ប្រពៃណាស់! កូរ៉េខាងជើង និងខាងត្បូង ចាប់ផ្តើមដោះគ្រាប់មីន ចេញពីបណ្តោយព្រំដែនហើយ

2018-10-01 07:14:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងការពារជាតិកូរ៉េខាងត្បូង បាននិយាយថា ក្រុមទាហានមកពីកូរ៉េខាងជើង និងកូរ៉េខាងត្បូង បានចាប់ផ្ដើមដោះគ្រាប់មីននៅតាមបណ្ដោយព្រំដែន ដែលមានកំពែងដ៏រឹងមាំ នៅថ្ងៃច័ន្ទទី០១ ខែតុលា ឆ្នាំ២០១៨ នេះ ដែលជាផ្នែកមួយនៃកិច្ចព្រមព្រៀងដើម្បីកាត់បន្ថយភាពតានតឹង និងកសាងទំនុកចិត្តជាមួយគ្នាទៅវិញទៅមក។

ប្រធានាធិបតីកូរ៉េខាងត្បូង លោក ម៊ូន ជេអ៊ីន និងមេដឹកនាំកូរ៉េខាងជើង លោក គីម ជុងអ៊ុន

គម្រោងនេះត្រូវបានព្រមព្រៀងគ្នានៅក្នុងអំឡុងកិច្ចប្រជុំកំពូល កាលពីខែមុន នៅក្រុងព្យុងយ៉ាង នៃប្រទេសកូរ៉េខាងជើង រវាងមេដឹកនាំ គីម ជុងអ៊ុន និង ប្រធានាធិបតីកូរ៉េខាងត្បូង លោក ម៊ូន ជេអ៊ីន។

នៅក្នុងសេចក្ដីថ្លែងការណ៍មួយ ក្រសួងបាននិយាយថា ភាគីទាំងពីរបានព្រមព្រៀងគ្នាក្នុងការដោះយកគ្រាប់មីនទាំងអស់ ចេញពីតំបន់សន្តិសុខរួមគ្នាមួយហៅថា JSA នៅភូមិ Panmunjom ក្នុងរយៈពេល ២០ថ្ងៃ។ ទោះបីជាយ៉ាងណាក៏ដោយ កូរ៉េខាងជើង មិនទាន់ចេញសេចក្ដីប្រកាសណាមួយ ដែលបញ្ជាក់ថា កងទ័ពរបស់ខ្លួនបានចាប់ផ្ដើមដំណើរការដោះមីននេះនៅឡើយទេ។

មិនតែប៉ុណ្ណោះ កិច្ចព្រមព្រៀងនេះក៏មានចែងផងដែរ សម្រាប់ការដកចេញនូវប៉ុស្តិ៍យាម និងអាវុធ ពីតំបន់ JSA ខណៈកងទ័ពដែលនៅសេសសល់ មិនត្រូវមានអាវុធឡើយ។