីប្រធានមន្ទីរព័ត៌មានខេត្តស្ទឹងត្រែង ដោយមានសរសេរថាកសិករនៅឃុំភ្លុក ស្រុកសេសាន ខេត្តស្ទឹងត្រែងបានរកឃើញពូជស្រូវថ្មីមួយ និងបានដាក់ឈ្មោះថា «ស្រូវត្រីរៀល»។
លោក ថងឌី អាត ដែលជាកសិករបង្កាត់ពូជស្រូវត្រីរៀលបញ្ជាក់ថាលោកដាក់ឈ្មោះដូច្នេះដោយសារពេលស្រូវនេះទុំមានពណ៌ភ្លឺផ្លេកដូចត្រីរៀល ទើបលោកសម្រេចដាក់ឈ្មោះតាមឈ្មោះត្រីរៀល។ នេះបើតាមប្រភពដដែល។
បើតាមប្រភពខាងលើ លោក ថងឌី អាតបន្តថាដំបូងឡើយលោកបានដាំស្រូវរំដួលលាយលំជាមួយស្រូវផ្សេងទៀតនៅក្នុងស្រែ ហើយក៏ឃើញមានស្រូវប្រភេទនេះលេចឡើង លោកក៏បានប្រមូលទុក។ ពូជនេះ លោកបានប្រមូលទុកមិនតិចជាងបីឆ្នាំមកហើយទេ និងថាពូជស្រូវនេះងាយដាំដុះ មិនរើសដី ចំណាយពេលខ្លី និងបានផលច្រើន។
បើតាមប្រភពខាងលើពូជស្រូវនេះចំណាយពេលដាំដុះតែ៧៥ថ្ងៃប៉ុណ្ណោះ នឹងអាចប្រមូលផលបាន ហើយថាបច្ចុប្បន្នក្នុងឃុំភ្លុកនេះមានកសិករ២០គ្រួសារហើយបានដាំដុះពូជស្រូវនេះ។ ជាមួយគ្នានេះដែរអាជ្ញាធរមូលដ្ឋានក៏បានរាយការណ៍ដល់មន្ត្រីជំនាញដើម្បីជួយផ្តល់បច្ចេកទេសបន្ថែមដល់កសិករផងដែរ៕