ហេតុផលមិនធម្មតាមួយ ដែលជនជាតិជប៉ុនមិនងាយលាឈប់ការងារនៅកន្លែងចាស់

2018-09-30 07:51:56
ចំនួនមតិ 0 | ចំនួនចែករំលែក 0

ចន្លោះមិនឃើញ

បុគ្គលិកជប៉ុនយល់ថា ពួកគេគឺជាផ្នែកនៃក្រុមទាំងមូល ទំនួលខុសត្រូវរៀងៗគ្នាគឺជាការចាំបាច់សម្រាប់ក្រុមទាំងមូល។ ដោយសារមនោសញ្ចេតនាបែបនេះហើយ ទើបជួនកាលធ្វើឲ្យអ្នកខ្លះត្រូវផុងជាប់នឹងការងារមិនល្អ ឬ ការងារមិនត្រូវជំនាញ និង មិនត្រូវនឹងបុគ្គលិកលក្ខណៈរបស់ពួកគេ។

“ប្រសិនបើមិត្តរួមការងាររបស់ខ្ញុំកំពុងប្រឹងធ្វើការដោយលំបាក តើវាមិនអាត្មានិយមពេកទេសម្រាប់ខ្ញុំដែលគ្មានវិជ្ជាជីវៈការងារ គិតតែពីប្រយោជន៍ផ្ទាល់ខ្លួន? ប្រសិនបើខ្ញុំត្រូវឈប់ អ្នកផ្សេងនឹងត្រូវប្រឹងធ្វើការទ្វេដងដើម្បីជំនួសការងារខ្ញុំ?”។ នេះគឺជាសំណួរ ដែលបុគ្គលិកជប៉ុនតែងសួរខ្លួនឯង ដើម្បីបង្ខាំងខ្លួន មិនងាយសម្រេចចិត្តបោះជំហានចេញពីកន្លែងចាស់។

វាមិនចម្លែកទេ ព្រោះប្រជាជនជប៉ុនតែងយល់ថា ជាភាពអាម៉ាស់ក្នុងការសុំមេឈប់ពីកន្លែងការងារ ឬ ត្រូវដាក់ពាក្យលាលែងនៅផ្នែកធនធានមនុស្ស។

ក្រុមហ៊ុនភ្នាក់ងារផ្តល់សេវាកម្មលាលែងពីតំណែង ត្រូវបានបង្កើតឡើងដើម្បីដោះស្រាយបញ្ហានេះ

ហេតុដូច្នេះហើយ ក្រុមហ៊ុនមួយឈ្មោះថា EXIT ដែលជាភ្នាក់ងារផ្តល់សេវាកម្មលាលែងពីតំណែង ត្រូវបានបង្កើតឡើងនៅប្រទេសអាស៊ីមួយនេះ ខុសពីប្រទេសមួយចំនួនរួមទាំងកម្ពុជាផង ដែលបុគ្គលិកតែងត្រូវការភ្នាក់ងាររើសបុគ្គលិក នៅពេលពួកគេចង់បានការងារ។

លោក Yuichiro Okazaki ស្ថាបនិកក្រុមហ៊ុន EXIT បាននិយាយថា "នៅពេលយើងចាប់ផ្តើមយើងគិតថាវានឹងក្លាយជាការងារសាមញ្ញមួយ។ យើងទទួលបានមនុស្សខ្លះដែលទាក់ទងមកយើង ហើយប្រាប់យើងឲ្យជួយ ដូចជា "សូមជួយខ្ញុំផង" ឬ "ខ្ញុំចង់ស្លាប់" ជាដើម។

លោកបន្ថែមថា បុគ្គលិក ជប៉ុនមួយចំនួននៅទីបំផុតនឹងឈានដល់ការសន្និដ្ឋានថាពួកគេចង់បោះបង់ការងាររបស់ពួកគេ ប៉ុន្តែស្ទាក់ស្ទើរ នៅពេលនោះពួកគេអាចមានអារម្មណ៍ទុក្ខព្រួយច្រើនពេក សូម្បីតែដាក់ជើងនៅក្នុងការិយាល័យរបស់ពួកគេក៏ដោយ។

នៅពេលអតិថិជនទៅស្វែងរកសេវាកម្ម ក្រុមហ៊ុន EXIT បានទាក់ទងទៅកន្លែងការងាររបស់បុគ្គលិកនោះ។ "សួស្ដី។ ខ្ញុំហៅទូរស័ព្ទពីក្រុមហ៊ុន EXIT ទៅ។ តើខ្ញុំអាចនិយាយទៅកាន់នរណាម្នាក់នៅផ្នែកធនធានមនុស្សក្នុងក្រុមហ៊ុនរបស់អ្នកបានអត់? ខ្ញុំទាក់ទងទៅអ្នកថ្ងៃនេះ ព្រោះបុគ្គលិករបស់អ្នកម្នាក់ [ឈ្មោះ] ដែលនឹងលាឈប់ពីការងារ"។

ចាប់ពីចំណុចនោះមក Exit ដើរតួជាអ្នកសម្របសម្រួលគ្រប់ការទំនាក់ទំនងរវាងអតិថិជន និង និយោជករបស់គាត់។ បន្ទាប់ពីការសន្ទនាតាមទូរស័ព្ទ អតិថិជនបានរៀបចំសេចក្ដីលំអិតអំពីការលាលែងការងារជាលាយលក្ខណ៍អក្សរ។ មិនតែប៉ុណ្ណោះ EXIT របស់លោកមានតួនាទីលួងលោមផ្នែកអារម្មណ៍ដល់អតិថិជន កុំឲ្យគេមានការតានតឹងខ្លាំង៕

ប្រភព៖ soranews24 ប្រែសម្រួល៖ សុខ លាងហ៊ត